Read Girawa Jon 7 Bible Online

Jon 7 - Girawa bible

Jon 7

¹Areme rade Jesu fune aesakae Gareri ijia oenoekinu e ije vua nijasianoe ro fu naebe una sakae Judia ijia oenoekiro vierafei. Ijadufuo maeje Jiusi e mamekanu ije bu fu kanakuae samuana kariva ijadufuo fu ijiege rei.

²Ro maza ije e Jiusi bu iro ina una asaerafa ije izege bu isuibe ae sao ijia are muvuaka sana karinoeva ije vierafevo ije fune ivuare. Ijadufuo Jesudo uviarafa ije bune uri Jesu kuae, Are ige a oenoeno ije arekiro urina gamia Judia ijia vane. A va ijia ire sumiki ige a renoeno ije gue ijia rega e vua one fievo bu giane.

³(null)

⁴A igia sauina fikuma e are irore boege bu izege a ma vierafekuva baki. Ijadufuo a vierafe e boeje bu a gana ma vierafekuva ni urina una gamia Judia e uruvana bu afuina iro ijo ijia va ire sumiki ije rega bu gano kuae.

⁵Ro vua ije bu Jesudo uviarafa ijiebe ijiege kuarae rove budua bu Jesu ma vierafevo baki.

⁶Ijadufuo Jesu fu una kiae, Jaeje ja maza binobino e bu iro ikuae afuivo ije maza bino ja va ro bino ja arevo ije fune marei. Rove naeje na maza none fu naebe abema ijadufuo nabe vake.

⁷Ro igia fie, e ume igeko ije jaeje bu ziegafiavo baki ro naeje buka ziegafiekinu ijuonevo. Ijadufuo maeje na ise buone bu renoejo ije samadukua visuna kuariavo ijadufuo bu na ijiege revo.

⁸Ijadufuo ni jare iro ijia vakiro naeje nabe vuake. Ijadufuo maeje maza none fu naebe abemano kiae.

⁹Jesu fu ijiege kuariana areme fune mu sibaneke Gareri ijia finoe. Jesu fu iro ijia vaema ijene

¹⁰Areme Jesudo uviarafa ije bune Judia iro ije bu ivo ijia vakoga fu mauike rade nuvediana vae.

¹¹Fu vakogana Jiusibuo e mamekanu iro ijia kariva ije bu urina e ije afuiva uve ijia Jesu rerei. Bu rerenoekinu uri e ije kuariana kiavo, E ije fu izieburekiga nijasuo no gano kiae.

¹²Ro e ije afuiva ijia e gue bu mauike karina fuesina bue kuaevo. E ije fuka e mano kuae. Ro e gue bu kuae, E ije fuka vua kufui ije e uruvana nijasianoeno kuae.

¹³E ije bu Jesu dabe ijiege fuesina kuaenoe. Rove bu naebe abe uruke kuaena samadire ijadufuo maeje bu e Jiusibuo e mamekanu ije jumei.

¹⁴Areme iro ije bune ina ririkineva ijia Jesu fune va Godido Are ijia aru e ije vua zinuevena nijasiae.

¹⁵Fu ijiege nijasiamoga Jiusi e mamekanu ije bu gavo buka oeseradiae. Ijadufuo bu kuae, E ije fu Godido buki akae ijia bu nijaeva baki ro fu izege vua maeje mukoe vierafemano kuae?

¹⁶Bu ijiege kuaevoga Jesu fu kiae, Vua ige na kuariavo ije fu none bakiro fu e ije fu kiemo na ruaeva ijadufuo vua.

¹⁷Ijadufuo e ije erare fu Godido vierafema ijia kenoeno e ijare vua ige na kuariavo ije fure giena vierafeke. Fu giega vua ige na none vierafeva ijia kuaria ke na Godido vua ije kuariavoga ije fure vierafeke.

¹⁸Ro erare fu vierafe fuone ije dabe kuaenoeno ije fu fuone aroenamikiro fu ije vierafeme. Ro e ije fu vierafe fuka e ije fu kuamo fu ruaema ije dabe aroekiro vierafemo ije vua fuone fuka ma kuaeme ro fu kufuimeno baki.

¹⁹Ro igia fie, e Mosisi fu akae ije kena vajiae rove e boeje gure kariva ije fu e besu erare akae ije mukoe irinaema baki. Ro ja irerefuo na kaniekuae rerienoejo kiae.

²⁰Jesu fu ijiege kuariamoga e ije bune urina kumei, E gafe ka kavene iseke niroema gafe a erare kanakuvega a ije kuaemono kumei.

²¹Ro Jesu fu una kiae, Na ire sumiki besu maza ije ja mauike karina Godido baname isoevo ijia revo ja gievo jaka oeseradiae.

²²Ro iviama fu Mosisire akae ije vajae surive kaniaufu nuga navo ije miaema ijadufuo ja ijiege kenoeve. (Rove vame ije bune asaerafa jone ijiebe isuibe ijiege rena ruae. Ro Mosisi akae ije fu rade isoena vajiae). Ja vierafe jaka Mosisido akae ije mukoreigia nuvekuae ja ijadufuo ame isesina ije ja kena maza akae ijia vajae surive buone kaniaufu nuga navo. Ro ja irerefuo na e adagi gafe maza akae ijia amaerivo fu maema ijadufuo una oe isema na vierafekinu zienoeve?

²³(null)

²⁴Ja e bino bu ire gue rega ja giana kuaevo ije ni sone irere bu revo ije gia areme rade kuaedufuo. Ro jame uri ijiebure migegire giana kuaevo ije fuka naebe maremano kiae. E ije fute E Ije Godi fu kuamo fu ari ruaema ijene

²⁵Fu ijiege kuariamoga e Jerusaremeko gue bu una bue kuae, E ije fute e ije e mamekanu bu kanakuae rerenoejo ijene.

²⁶E ije fu jumemo baki ro fuka e boeje ijiebuo niome ijia manina vua kuariame. Rove e mamekanu ije bu una vegue kuaravo baki. Ijadufuo bubite bu vierafega e ije fune ma E Ije Godi fu kuamo fu ruaema ijarega bu naebe una vegue kuarave.

²⁷Nono e gare fu izia ruaema ije none vierafe. Ro maza rade E Ije Godi fu kuaga fu no karaunuokiro ruakuma ije fu erare fu izia ruaema ije vierafekuma bakino kuae.

²⁸Jesu fu uria Godido Are ijia manina vua kuariamo ijia bu ijiege kuaevoga fu kume, E boeje gure kariva gurie, ja na e izeki ro na izia ruaeva ije jaka naebe vierafei. Naeje name nare igia ari none vierafeva ijia renoekiro ruaeva baki. Ro Godi ije fu kiemo na ruaeva ije fu Godi kufui ije fu baki ro fuka ma. Ro ja fuje ja gana vierafeva bakiro nane nare nosukua fuje nane vierafei. Ijadufuo maeje naeje fure kiemo na ari ruaevano kumei.

²⁹

³⁰Ijadufuo e gue bune uri fare dabe dibure nujakuae vierafe rove e besukua be fu naebe uri vajae fuone ijia niriae. Ijadufuo maeje maza ije bu fu kanadufuo ije fu naebe abema ijadufuo bu ijia arei.

³¹Rove e ije afuiva ijia e uruvana buka fu ma vierafei. Areme bu una bue kuaevo, No vierafe E Ije bu isuibe kuae fu ruakono kuaeva fu ruakuma fube ire sumiki bino e gare fu rema ije asina rekono kuae. Bu e juo karijo ije kiavo bu Jesu tokuae ruaeva ijene

³²Areme E Ferisi ije bu e ijiebe vua ijiege Jesusina kuaevoga bu fie. Ijadufuo bu urina e mamekanu Godido zinone ifaejevo ijena e juo karijo gue kiavo bu Jesu tokuae ruae.

³³Bu rovoga Jesu fu urina kiae, Naeje na maza sibaneke igia oenoena areme nane una Godi e ije fu kiemo na ruaeva ijadufuo vake.

³⁴Ro na vakuva jaka uri na rerieke rove ja giekuva baki. Ijadufuo maeje ja are na vako ijia jabe vuakono kiae.

³⁵Rove e Jiusi ije bu vua ije fiena una bue kuaevo, E ije fu izia vakuveno ijadufuo fu vakuma nobe gake? Fubite fu uri e Gurikibuo sidove ije e Jiusi bu kariva ijia E Guriki ije vua nijasiake vake?

³⁶Fu kuae fu vakuma noka uri fu rereke rove nobe biekono kuae. Ro kuke no are fu fino ije nobe vakono kuaema ije fu irerefuo ijiege kuaemano kuae? Do ije bu ina ma karivako ijene

³⁷Areme maza ka ireobo be bu iro ina furikuvejo ijia Jesu fu urina e ije urukeigia aramaziae. Fu aramaziana kumei, E be erare do duaejoga ni none roga na do ijano kumei. Ijadufuo maeje isuibe Godido buki akae ijia bu vua be ijiege isoena kuae, Eranebe bu na ma vierafekuva do ije fu bu ifejiaga bu ma karivadufuo ije fu oe buone ijia abiesekono kumei.

³⁸

³⁹Ro Jesu vua ije fu do ijadufuo kumema ije fu Godido Kavene ije eranebe bu ma vierafena abedufuo fu ijadufuo kumei. Rove maza ijia bu Godido Kavene bu naebe abei ijadufuo maeje Jesu fu naebe baronena una uri are sanaema fuone kave gufia ijia vae. E ije bu dabe atana guegue reiva ijene

⁴⁰Areme e boeje bu ijia afuiva ijia e uruvana gue bu Jesu vua ije fu ijiege kuaema ije fie. Ijadufuo bu kuae, E ije no vierafega fune ma e Godido vua vierafena kuaemo ijeno kuae.

⁴¹Ro e gue bu kuae, E ije fu Godi E Ije fu kuamo fu ruaema ijeno kuae. Ro gue bu kuae, Godi E Ije fu kuaga fu ruadufuo ije fu sakae Gareri ijia ruakuma baki.

⁴²Ro Godido buki akae ije bu isuibe isoeva ijia fu kuae, E Ije Godi fu kua fu ruadufuo ije fu e Devidido uifari ijia ruakono kuae. Ro kuke E Ije bu are Betirieme e Devidi fu fino ijia bietekono kuae.

⁴³Ijadufuo e ije bune Jesusina ijiege kuaena dabe ata guegue rena bue sagui.

⁴⁴Ro e gue buka defarudiamo bu Jesu fare tokuae vierafei rove bu e besukua be fu naebe vajae fuone ije niriae.

⁴⁵Areme e Godido Are juo karijo ije bu Jesu tokuae ruaeva ije bune ijia arena una va e mamekanu Godido zinone ifaejevo ijiakiro e Feresi ije kariva ijia usiae. Bu usiaevoga e Feresi bu urina kiae, Ja irerefuo e ije no kiavo ja vaeva ije ja naebe tona mesiri ruaevano kiae?

⁴⁶Rove e Godido Are ije juo karijo ije bu una kiae, E ije no mesirikuae vae rove no usiaena vua fuone fu kuaemo ije fievo fuka oeseraduomo no ijia arena ruaevano kiae.

⁴⁷Bu ijiege kuariavoga e Feresi ije bu una kiae, Ijiekido no vierafega jadua jabite fune vua fuone ijare oe jone ije fune kame kuderiaejiae.

⁴⁸Rove igia fie, no e Feresi igiakiro e mamekanu ije gue nono fu ma vierafevo baki.

⁴⁹Ro e ije ka naebe mukoe vierafevo ije bubite bu e Mosisido akae ije bu naebe mukoe vierafe ijadufuo bu una e ije ma vierafeve. Bu ijiege revo ijadufuo no vierafe Godi fuka rade bu kame vame ise ijia isekafiakono kuae.

⁵⁰Bu ijiege kuaevoga Nikodimasi e ije fu muge be ro Jesuki fina vua kuaema ijare urina kiae, No akae nuvuone ije ude noka e ije no kena isekafiakuvejo ije irere bu isema reva ije fieke. Ro rade no ijare e ije kena isekafiakuva ije fu marekono kiae. Ijadufuo e mamekanu ijiakiro e Feresi ije bu una kuae, A ijiege kuaemo ijadufuo na vierafega adua abite a e Gareriko. Ni Godido buki akae ije bu isuibe isoeva ijia dana gane. A ijia dana gabitie a ga e Godido vua vierafena kuaemo ije fu sakae Gareri ijia ruakuma bakino kuae.

⁵³