Read Girawa Aposel 1 Bible Online

Aposel 1 - Girawa bible

Aposel 1

¹Eko, Tiofirasi buki none ije na ude isoeva ije na izege Jesu fu ume igia ire boeje renoekinu nijasianoema ijene isoei. Jesu fu Godido Kavene ijadufuo duvado ijia fu Afasero e vua fuone fiena una e gue kuariavo ijene izege bu redufuo ije kuariama areme fune una saove gufia ajia vae.

³Fu barone areme una urina maza foti ijiege fu vajae fuone abena e vua fuone fievo ije nijasiae. Fuka samadukua nijasiamoga bu gana vierafero fune ma una urimaro bu ijiege vierafe. Ro ve ijia fu uri Godi izege fu e fuone ijiebuo oe ijia samuagiadufuo ijadufuo vua ije nijasiae.

⁴Bu una besu afuivoga fu vua kuariana kiae, Jade are Jerusareme arena vako. Ro nika ijia karina ire ije asoe none fu nijiako kiaema ije na ude kuariaeva ije samuafo.

⁵Ijadufuo maeje Joni fu do ijiaru ja ruoriae rove iviama igiebo Godi fu Kavene fuone nujajiakono kiae. Jesu fu saove ijia ajia vaema ijene

⁶E Afasero bu una besu kariva ijia bu uri Jesu kuae, E Ireobo abe iviama no ifejuona e kini be abe muoga fure e Isureroko ige no samuaguokono kuae?

⁷Rove Jesu fu una kiae, Ja ire ije Asoe none fu veze redufuo ije jade vierafevo. Ijadufuo maeje ire ije fu veze redufuo ije fune fure fuosukua vierafei.

⁸Ro ja rade maza ije Godido Kavene fu oe jone ijia arikuma ja ijia daro abena uri vua none ije mukoreigia e nijasianoeke. Ja e sidove Jerusaremekiro sakae Judia ro Sameria ijiakina e are irore boegia karinoeva ije nijasianoekono kiae.

⁹Jesu fu ijiege kuariama areme bu veriko fu ijia una saove ijia ajia vakoga amite ijare dabe utina vako bu naebe una gae.

¹⁰Jesu fune vakoga bu irena saove gufia verivo ijia saroruba e inokiro ugone abaeki saeva ije bume ijia buina irei.

¹¹Bu ijia ire areme uri kiae, E Gareriko gurie ja irerefuo irena saove ijia rereve? Iviama ige Jesu fu izege saove gufia ajia vako ja gaeva ije rade fu una ijiege roga ja gakono kiae. E Mataeasi fu Judasido are abema ijene

¹²Areme e Afasero ijiakiro e gue Jesudo vua fievo ije bune uruo Orivi arena una Jerusareme ijia vae. Ro uruo Orivi ije fu Jerusareme iviake ijia.

¹³Bune va Jerusareme usiaena gire be bu karijo ijia ajia vae. Ro e ijia vaeva ije Fitakina Jonikina Jemisi ro Edurukiro Firifi ro Tomasi ijene. Ro kuke e Batoromiukiro Matiu ro e Afiasedo fari Jemisi. Ro Saemoni e ije e mamekanu ijena madinamimo ijiakiro Jemisido fari e Judasi ijiebe ijia vae.

¹⁴Ro maza boeje bu una besu afuina Godido baname isoevo ije bara Meri Jesudo asie ijiakiro bara gue ro Jesudo uviarafa ije bu buina besu afuivo.

¹⁵Areme mu sibaneke furikoga e boeje Jesu ma vierafevo uvani aderedi tuaedi (120) bu una besu afui. Bu ijiege afuikoga Fita fu urina kiae, Erafano Godido vua bu isuibe isoeva ije funeka riarei. Ro vua ije fune isuibe Godido Kavene ijare e Devidido itire ijia e Judasido kuae fure e ani ijiebuo vame amaeriga bu Jesu tokono kuae.

¹⁷Ro e ije fune Jesure mesirima ijadufuo fu noena imei.

¹⁸Ro moni ije Judasi fu vame ise ijia abema ije bu abena sakae be fuaevei. Ro sakae ije fu fuaevema ije fu ijia ari kanamoga fu detavuana baronei.

¹⁹Ro e boeje are Jerusareme ijia kariva bu vua ije fiena uri are ije bu ive ina kua Akedamano kuae. Ro Akedama ijadufuo maeje Are Kavuane Arimo.

²⁰Ro vua ijadufuo ije bune buki Sami ijia isoena ijiege kuae,Are fuone ije e be fube ijia fikono kuae. Ro kuke vua be bu ijiege isoe,E be fuka i fuone fu meno ije abeno kuae.

²¹Ijadufuo na vierafe noka e be erare fu maza ije no Jesuna oenoeva ijia fu noena oenoema no e ije abeke.

²²Ro kuke e ije fuka maza ije Joni fu e nijasiakinu do ruoriaema ijia ruoma Jesu fu una saove gufia ajia vako fu gaema no e ije abekono kiae.

²³Ijadufuo bu uri e inokiro kei. E be ive fuone Josofu Basabasi Jasitasi ro be ije e Mataeasi.

²⁴Bu e inokiro ije kena Godido baname isoena kuae, E Ireobo a e boeje ijiebuo oe ije are giamo ijadufuo ni e inokiro ige giana e a vierafema ije nijasuone. E Judasi fu vua one abe oenoeno ijia fu i fuone ije arena una are ise ijia vae. Ijadufuo ni erare fu are fuone abedufuo ije nijasuono kuae.

²⁶Areme bune ive buone isoema ke mavua ijia sana una karaeva ije bu Mataeasido ive ije kei. Ijadufuo bu fu abevoga fu una e Afasero ireveni (11) Jesudo vua abe oenoejo ijena mazie.