Read Girawa Aposel 10 Bible Online

Aposel 10 - Girawa bible

Aposel 10

¹Ro are Sesaria ijia e be ive fuone ije Koniriasi fu ijia fino. E ije fu e Romuko ijiebuo e azo kevo ije samuagiamo. Ro e ije azo kevo ijiebuo ive ije bu kua E Itariko e azo kevo ijeno kuavo.

²Ro e Koniriasi fu agebara fuone ijene buka Godi ma vierafevo. E ije fuka e ije bu oefiaeguma karinoejo ije oetuana ire vajiakinu ro maza boeje fuka Godi baname isoemo.

³Fu ijiege re vakuma ve be maza garege vako ijia fu nimamaena gake Godido anera be fu kekena kuae, Koniriasino kuae.

⁴Fu ije kuamoga Koniriasi fuka jumena uri anera ije uruvana igia veri. Areme fu uri kuae, E Ireobo, a irere abekuveno kuae? Ro anera ije fu una kuae, Koniriasi, Godi fu baname one a isoemo ijiakiro e ije bu oefiane abega a ifejiamo ije Godi fune fie.

⁵Ijadufuo ni iviama e bino kiaga bu va are Jofa ijia e Saemoni, e ije bu kua Fitano kuavo ije mesiri rone.

⁶Ro e ije fu e nabure fuone Saemoni e ije fu fanu surive ijia sinuome amaeriamo ijiaki fine. Ro e Saemoni are fuone fu fino ije fu davare irifo ijiano kuae.

⁷Areme anera ije fune vakoga Koniriasi fu uri e fuone i mejo inokiro ro e azo kemo be Godi ma vierafemo ijene kiamo bu ruae.

⁸Areme fu uri vua boeje izege fu nimamaena gaema ije kuariae. Fu ijiege kuariama areme kiamo bune are Jofa ijia e Fita mesirikuae vae.

⁹Ro nituame maza uvuoka manino ijia e ije bune vakuma sidove ijia usiaekuae ivuarema ijia Fita fu are ado ijia baname isoekiro ajia vae.

¹⁰Fita fuka vasiaoema ijadufuo fu ire ikiro vierafe ijadufuo bu fuefuo ire amaerikoga fu ijia nimamae. Fu nimamae gake saove ijia viene fu dauvekoga ire ugone igeki ireobo ijare ijia ari ruome.

¹¹(null)

¹²Ro ugone ije fu fanu ni binobino ro tabarekina ume ijiakuma ijia ari ruae.

¹³Areme vua be fu ijia ijiege kume, Fita, urina fanuve ijiakina ume ije kaniana buvua ino kumei.

¹⁴Ro Fita fu una gue kume, E Ireobo fanuve ijieki ije buka ise na ijo baki. Ijadufuo nabe kaniana ikono kumei.

¹⁵Ro vua ije fu una kuke kumei, Fanuve ijieki ije fune isuibe Godire amaeriaema ijadufuo buka maturae. Ijadufuo ade kuae ire ije bu iseno kuaemono kumei.

¹⁶Fita fu maza inokubeke ire ije ugone ijieki ije fanuve ijiakuma saove ijia ari ruaema ije gakoga fune una meruna saove ijia vae.

¹⁷Areme Fita fu uria are ado ijia fina ire ije fu nimamaena giaema ije fina vierafeme. Fu ijiege vierafemo ijia e ije Koniriasi fu kiamo bu ruaeva ije bu ro Saemonido are viene ijia irei.

¹⁸Bu ijia irena kiae, E Saemoni Fita kuavo ije fube ijia fino kiae?

¹⁹Ro Fita fu uria ijia fina ire ije fu nimamaena gaema ije vierafemo ijia Godido Kavene fu kuae. Saemoni, e inokubeke bu a reravono ni arina vane. Ro ade buina vakiro ijuemo ijadufuo maeje e ije nare kiavo bu ruaevano kuae.

²⁰(null)

²¹Areme Fita fune una ari kekena e ije kiae, E ije ja rerevo ije na igifureki ro ja irerefuo ruaevano kiae?

²²Fu ijiege kiamoga bu kuae, No Koniriasi e azo kevo ijiebuo e ireobo ijare kuomo no ruae. Ro e ije fuka e be mukoreigia kenoeno ijadufuo e Jiusi boeje buka fu aguaevo. Ro kuke fuka e be Godi ma vierafemo. Ro maza be Godido anera ijare e Koniriasi kuae, Ni e bino kiaga bu ro a mesira vaga a are fuone ijia vua kuaraga fu fieno kuae.

²³Ijadufuo Fita vua ije fiena uri e ije kiamoga bu are guove ijia fuina naoe. Fita fu Koniriasido are ije vaema ijene Areme suoke Fita fune urina buina vakoga e Jofako gue Godi ma vierafevo ije bu fuina vae.

²⁴Bu vakuma nituame bu are Sesaria ijia usiae. Ro e Koniriasi fune uri agane fuone ijiakina kairafa fuone ije kiamo bune besu afuima areme Fita samuana kari.

²⁵Bu ijiege samua kariva ijia Fita fu ijia keke areme iko viene ijia aru vakoga Koniriasi fuka uri fu aguaena nidua fuone auge sae.

²⁶Fu ijiege remoga Fita fu kuae, Eko, naeje name ema nareno urino kuae.

²⁷Areme Fita fu Koniriasiki vua kuaekinu aru vagake e uruvana bu are guove ijia kari. Ijadufuo fu uri kiae, Jane vierafe no e Jiusi vame nuvuone no e Jiusi baki ijena besu afuivo baki. Rove Godi fune na kuariena kie, Ade vierafero e Jiusi baki ije bu e ise ro e Jiusi ije bu e maro ade ijiege vierafemono kie. Ijadufuo e ije bu na mesiriekuae vuakoga na naebe ijuone ro naka urina buina ruae. Ijadufuoro ja ireke befuo kievo na igia ruaevano kiae?

²⁹(null)

³⁰Fu ijiege kuariamoga Koniriasi fu una kuae, Na mu inokirokiro inokiro furima ijia na maza tiri kiroki ijia are none ijia fi. Na ijia fina baname isoegake e be ugone zine igege iramo ije saema ijare saroruba nidua none ijia manino na gae.

³¹E ije fu ijia manina na kie, Koniriasi Godi fune baname one ijiakiro ire ije a e isema karivo ije vajiamo ije fune gana vierafei.

³²Ijadufuo ni e kiaga bu va Jofa ijia e Saemoni Fita kuavo ije fu e Saemoni be fu fanu surive ijia sinuome amaeriamo ijiaki davare irifo ijia fino ije mesiri rono kie.

³³Ijadufuo na kiavo bu migegire a mesirakuae vuae. Ijadufuo ane magoe ruaemado no Godido nidua ijia karina fiekono ni vua boeje E Ireobo fu kuaraema ije kuaruono kuae.

³⁴Ijadufuo Fita fune uri zinuevena vua kuariakiro kiae, Iviama nane vierafega Godi fu e gue oemarejiakiro gue fu ijuonemo baki.

³⁵Ro fume e aesakae binobino ijia eranebe bu fu ma vierafekinu vame maeje kenoevo ije kaenamiaga bu una e fuone revo.

³⁶Ro igia fie, Godi vua ije fu e Isureroko ije nijiaema ije fu ijiege kumei. Jesu Kuraesi fu e boeje ijiebuo E Ireobo. Ro fure manido fu kafaemo ije abe e boeje miaga bu kafaena karike.

³⁷Ro ja are Judia ijia fu izege rema ije jane vierafe. E Joni fu Jesu do ruoraema ijia Godi fu Kavene Akae fuone ije kuamo fu Jesu e Nasaretiko ijadufuo oe ijia ari. Ijadufuo fu daro abena vame maeje renoekinu e ije Setani fu daro fuone ijia samuagiamo ije amaeriakinu karauniae. Ro Godido Kavene ije fuka fuosiki oenoeno ijadufuo fu ire ijiege renoe. Ro ire ije Jesu fu renoema ije fu are Gareri ijia zinuevena gafege vae.

³⁸(null)

³⁹Ro ire boeje fu sakae Judiakiro Jerusareme ijia renoema ije nore giae. Ro Jesu bu dabe kurosi kanavoga mu inokubeke furiko Godi fu kenujamo fu una urimo e gue bune gae.

⁴⁰

⁴¹E boeje bu naebe gae ro none e ije Godi fu kuomo no fuina besu oenoeva ije nore gae. Fu una uri areme noena besu irekiro do ino no gae.

⁴²Areme fu no kuaruona kuo, Ni va e boeje kuariana kia, Naeje nane ma Godire kiemado na Godido vua maeje nijasiakinu e ije oeva ro ni uria kariva ije ise buone ke mazie giake.

⁴³E Godido vua vierafena kuaevo ijiebe fuefuo ijiege kuae, Erare fu Jesu ma vierafekuma Godi fu Jesudo ive ijia ise fuone giana arekono kuae. E Jiusi baki ije bu Godido Kavene abeva ijene

⁴⁴Fita fu uria manina vua kuariamo ijia Godido Kavene fu arina e boeje vua fievo ije nirokiae.

⁴⁵Ro e Jiusi Godi ma vierafevo ije Fitana ruaeva ije buka oeseradiae. Ijadufuo maeje Godido Kavene fuka arina e Jiusi baki ije nirokiaema ijadufuo buka oeseradiae.

⁴⁶Ro kuke bu fieke e Jiusi baki ije buka vua nanuamena kuaekinu Godido oemarevo bu fie.

⁴⁷Ijadufuo Fita fu urina kiae, E ige bune izege Godido Kavene no abeva budua bune ijiege abei. Ijadufuo no kaenamia do ruoriakuva fu erare kuriaerekuma bakino kiae.

⁴⁸Ijadufuo fu kiamoga bu kame Jesu Kuraesido ive ijia do ruoriae. Areme e Koniriasikiro e Jiusi baki ije bune Fita kuavoga fu mu sibaneke una buina ijia fi.