Read Girawa Aposel 2 Bible Online

Aposel 2 - Girawa bible

Aposel 2

¹Areme maza ije bu kua Fenitikosino kuavo ije romoga e boeje Jesu ma vierafevo bu una are besu afui.

²Bu besu kariva ijia saroruba ire be fu saove gufia majaufi ireobo igege uvuina ae guove bu kariva ijia arui.

³Areme bu gake ire be miane igege vujena kikike e besubesu ijiebuo vajae ijia kunae.

⁴Ijiege rekoga Godido Kavene fu e boeje ijiebuo oe ijia arina nirokiamoga bu uri isama bino bu fievo baki ijia nanuamena kuae.

⁵Ro e Jiusi Godi ma vierafevo bu are irore ijia ruaeva ije bu Jerusareme ijia kari.

⁶Ijadufuo bu ire ije remo ije fiena una besu afui. Ro e binobino bu vua ije bu isama buone ijia kuaevo ije fievo buka oeseradiae. Ijadufuo bu una bue kuae, E gafe vua ijiege kuaevo ije bu e Gareriko.

⁷(null)

⁸Ro e ige nono isama binobino kuaevo rove e Gareriko gafe bu izege isama nuvuone kuaeve?

⁹No e gue no e Fatia ro Mediako ro gue no e Eramaeti ro Mesafotamia ro Judiakiro Kafadosiako. Ro gue no e Fonetasi ro e Eisiakiro Firigiako ro gue e Femefiriako. Ro kuke e gue no e Ijifiti ro e Ribiako are Saerini ivuake ijieko. Ro kuke e gue no e Arebiakiro Romuko ro gue no e Kuritiko.

¹⁰(null)

¹¹Ro e gue no e Jiusi ro gue no e Jiusi baki ro nome e Jiusi vame bu kevo no ijiege kenoeve. E boeje no are irore binobino ijia ruae rove e ije bu izege ire maeje Godi fu rema ije dabe isama nuvuone ijia kuaruovono kuae. E boeje bu vua ije fievo buka oeseradiamo bu una bue kuae, Ire ije bu revo ije maeje irereno kuae?

¹²(null)

¹³Ro e gue bu uri e Jesu ma vierafevo ijene kame varaemena kuae, E ije bute do kugi iva ijadufuo bu vua ijiege kuaevono kuae. Fita fu uri vua kuariaema ijene

¹⁴Areme Fita fu uri e eleveni gue Jesudo vua abe oenoejo ijena e boeje aramaziana kiae, E Jiusi guriakiro e Jerusareme kariva gurie jame mauike karifo. Ja karike na irere ige iviama rema ijadufuo maeje kuariaga ja fiefo.

¹⁵Ja vierafero e ige bu do kugi ivaro ja ijiege vierafe rove ije bu baki ijadufuo maeje iviama ige fu uria suoke naeni kiroki.

¹⁶Ire ige rema ije fune izege e Joero e Godido vua vierafena kuaemo fu isuibe kuaema fune ijiakuma riarei. Ro vua ije fu kuaema ije bu ijiege isoe,Godi fu kuae, Na maza radekuma ijia Kavene none ije abe e boeje nujaejiake. Ro ame momokana ro kabaekua jone bu Godido vua ije fiena una e gue kuariake. Ro kuke e nikaki ije bu nimamaeke ro eove ije bu naka naoke.

¹⁷(null)

¹⁸Ro e ijuebaki vua none fievo ije na Kavene Akae none abe nujaejiaga bu vua none fiena una e gue kuariake.

¹⁹Na ire sumiki mamekanu ja naebe giaeva ije bino kave gufia rekinu ro ume igia reke. Ro ire sumiki ijeja ume igia fu kavuane firake ro kuke miane fu ijia naekega are irore boege fuka miane u ijare iraraeke.

²⁰Ro kuke mazani ije fuka tituteke asame fu una kavuane reke. Ire ijiebe ude rekega rade E Ireobo ijadufuo maza anuiga sanaema ije fu ruadufuo.

²¹Ro maza ijia erare fu E Ireobo ijadufuo ive ijia kumekuma fu kenujakono kuae.

²²Ijadufuo e Isureroko gurie vua ige mukoreigia fiefo. Godi fu Jesu e Nasaretiko ije kuamoga fu ire sumiki ro nuga binobino ja ude naebe giaeva ije samadukua remo jane giae. Ijadufuo ja ma vierafega Jesu fune ma Godire kuamo fu ruae.

²³Godi fu e ije bu Jesu abe ja miadufuo ije fune isuibe vierafe ro fune oe buone ijia ijiege niri. Ijadufuo ja arekoga bu Jesu abe e ise ije miavo bu abe kurosi kanae.

²⁴Areme Jesu fu isejavaemoga Godire kenujamo fu una uri. Ijadufuo maeje oevo ije fu izege una Jesu faregakuma baki.

²⁵Ijadufuo maeje Devidi fune isuibe ijia Jesudo fu ijiege kuae,Maza boeje na gaga E Ireobo fuka na nidua ijia manirume. Ro kuke fuka na mukoe samuagiemo ijadufuo fu erare ire ise bino none rekuma baki.

²⁶Ijadufuo naka oemarena vua ije e bu oemaredufuo ije kuaeve. Ro naka uria Godi a ma vierafevo ijadufuo maeje a kavene none abe arega fu baromuna vake. Ro E One maturaema ije ade arega vajae fuone fu mako ijia buraemo.

²⁷(null)

²⁸Ro ane are vame ije ma karivako ije nijasie. Ro kuke a nobiki fino ijadufuo naka oe madiemono kuae.

²⁹Ijadufuo erafano, vua ige na asae nuvuone e Devidido ije samadukua kuariakuvejo fiefo. Devidi fune isuibe baronemo bune abe mako rui rove mako fuone no iviama uria gave.

³⁰Ro maza ije fu uria fima ije fuje fu e be Godido vua vierafena kuaemo. Ijadufuo Devidi fune izege Godi fu rade ire be fuone rekiro kuaema ije fune vierafei. Ro vua ije Godi fu ijiege kuae, Na asae one ijia e be abega fure uri izege a kini rema ijiege kini rena e boege samuagiakono kuae.

³¹Ijadufuo Godi fu Devidi samadukua kuaramoga fu vierafero Jesu fu una urikiro fu ijiege vierafei. Ijadufuo fu kuae,Godi fube e ije fu kua fu ari ruakono kuaema ije arega fu baromuna vake. Ro kuke vajae fuone fube arega fu mako ijia buraekono kuae.

³²Ijadufuo Godi fune Jesu kuamo fu una urimo e boege none ni nuvuone ijia gae.

³³Godi fu Jesu kuamoga fu una fuone sanaema ijia umui maeneke ijia fikoga fu Kavene Akae fu mako kuaema ije abe mae. Ijadufuo irere ige ja iviama giakinu fievo ije fune Jesure Kavene fuone ije abe no nujaejue.

³⁴Ro e Devidi fune baronei rove fu naebe saove ijia vae. Ro fume kuae,E Ireobo fu e ireobo none kuae, Ni umui none maeneke igia fike na e ani one ke a uniaejaga bure ume igia karina oefuo i meno kuae.

³⁵(null)

³⁶Ijadufuo e Isureroko boegie vua ige fuka mano mukoreigia fiefo. Godi fu Jesu e ije ja karauniadufuo ije kuamo fu ari romoga ja dabe kurosi kanae. Rove Godi fu e ije kuaga iviama fu E Ireobo rena fino kiae.

³⁷Fita fu vua ijiege kuariamoga vua ijare e boeje ijiebuo oe ije fuka ufusei. Ijadufuo buka urina Fitakiro e Afasero gue ije kiae, Erafano No izege rekono kiae?

³⁸Ijadufuo Fita fu una kiae, E besubesu janika ise jone ije ijuegafia areme una oe kuderiafo. Ja ijiege rega e be fu ja ke Jesudo ive ijia do ruoriaga Godi fu ise jone giana arega ja Kavene Akae ije abefo.

³⁹Ijadufuo maeje Godi ire ije fu rekiro kuaema ije fu e boeje ume igia kariva ije jone rekiro kuae. Ijadufuo jaka anafa jone ijiakiro e mumabo kariva ijiakina e ije eranebe Godi fu kumeno ije jaka fuone vano kiae.

⁴⁰Fita fu vua ijiege kuriaekuriaeki soesoena kuariae. Fu kiae, Janika e ije ise revo ijiebuo vame ije mukoreigia akariakina ja joe karaunianamino kiae.

⁴¹Ijadufuo e boeje bu Fitado vua ije fiena ma vierafevoga bu kame do ruoriae. Areme ve ijia e tiri tauseni (3000) bu una e Jesu ma vierafevo ijena mazie.

⁴²Ro maza boeje buka e Afasero ijena besu afuina vua bu nijasiavo ije fiekinu buina goruvevo. Bu ijiege rekinu besu ire ina Godido baname isoekinu ijiege rei.

⁴³Godi fuka e Afasero ije daro miamoga bu uri vame sumiki gue revoga e boeje bu giavo buka oeseradiaro sibaneke jumei.

⁴⁴E ije Jesu ma vierafevo ije buka besu afuina goruvekinu sinuome ivajuonamivo.

⁴⁵Bu uri sinuome buone ke fuaevena moni abena erare isema fino bu gavo ije ifejakinu ijiege revo.

⁴⁶Ro maza boeje bu Godido Are ijia afuikinu ro kuke are buone ijia ire besu ina oemareruvo.

⁴⁷Bu ijiege rekinu Godido oemarega e boeje bu giana vierafero e Jesu ma vierafevo ije buka e maro bu ijiege vierafevo. Ro E Ireobo fu maza besubesu e gue karauniana kaenamiaga bu una e ije ma vierafevo ijena mazieve.