Read Girawa Aposel 3 Bible Online

Aposel 3 - Girawa bible

Aposel 3

¹Areme maza be ve garege vako e bu baname isoevo ijia Fitakiro Joni bu Godido Are ijia vae.

²Ro Godido Are viene be bu kua Viene Irerebarekino kuavo ijia e be dia garema fu ijia fine. Ro e ije maza boeje bu nakusena Godido Are viene ijia nujaga fu ijia fina e ije ruovo ije monifuo sarefiriamo.

³Ijadufuo Fitakiro Joni bu aru vakoga fu giana uri monifuo sarefiriae.

⁴E ije fu ijiege sarefiriamoga bu uri urukeigia veri. Areme Fita fu uri kuae, Eko kame no guono kuamoga fu vierafero bu ire be makuvejoro fuka bu urukeigia veradiae.

⁶Rove Fita fu kuae, Eko nana moni baki. Rove na vierafe na irere ige na abeva ije na abe make. Ijadufuo na Jesu Kuraesi e Nasaretiko ijadufuo ive ijia kuavono ni uri koro vano kuae.

⁷Areme Fita fu uri umui fuone maeneke ijia e ije umui kei. Fu ijiege umui kenoga e ijadufuo diakiro makamato ije fune saroruba una girenamimoga fu uri arire oenoe. Areme fune uri Fitakiro Jonina Are bu baname isoevo ijia aruna oenoekinu kafiana Godido oemarei.

⁹E ije fu ve ijia ijiege remoga e boeje guove ijia kariva ije bu gae. Bu vierafega e ije fu e gafe Godido Are viene bu kua Viene Irerebarekino kuavo ijia fina e monifuo sarefiriamo ijare. Ro fu izege remoga dia fuone fu una marema ije buka naebe mukore vierafei ijadufuo buka ireobo oeseradiae. Fita fu Godido Are ijia vua kuariaema ijene

¹¹Areme e ije fu uri Fitakiro Joni faradiana ijia maninoga e boeje buka oeseradiamoga bu difurisaena e ije gakuae ruae. Ro are ije bu ireva ije bu kua, Soromonido Banadeno kuavo.

¹²Ijadufuo Fita fu uri kiae, E Isureroko gurie ja izerega uri urukeigia veraduove? Jade vierafero e gure no daro nuvuone ijia ro izege no maturaeva ijia no kenujavo fu maemaro jade ijiege vierafevo.

¹³E Jesu fu e ije asaerafa nuvuone e Eburamekiro Aeseki ro e Jekafu ijiebuo Godi ijare sanaema fuone ije abena mae. Rove jare fu dabe e Jiusi ijiebuo e mamekanu ije miae. Areme Faereti fu maza ijia Jesu kenujakuvenoga jaka nidua fuone ijia Jesu ijuemae.

¹⁴Fuje fuka e akae ro e maturae rove jaka fu ijuemae. Ijadufuo ja Faereti kuavo fu Jesu abena e ani ije miamo bu kanagaro e Barabasi e ije ka e kaniamo ije ja arevo fu vae.

¹⁵Ja e ije fu e boeje ijiebuo vame ije bu ma karivako ije amaerima ije ja arekoga bu kanae. Rove Godire kenujamoga fu una urima ije nore Joniki gae.

¹⁶No Jesudo ive ije ma vierafevo ijadufuo no ive ijare e gure dia garema ije kenujae. Ijadufuo fu uri niome jone igifureki oenoeko jane gave.

¹⁷Ro igia fie, e gure na giaga jaka mukore vierafekinu renoevo baki. Ijadufuo ja e mamekanu jone ijena jare Jesu dabe ijiege rei.

¹⁸Godi fu isuibe e ije bu vua fuone vierafena kuaevo ijiebuo itire ijia ijiege kuae, E ije Godi fu kuaga fu ruakuma fuka isejavaekono kuae. Ijadufuo Godi fu arekoga bu ijiege rei.

¹⁹Ijadufuo vame ise jone ja renoejo ije nika arena una Godido roga fure ise jone ije fi korejiafo.

²⁰Ja ijiege rekuva Godi fu kavene jone ifejia bu daro abeke. Areme fu Jesu e ije fu kuaga fu nuvuefuo ruakono kuema ije kuaga fu una ruake.

²¹Ro Jesu fu uria kave gufia fike Godi fu ire boege una iviaeko amaeriga fu ijare una ruake. Ro vua ije fune Godire isuibe e vua fuone vierafena kuaevo ijiebuo itire ijia kuae. Ro kuke e Mosisi fudua fu ijiege kuae,Godi fu e vua fuone fiena e kuariamo be na vareki ije kuaga fu ruake. Ro e ije fu e jone igeko be ijadufuo nika vua irere fu kuariamo ije mukoe fieno kiae.

²³Ro erare fu vua fuone ije naebe mukoe fiena kemo ije fu Godido e ije arena datura fuebe finoega bu rade dabe isekafake.

²⁴Ro irere boeje Jesu fu igia rema ije bune e boeje Godido vua vierafena kuaevo ijiebe kuariae. Ro kuke e Samuerokiro e gue Godido vua vierafena kuaevo bu rade ruaeva ijiebe vua ije kuariae.

²⁵E Godido vua vierafena kuaevo ije bu irere Godi fu rekiro kuaema ije fu ja abero asaerafa jone ijiebuo kuae. Ro Godi e Eburame fu kuaema ije fu ijiege kuae, Nare ijiege nirivado na rade uifari one ijiebuo duvado ijia e boeje ume igia oenoevo ije daro miakono kuae.

²⁶Ijadufuo Godi fu ude Jesu e ije e ifejiamo ije kuamoga fu jone ruae. Godi fu vierafe fu Jesu kuaga fu ro ja ifejiaga ja vame ise jone ije arena una vame ma ijia kari vakiro fu ijadufuo kuamo fu ruae.