Read Girawa Aposel 9 Bible Online

Aposel 9 - Girawa bible

Aposel 9

¹E Firifi fu ijiege renoekoga maza ijia e Soru fuduaku fuka e Jesu ma vierafevo ije kaniakiro renoe. Ijadufuo fu va e zinone ifaejevo ijiebuo e ireobo ije gae.

²Fu gana kuae, Ni fasi be isoena miega na abena va are Damasikasi ijia e Jiusi e mamekanu ije miane. Na miaga bu kie na e bara ro baru Jesudo vame ije nuvenoevo ije reriana toenamia una igia Jerusareme rono kuae.

³Areme Soru fune are Damasikasi vakiro vako ijia saroruba kave gufia sanakoga e Soru fuka nimanimoga fu tuana ume ijia dije. Areme fu ijia nana fieke e be fu kume, Soru, Soru, a irerefuo vame ise ije none remono kumei.

⁵Fu ijiege kumenoga Soru fu una kume, E Ireobo aeje a erareno kumei? Ro fu una kume, Na Jesu e ije a vame ise none remo ijene.

⁶Ijadufuo ni urina are Damasikasi ijia vaga e be ijia fino fu irere a redufuo ijene kuarano kumei.

⁷E Soru fu vua ije fiekoga e ije fuina vako ije budua bu vua ije fie rove e maeje buka naebe gae. Ijadufuo bu vua bino naebe kuae ro bume ijia irei.

⁸Areme Soru fune una urina ni nafae rove ire bino fuka naebe giae ijadufuo bu umui kena mesiri are Damasikasi ijia vae.

⁹E Soru ni fuone fu ijiege iseremoga mu inokubeke irekiro do ije bino fu naebe i.

¹⁰Areme e Damasikasiko be ive fuone Ananaeasi fu Jesu ma vierafemo ije fu ijia fino. E ije fu nimamaena gake E Ireobo fu kume, Ananaeasino kumemo fu una gue kuae, E Ireobo na igifurekino kuae.

¹¹Fu ijiege kuamo E Ireobo fu kuae, Ni kanaufuima areme urina vame bu kua Arirarino kuavo ijia vane. Va e Judasido are ijia kekena e Soru are Tasasiko ije rerena biene. E ije fu Godido baname isoekinu nimamae gake e be ive fuone Ananaeasi fu ro umui fuone ijia vajae fuone ije niriaemo ni fuone fu una nafaemo fu gaemano kuae.

¹³Ro Ananaeasi fu una kuae, E Ireobo, e ije fu e one are Jerusareme kariva ije isema rejiamo.

¹⁴Ro ige fu ruomo ije fu e mamekanu Godido zinone ifaejevo ije kiaga bu oemarekuva fu Damasikasi igia e one a ma vierafevo ije toenamiakiro ruomono kuae.

¹⁵Rove E Ireobo fu una kuae, Ni urina va gane. E ije nare fu noefuo i mekiro na ije abei. Ijadufuo fure ive none ije dabe are irore ijia oenoekinu e kini ijiakina e Jiusi boeje ro e Jiusi baki ije kuariaga bu ive none fie furike.

¹⁶E ije fu e none ijadufuo na kono vame izege fu noefuo isejavaedufuo ije nijaega fu vierafekono kuae.

¹⁷Ijadufuo Ananaeasi fune va are ijia kekena aru umui fuone ijia Soru farena kuae, Soru uviano, na E Ireobo ije a igia ruakiro ruomo vame ijia biema ijare kiemo na ruae. Na ro a ifejaga ni one fu una mareke. Ro kuke a Kavene Akae ije abega fu oe one ijia arina iraraekiro fu ijadufuo kiemo na ruaevano kuae.

¹⁸E Ananaeasi fu ijiege kuarako saroruba ire be kijume gene igeki ijiebe Sorudo niome ijia azoekisa arikoga ni fuone fu ijia una marei. Areme e Soru fu urina manikoga e Ananaeasi fu do ruoramoga fu ire ina una daro abei. E Soru fu Jesudo vua ije e Damasikasiko ije kuariaema ijene Areme e Soru fune maza sibaneke are Damasikasi ijia e Jesu nuvenoejo ijena finoe.

²⁰E Soru ude fu va e Jiusi ijiebuo are bu afuina vua kuaevo ijia aruna e ije vua kuariana kiae, E Jesu ije fu ma Godido farino kiae.

²¹Fu ijiege kuariamoga e boeje bu vua ije fievo buka oeseradiae. Ijadufuo bu una bue kuae, E ije fute e gafe fu sidove Jerusareme ijia e ije bu Jesu ma vierafevo ije kaniamo ijare. Ro ige fu ruaema ije fu e ige toenamiana kaenamia una va e mamekanu Godido zinone ifaejevo Jerusareme kariva ijia vajiakiro ruaemano kuae.

²²Ro e Soru vua fuone fu kuariamo ije fuka ma daroki remoga e boeje are Damasikasi kariva ije bu vua ije fiena ma vierafei. Areme bu ijia vierafero Jesu fune ma Godire kuamo fu ari ruaemaro bu ijiege vierafe. Ro e Jiusi are Damasikasi kariva ije bu izege Sorudo vua ije gue kuarakuva baki.

²³Areme maza sibaneke furikoga e Jiusi ije bune una bue ijunamina e Soru kanakuae vierafe. Ijadufuo buka mumaza sidove ijadufuo viene ijia samua karinoe rove bune e guebe giana ro Soru kuarae. Ijadufuo e Sorudo vua fievo ije bu mauike mugu uri Soru kuavo fu kamui ijia ari fi. Areme bune dabe faere gama abiena kaje ijia farekoga fu ari vakuma gamia kekena fune vae. Soru fu Jerusareme vaema ijene

²⁶Areme e Soru fune vakuma Jerusareme kekena e Jesudo vua fievo ije biediana buina oenoekuvenoga buka jumei. Ijadufuo maeje bu izege fu una e Jesudo vua fiemo be rema ije bu naebe vierafei.

²⁷Rove fu e Banabasire kekena Soru mesirina abe e Afasero ije nijasiae. Fu ijiege rena uri izege E Ireobo fu Damasikasi vame ijia Soru biema ijiakiro vua fu kuaraema ijene kuariae. Areme fune kuke uri izege Soru fu e Damasikasiko ije Jesudo ive ijia vua darokuma kuariaema ije kuariae.

²⁸Ijadufuo Soru fune Jerusareme ijia e Jesudo vua fievo ijena oenoekinu Jesudo vua ije dabe darokuma e ije kuarianoe.

²⁹Soru fu ijiege kuarianoekinu ro e Jiusi ije bu e Guriki ijiebuo isama kuaevo ije buina vua uruvana kuae. Rove e ije buka urina Soru kanakuvejoga e Jesudo vua fievo ije bu gana mesirina are Sesaria ijia vae. Areme bune kuavo fu una are fuone Tasasi ijia vae.

³¹Areme maza ijia e Jesu ma vierafevo bu are Judiakiro Gareri ro Sameria sosi ijia afuivo ije bu una kafaena Godido baname isoekinu karivoga buka e uruvana rei. Bu ijiege renoekoga Godido Kavene fuka daro miamo buka e damuiki revoga bu uri E Ireobo ije mukoreigia aguae. Fita fu e Eniasi amaerimo fu una maema ijene

³²Fita fu e Jesu ma vierafevo bu ae binobino kariva ije ifejianoeno ijia fu maza be are Rida ijia Godido e ije giakiro vae. Fu va ijia kekena e Eniasi bie ro e ije fu vajae garema ijadufuo fu juaevasia eiti (8) fu uri oenoeno baki. Ijadufuo Fita fu uri kuae, Eko Eniasi, Jesu Kuraesi fune a amaeradaemano ni ije a namo ije arena urino kuae. Ijadufuo Eniasi fune migegireigia uri areme una Godido oemarei.

³⁵Areme e boeje are Ridakina Seroni kariva ije bu Godi ire ije fu Eniasido rema ije gae. Ijadufuo bune oe kuderia areme uri zinuevena una E Ireobo ijadufuo vame ijia kenoe.

³⁶Ro bara be Jesudo vua fiemo ive fuone ije Tabita fu are Jofa ijia fino. Ro ive ije e Guriki ijiebuo isama ijia bu kua Dokasino kuavo. Bara ije naenitua fuka vame maeje renoekinu e isema kariva ije ifejiamo.

³⁷Fu ijiege renoeno ijia fu adame abena vakuma baronei. Ijadufuo bu surive fuone dabe do ruorama areme abe gire guove kabo ijia nijae.

³⁸Ro are Rida fu Jofa ivuake ijia ijadufuo e Jesudo vua fievo gue bu fieke Fita fu are Rida ijia oenoeno bu fie. Ijadufuo bu e inokiro kiavo bu Fita mesirikuae vae. Bu vakuma are Rida ijia usiaena Fita kuavo fu migegire urina buina vakuma are Jofa ijia keke. Areme bune Fita mesirina gire guove kabo ijia ajia vae. Bu ajia vagake bara amune boeje bu sinuome bino Dokasire buefuo amaeriaema ije kena una bue nijaenamikinu niraefirive.

⁴⁰Areme Fita fune bara ije kiamo bu usiaekoga fu dakude bara ije baronema ije gakinu augesana Godi baname isoe. Areme fune uri bara ije kuae, Tabita urino kuamoga bara ije fu ni nafaena Fita ga areme fune urina arire fi.

⁴¹Bara ije fu ijiege una uri arire finoga Fita fu ifejana umuike nujamo fu uri arire mani. Areme fu uri bara amune ijiakiro e Godi ma vierafevo ijene kiae, Bara ige fune una urimano kiamoga bara boeje buka oeseradiae.

⁴²Fita fu ijiege remoga vua ije funeka migegireigia ifena vakoga e boeje are Jofa kariva ije bu fie furi. Ijadufuo e boeje buka una oe kuderiana E Ireobo ije ma vierafe.

⁴³Areme Fita fu una maza uruvana e Saemoni e ije fanu surive ijia sinuome amaeriamo ijiaki Jofa ijia finoe.