Read Girawa Rom 16 Bible Online

Rom 16 - Girawa bible

Rom 16

¹Na vierafe naka bara Fibido kuariaga ja vierafeke. Bara ije fu kai nuvuone be fudua Godi ma vierafemo. Ro fu are Senitiria ijia e ije bu Jesu ma vierafevo ijiebuo i meno.

²Na bara ijadufuo kuariaga ja vierafekina fu ijia vuakuma ja fu oemarekinu E Ireobo ijadufuo e igege mesirike. Ro na vierafe ja ire boeje fu vierafedufuo ije jaka oemarekinu ifejake. Ijadufuo maeje bara ije fuka e boeje Jesu ma vierafevo ije ifejiakinu na mukoreigia ifejiemo.

³Ro be ije na bara Firisirakiro baru fuone Akuira ije anadiave. Ijadufuo maeje buje buka naena Jesu Kuraesido imevo ro kuke buka vame ise bu oedufuo ijia noefuo isejavae. Ijadufuo naka buone ireobo oemareve ijadufuo maeje bu na nosukua ifejieva baki. Ro bu kuke e Jiusi baki ije bu besu afuina Godi aroevo ije duaku mukoreigia ifejiae.

⁵Ro na kuke e ije bu besu are buone ijia afuina Godi baname isoevo ijiakiro Efinitasi e ije na fu oetuavo ije anadiave. Ro e Efinitasi ije fure aesakae Esia guove ijia amure Jesu Kuraesi ma vierafei.

⁶Ro kuke na bara Meri anaeve. Ijadufuo maeje fuje fu bara be jaena oenoekinu giriesana joefuo imeno.

⁷Ro na e Eduronaekasikiro e Jiuniasi anadiave. E inokiro ije buka agane none bu ude naena besu dibure kari. Ro e Afasero ijiebuo uve ijia e inokiro ije budua bu Jesudo i mukoreigia mevo ije e bune giana vierafei. Ro kuke bune bure ude Jesu Kuraesi ma vierafekoga naeje na rade ma vierafei.

⁸Ro kuke na Amifiretasi e ije na fu oetuavo ije anaeve. Ro e ije fudua fuka Godido e be.

⁹Ro na e Ebanasi e ije fu noena Jesu Kuraesido imeno ijiakiro e Sitekisi na ireobo oetuavo ije anadiave.

¹⁰Ro kuke na e Aferisi anaeve ijadufuo maeje e ije fu Setanire biesiri rove fuka uria giriesana una Jesu Kuraesi ma vierafei. Ro kuke na e Arisitoburasido agane ije anadiave.

¹¹Ro na e Erodioni anaeve ro e ije no fuosiki no agane besu. Ro kuke na e Nasisido agane ije anadiave ro budua bu E Ireobo ijadufuo e.

¹²Ro kuke na bara Tirifaenakiro bara Tirifosa ije anadiave. Bara inokiro ije bu E Ireobo ijadufuo i mevo. Ro kuke na e Fesisi e ije na oetuavo ije anaeve. E ije fuka e be fu giriesana E Ireobo ijadufuo i menoeno.

¹³Ro na e Rufasi e ije E Ireobo fu umui datema ijiakiro asie fuone ije anadiave. Ijadufuo maeje bara ijare naeje fuka asie none igege samuagie.

¹⁴Ro kuke na e Asinikuritasikiro e Firegonikina e Emisi ro e Fatirobasikiro e Emasi ije anadiave. Ro na e ije Jesu ma vierafevo bu buina afuivo ije anadiave.

¹⁵Ro na e Firorogasikiro bara fuone Juriakina e Neriasikiro maki fuone ije anadiave. Ro kuke na e Orimifasikiro e ije Jesu Kuraesi ma vierafevo bu buina besu afuivo ije anadiave.

¹⁶Ja isekie, ni e ije bu Jesu ma vierafevo ije bu ananamivo ijiege oe jone ijiakuma ananamikinu karifo. Ro e ige Jesu Kuraesi ma vierafevo bu igia besu afuina Godi baname isoevo ije bu ja anadiave. Foru vua radekuma fu e Romuko nijasiaema ijene

¹⁷Ro erafano ja isekie, nika mukoreigia jone samuanamikinu karinoefo. Ijadufuo maeje e ise gue jaena ijia karinoejo ije buka vame jone ja agane besu rena afui karinoejo ije kame atasena binobino renoeve. E ije buka vua maeje ja fieva ije kame arafiriakinu una vua buone kufui ije nijasiave. Ijadufuo ni mukoreigia e ijieki ije giana akariakinu oenoefo.

¹⁸Ijadufuo maeje e ijieki ije bu E Ireobo nuvuone Jesu Kuraesido imevo baki. Ro bume ire ije vajae surive buone bu oemadiavo ije vierafena kenoeve. E ijieki ije buka oenoekinu e ije bu Jesu ma vierafevo baki ije biesiriave. Bu biesiriana vua soesoegi kuariakinu oe buone ije kame kuderiave.

¹⁹Ro igia fie, e boeje Jesu ma vierafevo aesakae irore igia kariva ije bu izege ja Godido vua maeje irinavo ije bune fie furi. Ijadufuo na irere ja revo ijadufuo naka ireobo Godido oemareve. Rove vua ige na isoena kuariavo ije na vierafe jaka vame maeje mukoreigia giana vierafekinu kenoeke. Ro vame ise ije jaka mukoreigia akariakiro na ije vierafei.

²⁰Ro ja ijiege kenoekuva Godi ije maza boeje e ifejiako bu kafaena karinoejo ije fuka ja daro miake. Fu daro miaga jaka uri giriesana Setanido daro ije abe garege akoeke. Ro kuke na vierafe E Ireobo Jesu Kuraesi fuka ma rejiaga ja oemarekinu karinoeke.

²¹Ro Timoti e ije fu nosiki i besu menoeno ijiakiro e agane none e Rusiasikiro e Jesonikina e Sosifata ije bu ja anadiave.

²²Ro e Tetiasi nadua na E Ireobo ijadufuo ive ijia ja anadiave. Ro fasi ige na Forure kuariekoga na isoena ja nijiave.

²³Ro e Gaeasikiro e boeje are fuone ijia afuina Godi baname isoevo ije budua ja anadiave. Ro Foru naeje na e Gaeasido are ijia fivo. Ro kuke Erasitasi e ije sidove ige no kariva ijadufuo moni ije samuamo ije fu ja anadiame. Ro kuke uvia nuvuone be e Kuotasi ije fudua fu ja anadiame.

²⁵Noka Godido oemaredufuo ijadufuo maeje Jesu Kuraesido vua maeje na abena e nijasianoejo ije fu manido fu ja ifejiaga jone ma vierafevo ije fuka gikikimana reke. Isuibe Jesu Kuraesido vua maeje fuka ma sauina na ruae. Ro iviama vua ije fune e Godido vua vierafena kuaevo ijiebe abe kuaena samadirevo none gae. Ro vua ije e karauniadufuo ije fune Godi e ije maza boeje ijia fi vako ijare kuae. Ijadufuo noka vua ije dabe are irore igia kuaena samadirega e boeje buka Godi ma vierafedufuo.

²⁷Ijadufuo roga no Jesu Kuraesi irere fu rema ijadufuo Godi besu ije fu maza boeje ma ijiaru vierafena kenoeno ije aroefo. Ro kuke na vierafe e boeje buka Godido ive sanaema ije dabe maza boeje aroekinu karivake. Fune ijene, Marei!