Read Girawa Rom 4 Bible Online

Rom 4 - Girawa bible

Rom 4

¹Ro ja vierafe asae nuvuone e Eburame fu isuibe Godi ma vierafema ije fu no irere nijasuome?

²E Eburame fu ire ma bino renoemabitie fu ijadufuo aroekaradufuo. Rove na vierafe Godi fuka ma maturae ijadufuo Eburame fu izege nidua fuone ijia aroenamikuma baki.

³Ro bune isuibe Godido buki akae ijia isoena kuae,E Eburame fu Godi ire ma bino fu fuone rekono kuaema ije fuka dabe ma vierafei. Fu Godido vua ije ma vierafema ijadufuo Godi fu Eburame abena una vame fuone maeje ijia nujaemano kuae.

⁴Na vua be bijana kuariako ni fiefo. E be fu izege mujue a mani vajakuma baki ro aneka i fuone be mekuma fu ijadufuo a mani vajadufuo.

⁵Ro una vame izege Godi fu e karauniamo ije bu ire ma bino fuefuo revo fu ijadufuo karauniamo baki. Ro Godi e ise renoejo fu karauniamo ije bu buone izege bu Godi ma vierafevo fu ijiaru giana karauniamo.

⁶Ro vua ijadufuo maeje fune isuibe e Kini Devidire ijiege kuae, Fu erare ire ma bino Godi fu oemaemo ije remo baki. Ro fune e ije erare fu Godi irere fu rekiro kuaema ije ma vierafekuma Godi fu e ije kenujaga fuka oemaredufuo.

⁷Ro Kini Devidi vua ijadufuo maeje fu kuaema ije fu ijiege kuae,Erare fu ise remoga Godi fu gana arema e ije fuka oemaremo. Ro erado ise ije fune Godire okurae ro abe nuriema e ije fudua fuka oemaremo.

⁹Ro vua oemarevo ije e Devidi fu kuaema ije ja izege vierafevo? Jade vierafero Devidi vua ije fu e Jiusi ije bu surive buone kaniaufuna Godido nuga naeva ijiebuo ijiaru kuaemaro jade ijiege vierafevo. Ije fu baki ro vua ije fu e boeje bu nuga nae ro baki ijiebuo foteke kuae. Na ude izege na e Eburamedo kuariaeva ijiege na una kuke kuariako ni fiefo,E Eburame fu Godi ma vierafema ijadufuo Godi fu Eburame kenujana abe vame fuone maeje ijia nujae.

¹⁰Godi fu ude ijiege rekoga Eburame fu rade surive fuone kanaufuna Godido nuga ije nijae. Ro Godi fu Eburame oemarejana kenujaema ije fu nuga fuone ije nijaema ijadufuo kenujaema baki. Ro fuka Godido vua ije fu rade fuone rekiro kuaema ije ma vierafema ijadufuo fu ije kenujae. Ijadufuo erarebe bu Godi ma vierafega fu karauniamo e ijiebe bune ma e Eburamedo uifari.

¹²Ro e Eburame ije fu e Jiusi ije bu surive buone kaniaufuna Godido nuga navo ijiebuo asoe. Ro e Jiusi ije bube vierafero buje bu Godido nuga ije naeva ijadufuo bune ma e Eburamedo uifariro ijiege bube vierafevo. Ro bune buone izege bu Godi ma vierafevo ijia bu una e Eburamedo uifari rei. Godi irere fu rade Eburamedo rekiro kuaema ijene

¹³Godi fu isuibe e Eburamekiro uifari fuone bu rade ruakuvejo ijiebuo fu kuaraema ije fu ijiege kuarae, Na ire boeje aesakae igia naovo ije na kena ja vajiakono kuae. Ro e Eburame fu Godido akae ije mukoreigia iriniaema ijadufuo Godi fu aesakae ige foteke abena uifari fuone ijena bu miaema baki. Ro fune Eburamere Godido vua ije ma vierafema ijadufuo fu Godido nidua ijia fuka maturaemoga Godi fu aesakae foteke ige abe bu miae.

¹⁴Ro e boeje nome Godido akae ijiaru irinana kenoevabitie no izege irere Godi fu vajuoko kuema ije kedufuo? Ijadufuo nome akae ijiaru irinakuva baki ro noka Godi ma vierafeke.

¹⁵Godi fu akae fuone ije ijia naema ijadufuo e boeje buka akae fuone ije iriniadufuo. Ro erare fu akae ije kena tuasekuma Godi fuka e ije kame isekafiake. Ro Godi fu akae ije fu naebe naemabitie e boege ise binobino renoejo ije bu izege ise buone bu renoevo ije mukoreigia giana vierafekuva baki.

¹⁶Ro eranebe bu Jesu ma vierafevo Godi fuka e marejiamo ijadufuo fu e ije karauniana ke vame fuone ma ijia uniamo. Ro ije fu e Jiusi ijiaru ijiege karauniamo baki ro fuka e boege erarebe Godi ma vierafevo fu ije karauniamo. Ijadufuo ni vierafe fune e Eburamere isuibe Godi ma vierafema ijadufuo erare fu iviama ijiege Godi ma vierafemo e ije fu e Eburamedo uifari.

¹⁷Ijadufuo maeje fune Godire isuibe e Eburamedo ijiege kuae,Aeje nane umui datevado are e boeje bu are irore igia karivo ijiebuo asoe rekono kuae. Ijadufuo Godido nidua ijia e Eburame fuje fune ma asoe nuvuone ijadufuo maeje fuka Godi ma vierafei. (Ro Godi ije fuka ma e daroki ro fure e ije oevo ije kiaga bu una urivo. Ro kuke ire boeje no giavo baki ije fure amaeriamo).

¹⁸Godi fu Eburame kuae, Aeje nane umui datevado are e uine uruvana tuanaga bure are irore boege iraraekono kuae. Ijadufuo e Eburame fu Godi ma vierafena maza boeje fuka vua ije Godi fu kuaraema ije vierafenoe. Eburame fune eore rove Godi fu kuae, Bara one fu ame nafega rade uifari one buka ire zuvi gufe a giamo ijiege uruvana rekono kuae. Ijadufuo Eburame fu vua ije dabe oe fuone ijia ma vierafenoe.

¹⁹E Eburame fune ma eore ro kuke bara fuone Sera fudua fune ma barasire. Ijadufuo bu izege una ame be bietena samuakuva baki. Rove e Eburame fuka Godi vua ije fu kuaraema ije dabe oe fuone ijia ma vierafei. Fu vierafero bara fuone Sera fuka ame bietekiro fu ijiege vierafei.

²⁰Ijadufuo fu fuone izege fu ma vierafemo ije fu naebe arei. Ro kuke fu Godi vua ije fu kuaraema ije fu naebe abe kufui igege vierafei. Ijadufuo fuone fu ma vierafemo ije fuka ma gikikimana remoga fu una Godi dabe aroe.

²¹Eburame fu ma vierafero Godi irere fu kuaraema ije fuka rekiro fu ijiege vierafei.

²²Ijadufuo Godi fu fuone izege fu ma vierafemo ijia gana kenujana abe una vame fuone maeje ijia nujae.

²³Ro igia fie, Godi fu e Eburame fuosukua kenujaema baki. Ro fu kuke erarebe bu vierafero Godire E Ireobo nuvuone Jesu fu baronemoga fu kuamo fu una urimaro bu ijiege ma vierafevo ije Godi fu e ije karauniamo.

²⁵Ro Godi fu ise nuvuone no renoejo ijadufuo Jesu abena e ani ije miamo bu kanavo fu baronei. Rove Godi fu Jesu Kuraesi kuamo fu una uri. Fu ijiege una urikina Godi fu no karaunuona ke una vame fuone ma ijia unuodufuo.