Read Girawa Rom 9 Bible Online

Rom 9 - Girawa bible

Rom 9

¹Erafano na vua bedua kuariakuvejo ni fiefo. Naeje na Jesu Kuraesiki besu reva ijadufuo vua irere na kuaevo ije na kufuimevo baki. Ro kuke vua na kuaevo ije fune Kavene Akae ije fu oe none ijia imeno ijare giena vierafema ijadufuo na kufuimevo baki.

²Ijadufuo maeje naeje naka e none Jiusi ijiebuo oefiane ro vajae fiane ireobo abeve.

³Buje buka e none rove bune korubuo Jesu Kuraesi bu ijuemaeva ijadufuo maza rade Godi fuka bu kame isekafiaga bu oeke. Na e none Jiusi ijiebuo oefiane ireobo abevo ijadufuo na vierafero Godi fu na abe isekafiero abe gariebo be nujiega na Jesu Kuraesiki besu na mazieva ije naka arekiro na ije vierafe. Na vierafe Godi fuka na dabe ijiege rega e none bu ijia giena una Godi ma vierafekiro na ije vierafei.

⁴Godi fune isuibe e Jiusi ije kena uniae areme fune fuone sanaema ije abe miae. Areme fu kiae, Jaeje jaka anafa nono kiae. Ro kuke Godi fu buone ireobo oemarema ijadufuo fu akae fuone abe miae. Areme fu vame maeje bu izege fu aroenoedufuo ije nijasia areme fu kuke izege fu ifejiaga bu ma karivadufuo ijene visu kuariae. Godi fu ijiege kuariae rove e Jiusi ije buka naebe fu irinae.

⁵E Jiusi ije buka e anuigi Eburamekina Aeseki ro Jekafu ijiebuo agane ijia uinuvena ruae. Ro kuke Jesu Kuraesi e ije Godi kuamo fu ari ruaema ije fu agane besu ijia uinivena ruae. E Jesu Kuraesi fudua fu Godi ro fure ire boeje samuagiamo. Ijadufuo na vierafe noka maza boeje Jesu Kuraesi dabe aroedufuo. Marei.

⁶Ro Godi irere fu e Jiusi ijiebuo rekiro kuaema ije fu arekuma baki ro fuka reke. Rove e Isureroko gue bu Godido e reva baki. Godi fu isuibe e Eburame ijiege kuae, Na fari one Aeseki daro maga fure e uifari one na kuaraeva ije tuanakono kuae.

⁸Rove e Eburamedo uifari ijia e gue bu Godido anafa rekuva baki. Ro bune e ije Godi fu isuibe bu umui tuaema ijiebe bu ma Eburamedo uifari reke.

⁹Ro Godi vua ije fu Eburame kuaraema ije fu ijiege kuae,Na maza ije na nijaeva ijia una bara Sera kuaga fu ame fari be bietekono kuae.

¹⁰Areme rade e Aesiki fune ubaeremoga fu bara fuone Ribeka abei. Ro rade Ribeka fu ame fari ufariki nafenoga Godi fu Ribeka ijiege kuae, Na vierafe ame one boga e Iso fu una iviene fuone e Jekafu nidoekinu aguaekono kuae. Ro vua ije Godi fu Ribeka kuaraema ije bune isuibe buki akae ijia ijiege isoena kuae,Na vierafe na e Jekafu fuosukua oetuake ro e Iso na ziegafakono kuae. Ro Godi vua ije fu kuaema ije Ribeka fu naebe ame ufariki ije nafema ijia fu ijiege kuae. Ro kuke ame inokiro ije bu naebe korubuo uri vame ma ro ise ije giana vierafeva ijia Godi fu vua ijiege ude buefuo kuae. Ro e Isokiro Jekafu bu ire bino ma reva ijadufuo Godi fu bu umui tuaema baki. Rove fune Godire fuone vierafema ijia fu e besu oetuaga be fu ijia arei.

¹⁴Ijadufuo nobe Godi e ije fu vierafe fuone ijia bu umui tuamo ijadufuo kuake. Ijadufuo maeje fuje fu akaeguekinu remo baki.

¹⁵Ijadufuo maeje Godi fune isuibe e Jekafudo uifari ijiebuo fu e Mosisi kuae,Na e ije erane na vierafeva ije ise buone na giana areke. Ro kuke na e ije erane na vierafeva ije na buone oefiane abekono kuae.

¹⁶Ijadufuo e ije Godi fu umui tuamo ije bu bure buone izege bu mukoe vierafevo ro giriesavo ijia Godi fu bu umui tuamo baki. Ro fune Godire izege fu buone oefiane abeno ijia fu ijiege reme.

¹⁷Ro Godi fu isuibe buki akae bu isoeva ijia fu kini Fero aesakae Ijifiti samuamo ije ijiege kuae,Na a kuaga a kini rekina na daro none ije a nijasiaga e boeje bu ijia gana vierafero naeje naka e darokiro bu ijiege vierafeke. Na ijiege rega e boeje ume igia kariva ije bu ive none dabe kuaenoekinu na aroriekono kuae.

¹⁸Ijadufuo Godi fu fuone vierafema ijia e gue fu giana buone oefiane abekinu ifejiamo. Ro e gue oe buone fu kame gikikimana rega buka totenaminoevo ijadufuo bu Godido vua ije fiena ma vierafevo baki. Godido ziemo ijiakiro fuone ma rejiamo ijene

¹⁹Ro e bino ja una na kieko, Fune Godire vierafe fuone ijia no umui tuakinu no guomemaremono kie. Ro Godi fu ijiege remo ije e ige fu erare Godido vierafe ije ijuonemo baki. Rove e ige bu oenoena ise bino revo ije Godi fu irerefuo ise buone kame mazie giakinu kena bu namiamono kie?

²⁰Rove erafano jaeje jame ema ijadufuo jabe vua ijiege una Godi kuarake. Ro na ire sukore bu ire kiravo ijia bijana kuariako ni vierafefo. Ire sukore fube una e ije fu amaerima ije kuako, A irerefuo na abe ijiege amaeriemano kuake? Sukore fu una ijiege kuarakuma baki.

²¹Ro e ije sukore amaeriamo ije fu sakae besu ijia abena fuone vierafema ijia sukore inokiro amaeriake. Sukore be fu amaerikina bu maza boeje ijia ire kira ike. Ro sukore be fu amaerikina bu maza mamekanu ijia abe ire kirake.

²²Ijadufuo vame besu ijiege Godi fudua fu e ije sukore amaeriamo ijiege remo. Fu fuone vierafema ijia fina e Jiusi ije kena vame binobino buone rei. Ijadufuo Godi fu fuone vierafema ijia e ije ise revo ije fu ijuonei. Ro kuke e ije bu ise rega fu kame isekafiaema ije fu daro fuone dabe e boege nijasiae. Ijadufuo erarebe bu Godido nidua ijia ise renoevo ije fuka defaruimo ijadufuo fu kame isekafiamo. Rove fu ijiege remo baki ro fume uria kafiana mauike buina finoe.

²³Ro Godi fu e ije bu ise reva ije fu kafiana mauike buina fima ijadufuo maeje fu vierafe fu fuone izege fu e marejiamo ije dabe e Jiusi ije miakiro fu ijadufuo ijiege rei. Ro kuke fu vierafe fuka fuone sanaema ije abena e ige no fu isuibe umui tuaema ije muokiro fu ijiege vierafe. Ro kuke fu vierafe fuka nuvuefuo oefiane abena fuone sanaema ije abe muokiro fu ijadufuo noena mauike fine.

²⁴Ro Godi vame ije fu remo ije fu e ige no fu umui tuaema ije nuvuone reme. Ro vame ije fu e Jiusi ijiaru ijiege remo baki. Ro fu kuke e Jiusi baki ige nodua ijiege reme.

²⁵Ro isuibe e Osia buki fu isoema ijia Godi fu vua be ijiege kuaruomo fu isoe,Na e ije bu naebe e none reva ije na kiaga bu una e none reke. Ro na e ije na naebe bu oetuaeva ije na kiako na ja oetuavono kiake.

²⁶Ro kuke buki besu ijia Godi fu e Jiusi baki ije kia,Jaja e none bakino kiaema ije fu una kiako, Jaeje ja Godi ije maza boeje ijia fivako ijadufuo anafano kiae.

²⁷Ro kuke buki Asaea ijia Godi fu kuke e Isureroko ijiebuo ijiege kuae,E Jiusi are Isurero ijia kariva ije buka ire ajare bu davo baki ijiege uruvana reke. Rove bu e sibaneke ijiaru bu Godi ma vierafega fu karauniake.

²⁸Ro maza ije fune ivuareme ijadufuo fu e boeje ise revo ije fu kame isekafiakono kuae.

²⁹Ro kuke e Asaea fu vua be ijiege kuae,Godi e Daroki ije fu naebe uifari nuvuone gue kafiabitie noeje fune izege fu e Sodomekiro Gomorako fu foteke kaniaema ijiege nodua kanuomo none oe furivano kuae.

³⁰Ijadufuo none gae, ude e Jiusi baki ije bu Godi izege fu e karauniana kaenamia una vame fuone maeje ijia uniamo ije bu naebe rerena gae. Rove iviama ijare vame ije bune gae. Ijadufuo maeje bu ma vierafega Jesu fu ise buone ijadufuo baronei. Ijadufuo Godi fu Jesudo duvado ijia bu karauniana ke una vame fuone maeje ijia uniame.

³¹Ro e Jiusi ije bu ude Godido vame maeje abekuae giriesaeva ije bu naebe abei. Ijadufuo maeje bu Godido Akae ije bu naebe mukoreigia iriniae.

³²Bu Godido vame maeje bu naebe abeva ijadufuo maeje bu naebe Godi ma vierafei. Bu vierafero bu Mosisido akae ije mukoreigia iriniavo ijadufuo Godi fu buone oemarekiro bu ijiege vierafei. Bu ijiege vierafekinu renoejo ijadufuo Godi fu buki akae ijia Jesudo ijiege kuae,

³³Na are Jerusareme ijia e be abena tugie igege ruabieve. Ro tugie ije fu manino ije e boeje bu dia kame ijia nizukuva buka ari kaniake. Ro erare fu tugie ije ma vierafekuma e ije maza rade fube oefiane abekono kuae.