Read Girawa 2 Korin 8 Bible Online

2 Korin 8 - Girawa bible

2 Korin 8

¹Erafano igie no izege Godi fu are Mesedonia guove ijia e ije fu ma vierafevo bu sosi ijia afuina imevo ije marejiana ifejiako bu imenoevo no ije kuariako ni fiefo.

²E ije buka ma isejavaena ruae rove Godi fuka bu ma rejiamo ijadufuo buka oemarekinu imeve. Buka e sinuome baki rove buka korobuo oemarekinu vekinu moni buone ka mamekanu ije gue karana no ivajue. Bu moni buone bu imena abevo ije buka asina ajia ado gafa ijia ivajue. Ro ije bu reva ije bu e binobe kiavo bu reva baki ro bume korobuo vierafe buone ijia ijiege rei.

⁴Buka no soesoena kuo bu vierafe buka e sinuome baki are Judia ijia karina Godi ma vierafevo ije ifejiakono kue.

⁵Bu ijiege kuarue rove buka irere no vierafeva ije bu ma asiduona gafa rei. Ro ire amure ije buka korobuo kena una zinone igege Godi vajae. Areme bu kuae, Godi fu vierafe noka vua irere ja nijasueva ije iriniana kenoekono kuae.

⁶Ro vame ije moni karana e sinuome baki ije vajiadufuo ije fu e Taetasire are Koriniti ijia jaena zinuive. Ijadufuo no soesoena kuaga fure korufuo vua ijia vame maeje fu zinuivema ije ifejiaga ja rena furidufuo.

⁷Ro jaeje ja vame binobino ja renoevo ije jaka mukoreigia vierafekinu renoeve. Jaka vame ije Godi ma vierafevo ijiakiro Godido vua kuaevo ijiakina jone izege ja vierafena renoejo ijia jaka daro ireobo abei. Ro kuke vame maeje izege ja oe jone ijiakuma e ifejiavo ijiakiro jone ja no oetuavo ije buka biona mamekanu reve. Ijadufuo no kuke soesoena kiavono ni vame izege ja moni ivajuonamivo ijia nika maza boeje ijiege mukoreigia renoefo.

⁸Ro igia fie, na akae nijana kia jaka e ifejiano kiavo baki. Ro name izege e Godi ma vierafevo are Mesedonia ijia kariva ijiebe e ifejiavo na ije nijasiave. Ro kuke name jone izege ja e oetuavo ije fute ma na ije gakiro rei.

⁹Ja E Ireobo nuvuone Jesu Kuraesi fu izege ja ma rejiamo ije jane vierafei. Ro kuke fuje fu Godido are ije sanaema ijia fuka ire boeje zarae. Rove fu ijia arena una nuvuefuo ume igia arina e sinuome baki rema ije jane vierafei. Jesu Kuraesi fu vierafero fu ijiege rekina ja una Godido e rena vame fuone maeje abekiro fu ijadufuo ijiege rei.

¹⁰Ro na vierafe jaka ige na kuariakuvejo ijiege redufuo. Ja juaevasia furima ijia jaka jare amure e ifejiakuae vierafena moni kanafui. Ijadufuo ni moni ije ja kanafuiva ubine ije kari furifo. Ijadufuo ni urina vua ije ja ude kuae no e ifejiakono kuaeva ijene ka rena moni ije ja naeva ijene karifo.

¹²Ja ire bino e vajiakuae vierafekuva ije nika kena vajiaga Godi fu oemarefo. Ro ja ire bino bakikuva ije ni arefo. Ijadufuo maeje Godi fume ire ije jane naeva fu ijiaru vierafei.

¹³No vierafe e ije bu ire ije ja vajiaeva ije kena bu una e sinuome zaraeva rekiro jaeje ja e sinuome baki redufuo no naebe ijiege vierafe. Ro no vierafe irere boeje ja revo ije jaka buina besu enafu karinokuae no ije vierafei.

¹⁴Ja iviama sinuome ije ja zaraeva ijia e vasiaki ije ifejiadufuo ije funeka mani. Ja ijiege ifejiaekina maza rade bu ire bino zaraekuva buse una ire bino ja vierafekuva bu ifejiana ivajiadufuo. Ja ijiege rekuva ja buina besu sinuome enafu kedufuo.

¹⁵Ro vua ijadufuo ije bune isuibe Godido buki akae ijia isoena ijiege kuae,E ije erare fu ire uruvana kemo ije fuje fune sibane mani. Ro e ije erare fu ire sibaneke kemo ije fudua fune mani. Ro vua ijadufuo maeje ijeja, e ije erare fu ire uruvana kemo ije fuka maza boeje e ivajiamo. Ijadufuo ire fuone ije fune sibane mani. Ro erare fu maza boeje naebe ire karimo ije fuje bu e binobe ire vajavo ijadufuo ire fuone fune sibane manimano kuae. Ijadufuo roga no vame besu ijiege nuvuone ifenamikinu karikina noka besu enafuna karidufuo. Bu Taetasi kuavo fu are Koriniti ijia vaema ijene

¹⁶Ro noka Godido ireobo oemareve ijadufuo maeje fu Taetasido oe ijia izege nore vierafeva ijiege vierafejamo fu ja mukoreigia oetuana ifejiakiro vierafe.

¹⁷Ijadufuo maeje fu ijia ja giake vuadufuo vua ije no kuaravoga fuka ireobo oemarena abe mare. Ro fune ude oe fuone ijia una vua ja ifejiakiro vierafe ijadufuo no kuavo fuka oemarei.

¹⁸Ro fu vuako ijia no e be fu Godi ma vierafemo jane vierafeva ije kuaga fu fuosiki vuake. E ije fuka Godi ma vierafekinu vua fuone maeje dabe sosi binobino ijia mukoreigia kuaenoeno. Ijadufuo e Godi ma vierafevo igia kariva ije bu fu ma vierafena aguaevo.

¹⁹Ijadufuo bu kua, Ani Forukiro e fuina oenoejo ije ifejiana buina moni ije no e sinuome baki are Jerusareme kariva ije naejiaeva ije kena va vajiano kuae. Fu moni ije kari va vajiaga e gue bu ijia giana vierafero no e sinuome baki are Jerusareme ijia karijo ije ifejiavoro bu ijiege vierafeke. Ro kuke bu vierafero irere no revo ije no E Ireobo ije aroevoro bu ijiege vierafedufuo.

²⁰Ijadufuo noka buina i ije mena moni ije mukoreigia samuakinu e ifejiake. No ijiege rekina e bino bube kuaeko no moni dabe isema imekinu gue no iniemevano kuaeke.

²¹No vierafe noka Godikiro e boeje ijiebuo nidua ijia vame ma ijiaru renoega bu giakuae no ije vierafei.

²²Ijadufuo no kuke kai nuvuone bedua kuaga fu buina vuake. No fuje noka dabe vame binobino ijia biesirina gae rove fuka maza boeje oemarekinu e ifejiakiro vierafei. Ro iviama fune ja ma vierafe ijadufuo fu ireobo ja ifejiakiro vierafe.

²³Ro e kai none Taetasi fu nosiki besu imekinu ja ifejiamo. Ro e inokiro kairafa nuvuone bu fuina vuako ije budua bu e Godi ma vierafevo igia kariva ijiebe bu kega bu buone akaegue ijia vuake. Ijadufuo e gue bu ije giakuva buka una Jesu Kuraesi dabe aroeke.

²⁴Ijadufuo ni jone izege ja e oetuavo ijene una e ije vuako ije nijasiaga e Godi ma vierafevo bu ijia giana vierafedufuo. Bu vierafero no joefuo aroekaravo ije no ma ijadufuo aroekaravo bu ijiege vierafeke.