Read Girawa Kolosi 4 Bible Online

Kolosi 4 - Girawa bible

Kolosi 4

¹Ro e ije ja e mamekanu reva ije jade e ije bu joefuo monifuo imejo baki ije vua gikikimana kuariavo. Ro nime oe dasuna vame ma ijiaru buefuo renoefo. Ijadufuo maeje jane vierafe irere boeje ja renoevo ije ja rade E Ireobo saove gufia fino ije kuaradufuo. Maza boeje baname isoedufuo ijene

²Ro maza boeje baname jone ja isoenoevo ije jade mamoena arevo. Ro nika uri ni nafaena rerekinu baname isoena Godi oemarejakinu oenoefo.

³Ro ni baname jone ja isoevo ijia nuvuefuo baname isoega Godi fu vame nuvuone samadirejuoga no vua fuone abe e kuariake. Ro kuke fu ifejuoga no Kuraesido vua maeje nuriete namo ijene mukoreigia vierafena kuaenoeke. Ro igia fie, naeje na Godido vua maeje abena e kuaenoejo ijadufuo bu dabe dibure igia nujie.

⁴Ijadufuo ja ijiege noefuo baname isoega na vua maeje dabe samadukua e kuariaga bu fiedufuo. Ro na vierafega Godi fune na umui datema ijadufuo na vua fuone maeje abena e kuarianoeke.

⁵Ro ja e ije bu vua maeje naebe ma vierafevo ijena ire binobino renoekuva ni mukoreigia vierafekinu renoefo. Ro ja Godi ma vierafevo ijadufuo ni maza jone ije kena mukoreigia samuana imekinu e boeje Godido vua maeje nijasiafo.

⁶Ro ire soru ije no abena ire sana ivone mariene fuone fuka mukore remo. Ijadufuo ni vame besu ijiege vua jone ja kuaevo ijia ni sone oe vafaena oetuakinu kuariaga vua jone fu soru igege refo. Ja ijiege rekuva bu oemarekinu maza boeje vua jone fieke. Ro bu duna binobino kiakuva ja manido ja una vua maeje mukoreigia vierafena kuariake. Foru fu vua radekuma ije anadiaema ijene

⁷Ro vua none boeje fu e Tisikasire vuakuma fu ijia sone kuariake. Tisikasi fu kai nuvuone ma be no oetuavo. Ro fuka maza boeje ijuoebaki rena E Ireobo ijadufuo imeno.

⁸Ijadufuo na fu kuaga fu vua ijia izege no igia kariva ijene kuariaga ja fiena oemareke.

⁹Ro fu vuakuma fu Onesimasi e kai nuvuone no oetuavo fuka ijuoebaki imenoeno ijiaki vuake. Ro e ije fuka jaena besu Godi ma vierafemo. Ijadufuo bu buobiki vuako ije bure irere igia no revo ije kuariake.

¹⁰Ro Arisitasi e ije fu nosiki dibure fino ije fu ja anadiae. Ro kuke e Maki e Banabasido vienefuo ije fu ja anadiae. Ro fu ijia vuakuma ni oemarekinu samuafo ijadufuo maeje na fuesina nane ude fasi isoena kuariae.

¹¹Ro kuke Josua e ije bu kua Jasitasino kuavo ije fudua fu ja anadiae. E inokubeke ije budua bu e Jiusi ro bu buosukua Kuraesi ma vierafeva ijadufuo bu naena imevo. E ije bu na ifejiena Godido vua maeje dabe e boeje kuariakinu kaenamiako bu una Jesudo e reve.

¹²Ro kuke e jone be Efafurasi e ije Jesu Kuraesido imeno ije fudua fu ja anadiae. E ije fu vierafe fuka maza boeje joefuo isejavaekinu baname isoena Godi kuara fu ja ifejiaga ja e damuiki rena darokuma karikiro fu ijiege remo. Ro kuke fu Godi kuaraga fu oe jone kena kuderiaga ja maza boeje irere fu vierafema ije irinana nuvekiro fu ijiege remo.

¹³Ro vua ige na e Efafurasi fu izege Godido vua maeje abena jakina e ije are Reodisiakiro Aeraforasi kariva ije daromena nijasiaema na ijene kuariave.

¹⁴Ro kuke Ruki e ije e adagi samuagiamo no ireobo oetuavo ijiakiro e Dimasi bu ja anadiave.

¹⁵Ro e ije Godi ma vierafevo bu are Reodisia ijia karivo ije abero bara Nimifakina e Godi ma vierafevo are fuone ijia besu afuivo ije no bu anadiave.

¹⁶Ja fasi ige dama furikuma ni kuke abena una e Reodisiakobuo are guove bu ijia afuina Godido baname isoevo ijia daga bu fiefo. Ro kuke e Reodisiako bu fasi isoena ja nijiakuva ni ije dua abena ijia dafo.

¹⁷Ro ni e Akifasi kuaga fu i ije E Ireobo fu maema fu meno ije mukoreigia mena vakuma furifo.

¹⁸Ro fasi ige e anadiaeva ije Foru nare umui none igia isoe. Ro naeje na uria dibure ige fivo ijadufuo jade na totevo. Ro vua none radekuma ijeja na vierafe Godi fuka maza boeje ja marejiakinu samuagiadufuo.