Read Girawa 2 Timoti 1 Bible Online

2 Timoti 1 - Girawa bible

2 Timoti 1

¹Timoti farino, na Foru e ije na Godire fuone vierafema ijia kiega na Afasero rena Jesu Kuraesido vua maeje nijasianoejo ije nare fasi ige isoe nijave. Ro vua ige na kuaravo ije na izege no rade Jesu Kuraesina besu rena ma karivadufuo na ije kuariave.

²Ro Timoti farino na a oetuavo ijadufuo na baname isoega Godi Asoe ijiakiro Jesu Kuraesi E Ireobo nuvuone ije bu maza boeje one oefiane abekinu ma rejana mukoreigia samuagaga a kafaena finoedufuo. Foru fu Timoti fuka ma vierafekinu Godido imedufuo kuaraema ijene

³Ro Timoti na baname none na mumaza isoevo ije naka a vierafekinu Godido baname isoena oemarevo. Naka asaerafa none izege bu reva nadua nane ijiege oe none ijia mukoreigia vierafekinu fuefuo imenoeve.

⁴Ro maza ije na a nujana vakoga a nimeno nido one fu arima ije nane vierafei ijadufuo na maza boeje naka a gakiro vierafe. Ijadufuo na una vua a gakuva na vierafe naka ma ireobo oemadiedufuo.

⁵Na vierafega one izege a ma vierafemo ije fuka asae one Roesikiro asie one Jiunesi bu ma vierafeva ijiege na vierafega adua ane besu ijiege ma vierafeme.

⁶Ijadufuo na una kuaraga a daro ije Godi fu maza ije na umui nigofo nijakoga fume vekinu maema ije abena darokuma imedufuo.

⁷Ijadufuo maeje Godi Kavene fuone fu vajuema ije no jumedufuo fu ije vajuema baki. Ro fuka Kavene daroki ije vajue ijadufuo no uri giriesana daromena e boeje oetuana ifejiakinu ro konuvuo mukoe samuanamidufuo ijene vajue.

⁸Ijadufuo ade E Ireobo nuvuone ijadufuo vua ije fu e boeje ifejiana karauniamo ije kuariakiro jaevemo. Ro kuke ade ige na fuefuo imevo ijadufuo na dibure fivo ijadufuo jaevemo. Ro anika izege na Godido vua ije na kuaevo ijadufuo isejavaevo ijiege adua isejavaene. Ro a ijiege isejavaekuva Godi fu daro maga a giriesana renoedufuo.

⁹Ijadufuo maeje fure no karaunuona kumenoga no e akae rena karinoeve. Ro no nore ire ma bino revoga fu ijadufuo no kumema baki ro fume fure fuone vierafema ijia ro fuone maeje fu no vajuomo ijia no kumei. Ro fuone maeje fu no vajuema ije fune uria iko zinume ijia Jesudo duvado ijia vajue.

¹⁰Ro fuone izege fu no marejuema ije fune Jesu Kuraesi e ije fu no karaunuokiro ruaema ijare iviama abena samadire. Ro fune Jesure oevo ijadufuo daro ije abe akoe areme Godido vua maeje nome sanaema ijia karivadufuo ije abe nijasue.

¹¹Ro Godi fune na umui date areme daro mie ijadufuo na vua fuone maeje abe e boeje kuariana nijasiakinu kaenamiaga bu Godido e reve.

¹²Ro na vua fuone ma dabe ijiege kuarianoevo ijadufuo naka vame binobino isejavaeve. Ro na vajae fiane ige na abevo ijadufuo nabe jaeveke. Ijadufuo maeje na Jesu Kuraesi e ije na ma vierafevo ije nane vierafei. Ijadufuo na vierafe fu korofuo i ige fu miega na menoevo ije ka mukoreigia samuana vakuma maza rade fu una ruake.

¹³Ijadufuo ni vua maeje na nijasavo a fiema ijene kena mukoreigia faradiana samuagiane. Ro kuke giriesana Godi ma vierafekinu e boeje oetuane. Ijadufuo maeje no Jesu Kuraesina besu revo ijia no ire inokiro ije kevo.

¹⁴Ijadufuo ni vua maeje Godi fu nijasaema ije Kavene Akae ijadufuo daro ijia kena mukoreigia samuagiane.

¹⁵Ro ane vierafe e boeje Godi ma vierafevo Esia guove ijia kariva ijiakina e Faejerasikina Emogenisi ije na bune ijuonena vae.

¹⁶Rove na vierafe E Ireobo ije fu e Onesiforasido agane boeje fuka ma rejiake. Ijadufuo maeje fu iseko fuka maza boeje na isejavaevo ijia ifejie. Ro kuke fu ige na dibure fivo ije fuka naebe giena jaeve.

¹⁷Ro fuka Romu kekena vajae fiaeguma na reriena vuakuma biedie.

¹⁸Ijadufuo na vierafe naka fu iseko fuefuo baname isoega E Ireobo fu maza ije fu una ruomo ijia e ije fuone oefiane abena ma rejadufuo. Ijadufuo maeje a izege fu are Efesasi ijia na ifejiema ije ane mukoreigia vierafei.