Read Girawa Taitas 2 Bible Online

Taitas 2 - Girawa bible

Taitas 2

¹Ro Taetasi, aeje anika Godido vua ije no nijasaeva ije e boeje nijasiane.

²Ro a e maki ije nijasiakuma ni kiaga bu e maki igege vua maeje bu fievo ijiaru nuvediana kenoedufuo. Ro buka korubuo vajaema ro vierafe buone bu kenoejo ije mukoreigia samuanamike. Ro ka giriesana Kuraesi ma vierafekinu ro e gue oetuakinu ro giriesana irufui binobino bu buone ruovo ije biediadufuo.

³Ro kuke ni bara maki ije kuariaga buka bara akae igege kenoedufuo. Ro bube va kairafa guena karina una kairafa guebuo vua kuaekinu ro do kugi inoejo. Ro bunika vame ma ijiaru kenoekinu bara nikaki ije nijasianoedufuo.

⁴Bu ijiege rekina bure urina bara ije iviama baru maniavo ije nijasiana kuariaga bu barurafa buone ijiakina anafa buone ije mukoreigia oetuana samuagiake.

⁵Ro buka korubuo vajae buone ije samuakinu ro oe buone ijia ire ma ijiaru vierafenoeke. Ro buka bara bino bu are buone ije mukoe samuagiavo ijiege rena barurafa buone ije iriniakinu ro bara vajuki reke. Bu ijiege renoega e bu ijia giana bube una Godido vua maeje ijadufuo vua ise bino kuaeke.

⁶Ro kuke ni vame besu ijiege e nikaki ije ejafiana kuariaekina budua buka vame buone bu kenoejo ijia mukoreigia samuanamidufuo.

⁷Ro kuke adua anika ire boeje a renoeno ijia mukoreigia renoekinu ro vame ma ijiaru nijasiaekina e gue bu ijia fiekinu ro giana uri ijia nuvedadufuo. Ro vua one boeje a e gue nijasiamo ijia ade kena varane igege vierafemo ro nika ma vierafena darokuma nijasiane.

⁸Ro kuke anika vua ma ijiaru kuaenoega e ani bube una vua ise bino vua ije no nijasiavo ijadufuo kuaeke.

⁹Ro e ije Godi ma vierafevo eranebe bu moni baki imenoevo ije nijasiaga bu i boeje bu menoevo ije buka e mamekanu buone bu oemadiadufuo ijia imenoekinu bu aguariake. Ro bube una vua bino ve gue kuariavo.

¹⁰Ro ire bino bube iniemekiro buka e ijuebaki rena i buone menoega e mamekanu ije bu giana bu ma vierafeke. Bu vame ijiege kenoekina e boeje bu ijia giana una Godi nuvuone fu no karaunuema ijadufuo vua ije oemarekinu fiedufuo.

¹¹Ijadufuo maeje Godido ma rejiamo ije fu abe Kuraesido duvado ijia bu karauniakiro e boege are irore igia karinoeva ije samadirejiae.

¹²Ijadufuo no ijia Godi fu izege e boegiebuo oefiane abena ma rejiakinu ifejiaema ije gave. No ire ije fu rema ije ga areme una ise nuvuone ijuegafiana ume igadufuo ise ije fu no uti faraduomo ije are usiaena sanaema fuone ijia vake. Noka uri konuvuo mukoreigia samuanamikinu ro vame maeje Godi fu oemaemo ijia kenoedufuo.

¹³No ijiege renoekinu maza ije oemarevo ije no abekuae vierafevo ije samua karike. Ro maza ije Jesu Kuraesi Godi nuvuone ije fu ise nuvuone ijia karaunuema ijadufuo sanaema ije fu roga no gake.

¹⁴Jesu fuka korofuo abena miamoga bu abena kurosi ijia kanae. Ijadufuo fure ise nuvuone no revo ijia karaunue. Ro fu vierafe fu no kena amaeraduoga no maturaekina no e fuone rena maza boeje vame ma ijiaru kenoekuae vierafedufuo.

¹⁵Ro Taetasi, anika vua ige na isoena kuaravo ije e boeje nijasiaga bu ijia kenoedufuo. Ro a nijasiakuma nika daromena ejafiaga bu vame ma ijiaru kenoene. Ro vame ise buone bu kenoejo ije nika kuriaerekiro ade mamoega e bu a nese gavo.