Read Girawa Jems 1 Bible Online

Jems 1 - Girawa bible

Jems 1

¹Fasi ige e Jemisi nare isoena Godido e boeje ja aesakae igia giegisa karinoeva ije nijiana anadiave. Ro naeje na Godikiro E Ireobo Jesu Kuraesi ijiebuo imenoevo. Ma vierafena kevo ije fu Godido ruomo ijene

²Erafano erare ire ise binobino ja fake rega ja isejavaekuva nika oemarekinu oenoefo.

³Ijadufuo maeje ire ise ije buka jone ruake rove jone ja ma vierafevo ijare ifejiakuma ja giriesana oenoeke.

⁴Ijadufuo jone ja ma vierafevo ijia jade mamoevo. Ja ijiege renoekina ja uri e damuiki rena mukoreigia maturaena kenoeke.

⁵Ro eranebe bu uria totenamikinu kenoevo ije nika baname isoena Godi kuaga fu ifejiaga ja ma vierafena kenoeke. Ijadufuo maeje Godi fu e ziegafiamo baki ro fuka e boeje oetuakinu ifejiamo.

⁶Ro ja Godi kuarakuva nika oe one ijiakuma ma vierafena kuarakiro jade uri fu kuarakuae zazaeki abejo. Ijadufuo maeje erare fu ijiege zazaemo ije fu do ije fu firana munuage ado ijia fujareameno ijiege renoeme.

⁷Ro erare fu ijiege renoeno ije fude vierafero E Ireobo fuka ifejakiro ijiege vierafemo. Ijadufuo maeje e ije fu irere fu renoeno ije fu naebe mukore vierafemo. Ro kuke vame fuone fu kenoeno ije fuka zazaenoeno. E sinuome baki ijiakiro sinuome zaraema ijiebuo vua ijene

⁹Godi fu e ije erare sinuome naebe zaraema ije ifejana ire bino vajakinu abe aroekuma e ije nika oemarene. Ro Godi fu e ije sinuome zaraema ijadufuo sinuome ije una kekuma e ije nika oemarene. Ijadufuo maeje e ije sinuome zaraema ije fu ire kusare ije fu irasenaro rade fu maza kanaga fu una saeremo ijieki. Fu maza aokube ijia sinuome ije ke nana fivakuma ro fu baronemo ijia sinuome fuone ije fune ijia arena vake. Vame ise ije bu nuvuone ruovo ije no izege redufuo ijene

¹²Ro erare fu ire irufui bino bu fuone ruoga fu naebe mamoemo e ije iviama nika oemarekinu oenoene. Ijadufuo maeje ire ije bume fu biesiri rove fu uria giriesana ma vierafekinu oenoe. Ijadufuo rade Godi fu e ijieki ije bu fu mukore oetuamo ije kiaga bu vame ma karivako ije fu miako kiaema ije abeke.

¹³Ro ire ise bino bu e be biesirikuva e ije fude kuaeko, Ise ige fu Godire na biesiriemo kuaeke.

¹⁴Ijadufuo maeje ise ije bu e ige nore konuvuo vierafena renoeve. No ire ise ije kame oe nuvuone ijia urukeigia vierafenoevo fu ijare oe nuvuone kame kuderiaga no ise renoeve. No ise ije renoevo ijadufuo ise nuvuone ijiebe kavene nuvuone ije buneka mukore kaniaga bu oeve.

¹⁶Ijadufuo erafano jade vierafero ire ise ije bu Godire kiaga bu ruovoro ijiege vierafevo.

¹⁷Ijadufuo maeje ire boeje Godi fu vajuomo ije buka ma ijiaru. Ro ire maeje boeje fuka e ije saove gufe sanaema ije amaerima ijare kena no vajuome. Fu maza boeje fuka ijiege remo ro fu no ijuegafuona vakoke no titutema ijia karinoevo baki.

¹⁸Godi fune fuone vierafema ijia fu vua fuone maeje ijadufuo duvado ijia no kena amaeraduomo none una anafa fuone rei. Fu ijiege rekina noka ire boeje fu amaeriaema ijiebuo uve ijia no anafa fuone amure rekiro fu ijadufuo ijiege rei. Godido vua ije fiena kenoevo ijene

¹⁹Ro uviarafano vua ige mukoreigia fiefo. E boeje ja oenoene e bu vua kuaevo ije nika migegire fiefo. Ro jade una migegire gue kuariakinu ro zievo.

²⁰Ijadufuo maeje erare fu migegire zienoeno e ije fu vame maeje Godi fu vierafema ijia renoeno baki.

²¹Ijadufuo ni koejo mukoreigia samuanamikinu ire isekuma binobino jare vierafena renoejo ije arefo. Ro nika oe jone boeje ijiakuma Godido vua ije fu abena oe jone ijia oema ije vierafekinu oenoefo. Ja ijiege rekuva vua ije oe jone ijia tavuamo ije fuka rade ja karauniake.

²²Ro ja vua fuone ije ja fienaro naebe abe mimatana kenoekuva ije jaka kojo jone arafiranamive.

²³Erare fu Godido vua maeje fienaro naebe mimata kenoeno e ije fuka korufuo bivare ijia ganamimo ijieki.

²⁴Fu bivare ijia nikubae fuone ganami ro rade fu bivare ije arena vakuma nikubae fuone fuka migegire toteke.

²⁵Ro erare fu vua ije Godi fu e boeje no karaunuokiro kuaema ije mukoreigia fiena naebe tote ro fu maza boeje vierafekinu mimatana kenoeno ije Godire daro maga fu vame maeje kenoedufuo.

²⁶Ro e be fu vierafero fuje fu maza boeje Godi ma vierafemoro fu ijiege vierafe. Rove itire fuone ijia fuka uria vua ise boeje kuaenoeno e ije fuka Godi ma vierafemo baki. Ro fuka korufuo arafiranamime.

²⁷Ro Godi Asoe nuvuone fu vierafema ije ijiege. E ije Godi ma vierafemo ije fuka ame ije asieasoe baki ije ro bara amune ije isejavaevo ije samuagiake. Ro kuke e ije fuka ume igadufuo ire ise bu fu arafirikuvejo ijia mukoreigia akariadufuo.