Read Girawa 2 Pita 3 Bible Online

2 Pita 3 - Girawa bible

2 Pita 3

¹E kairafa none maegie, fasi ige na ririkua ije una isoena ja nijiave. Fasi inokiro ije na vua ijene kuariaga ja vierafekina ja vame maeje ijiaru urari kenoedufuo.

²Na ja ejafiana kuariaga ja vua ije e akae Godido vua vierafena kuaevo bu kuariaeva ijiakiro e Afasero bu E Ireobo Jesu Kuraesi e ije e karauniamo ijadufuo vua ije bu kuariaeva ije mukoreigia vierafedufuo.

³Ro vua amure ije igene. Maza radekuma ijia e bino ume igia ise ijare samuagiako bu ire binobino vajaema ije oemaedufuo renoejo ije bu ruadufuo. Bure usiaena ja kame varaemekinu kisiadufuo. Bu kiako, E Ireobo jone fu rade una ruakono kiaema ije fu iziebureki ruaemano kiake? Isuibe asaerafa nuvuone bune oena mako igia naove rove bu naebe una uri. Ro kuke ire boeje bu uria iko zinume ijia bu naovo ije iviama bu uria ni besu ijiege naovono kiake.

⁵E ije bu vua maeje bune vierafei rove bu una ijuonei. Ijadufuo bu una e gue kuariavo ije buka naebe vierafeva igege kuariavo. Godi fu isuibe itire fuone ijia kuaekoga saove ijiakiro sakae ige bu ijia nae. Areme fu kuamoga do ije fu sakae guove ijia ajiana samadire.

⁶Ro rade fu do ije kuamoga fu una sakae ije okuramoga e ije ise renoejo ijiakiro ire boeje sakae igia naovo ije buka oekinu isere.

⁷Rove iviama Godi fu una kuae, Na sakae igiakiro saove ije ro e ige iviama ume igia oenoevo ije maza radekuma ijia miane ireobo ije kuaga fu naeke. Ro kuke mazani besu ijia na e ije bu naebe Godi ma vierafena vame maeje ijia kenoejo ije kame isekafiakono kuae.

⁸Ijadufuo kairafano jade vierafero E Ireobo ire ije fu rekiro kuaema ije fu saroena rekiro jade ijiege vierafevo. Ro kuke ni mukoreigia vierafekiro jade totevo. Ijadufuo maeje juaevasia uruvana (1000) furidufuo fu vierafena kuaema ije fuka jiamadogo baki ro fuka mu besu igeki. E gue bu vierafero E Ireobo ije fu saroemo ijadufuo vua ije fu una ruakiro isuibe fu kuaema ije fu naebe ruakiro bu ijiege vierafeve. Rove nika mukoreigia vierafefo. E Ireobo fuka sone oe vafaena ja samuagiana fine. Ijadufuo maeje fu e besukua be fu dabe isekafadufuo ije fuka ijuoneme. Ro fu vierafe e boeje noka ise ije no renoevo ije arena una fuone vaga fu no karaunuokiro fu ije vierafeme. Jesu fu una ruomo ije samuadufuo ijene

¹⁰Ro igia fie, e iniemeno ije fuka e bu naebe samuavo ijia fu ro sinuome iniemeno. Ijadufuo vame besu ijiege E Ireobo fuka maza ije e bu naebe samuaeva ijia una ruake. Ro maza ijia saove ije fu ireobo kumema areme fu ijia bakireke. Areme miane Ka ireobo ije fu ire boeje saove ijia ro sakae igia naovo ije naena furike.

¹¹No vierafe ire boeje Godire kame ijiege arafiriaga bu furike. Ijadufuo oe jone ije ja kame ire isekuma binobino vierafenoevo ije ka arefo. Ro nika vame maeje renoekinu e akae rena ire ije Godi fu oemaedufuo ijiaru renoefo.

¹²Ro maza ije fu una ruadufuo ja samuavo ijia nika maza boeje ejafanamina baname isoekinu kairafa jone gue ifejiaga bu oe kuderiana una E Ireobo ma vierafekinu samuafo. Ja vame ijiege renoevo ijia ja ifejanamina Jesudo maza ije fu una ruadufuo ije abe migegire ivuake ijia nijake. Ro maza ije fu una ruomo ijia saove ijiakiro ire boeje ume igia naovo ije fu miane ireobo ijare naena furidufuo.

¹³Fu naena furikega e boeje eranebe no vua fuone ijiakiro vame fuone ije mukoreigia iriniana fu vierafema ijia kenoeva ije no are iviaeko maeje Godi fu kuema ijia karidufuo.

¹⁴Ro kuke kairafano jaeje jaka uria maza ije fu una ruadufuo ije samuave. Ijadufuo nika giriesana vame maeje Godi fu oemaedufuo ijiaru renoefo. Ja ijiege renoekuva ja maza ije ja Godido nidua ijia irevo ije jaka iriaebaki maturae ro dazena iredufuo.

¹⁵Ro kuke fu irerefuo saroekinu samuaguomo ije vierafefo. Fu vierafe fuka no maza muoga no vua fuone abena una e gue fu karauniadufuo ije nijasiake. Foru fu vua besu ije fasi fuone boeje ijia isoena e boeje nijasiae. Fasi fuone fu isoema ijia vua gue fuka gikikimana no izege fiena vierafekuva baki fu ije isoe. Ro e ije bu vua ije ijuonevo ijiakiro e ije bu Godi ma vierafekuae mamoevo ije bu Forudo fasi ige dakuva vua maeje bube fieke. Ijadufuo bu Godido vua maeje e nijasiavo ije buka vua kame kuderiana una ni bino nijasiave. Bu ijiege renoevo ijadufuo maza ije Jesu fu una ruomo ije fu bu ke mazie giana kame isekafiake.

¹⁷Ro kairafa none na oetuavo ja ije vua ige na kuariavo ije jane vierafe. Ijadufuo janika jumena mukoreigia kojo samuanamifo. Ja ijiege rekina e ije bu vua kufuimena e nijasianoejo ije bube ja kaenamiana una vame ise ijia vaga jone ja ma vierafevo ije ja aredufuo.

¹⁸Ro na joefuo Godido baname isoega fu fuone maeje miaga ja giriesana E Ireobo Jesudo vua ije jone nijaenamike. Ja ijiege renoekuva jone ja ma vierafevo ije fuka daroki rena vadufuo. Ro na baname isoega e boeje buka maza boeje Jesu Kuraesi E Ireobo nuvuone ije dabe aroena oemarejakinu vake. Marei.