Read Girawa Jut 1 Bible Online

Jut 1 - Girawa bible

Jut 1

¹Fasi ige e Judi Jemisido uvia na Jesu Kuraesido imevo ije nare isoe. Na isoena e ije Godi fu kemo ja e fuone reva ijene nijiave. Ro e ije ja Godi Asoe nuvuone ijare oetuamo ro kuke Jesu fu ja samuagiamo.

²Ro na baname isoega Godi fu maza boeje jone oefiane abena ma rejiakinu ifejiaga ja kafaena oetuanamikinu karinoedufuo. Izege Godi fu e ije vua kufui nijasiavo ije kame isekafiadufuo ijene

³Erafano na vierafe naka Jesu Kuraesi izege fu e boeje no karaunuoga no jaena besu karinoevo ijadufuo vua ije isoe nijiakiro vierafei. Rove iviama na una vua be ije isoe nijiave. Ro vua ijeja na soesoena kuariaga ja giriesana Godido vua maeje fu e ije bu fu ma vierafevo ije vajiaema ijadufuo vafaekinu abe mukoreigia samuadufuo.

⁴E bino Godi naebe ma vierafevo ije bu mauike nuriete e ije ja afuina kariva ijia jaena biezinami karikuae vuae. Bu vierafe buka Godido vua maeje fu e boeje oetuakinu ise buone giana aremo ije dabe dakudena una ni be rekuae vierafe. Bu kuae vame fudaenamikinu vame isema renoejo ije Godi fube no kena isekafuokono kuae. Ro kuke bu Jesu Kuraesi e Ireobo nuvuone fu fuosukua no samuaguomo ije buka ijuoneve. Ro e ije Godido vua vierafena kuaevo ijiebe isuibe e ije bu ijiege isema renoejo ije Godi fu izege kena isekafiadufuo fu kuaema ije bune buki akae ijia isoe.

⁵Ro vua ije jane vierafei rove na una ja nijasiaga ja vierafeke. Ni izege E Ireobo ije fu e fuone Isureroko ije aesakae Ijifiti ijia karauniaema ije vierafefo. Fu karauniae rove rade e ije bu naebe fu ma vierafevoga fuka kame isekafiae.

⁶Ro kuke ni anera ije vierafefo. Budua bu Godire daro vajiae rove buka una Godido daro ije asikuae vierafe. Ijadufuo Godi fu seni ije turasedufuo baki ijia kena anera ije kiriama kame are titutema ijia uniae. Ro rade maza ije fu una ruomo ije fu bu kame isekafiake.

⁷Ro kuke ni sidove Sodomekiro Gomora ro are isesina gue bu irifo ijia kariva bu izege reva ije vierafefo. E ije bu anera ije bu reva ijiege rena buka naebe Godi irinae. Ro buka una barubara bue fudaenamikinu vame ka ma ise ije rei. Ijadufuo miane fu saove ijia arina sidove ije nae. Fu ijiege naenoga e boeje bu ijia giana vierafero bu iserekuva budua bu rade miane ijia ijiege naona isejavaekiro bu ijiege vierafeke.

⁸Ijadufuo vame besu ijiege e ije nuriete jone vuaeva ije bu naka naokinu vame ise ije rena vajae buone kame arafiriave. Bu ijiege renoekinu Godido daro maeje buka ijuonena una vua ise bino Godido anera ijiebuo kuaenoeve.

⁹Rove anera uguaeki Maekero fu naebe ijiege rei. Fu kavene ise Setaniki Mosido vajae surive ije abekuae bue madinami. Rove fu naebe itire fuone ijia vua ise bino kavene ise Setani kuarae. Ro fume kuae, Na vierafe Godi fuka a dabe isekafakono kuae.

¹⁰Ro e ije bu vua ije naebe mukoreigia fiena vierafevo ije buka una ve ijadufuo vua ise kuaevo. Ro vame buone bu kevo ije buka fanuve bu naebe ire bino vierafevo ijiege renoevo. Ijadufuo bu vame ijiege renoevo ijia buka vajae buone kame arafirianoeve.

¹¹Ijadufuo e ije isekijo! Buka vame ise ije e Keini fu kema bu ijia nuveve. Buka moni uruvana vierafevo ijadufuo bune e Berame e ije fu Godido vua ije ijuonena moni abekiro ireobo vierafema bu ijia nuvena vame ise ije renoeve. Ro kuke buka e Kora fu rema ijiege rena Godina bijaeve. Ijadufuo Godi fuka izege fu e Kora dabe isekafaema fu rade bu kame ijiege isekafiake.

¹²Ja Godido are ijia besu afuina oetuanamikinu ire ivo bu ijia jaena ire ivo ije buka vame ise binobino reko jaka jaediame. Ro buka buosukua ire uruvana ikuae vierafevo. Ijadufuo buje buka ire amite ije fu majaufi ijare abena vako ve ije fu naebe damo bu ijieki. Ro kuke buka ine ije fu a kanama areme naebe maza fuone ma ijia una kiraro fuka saeremo igeki.

¹³Ro ise buone ije buka ire do ije fu firana kadure ro do sabae ije irifo ijia arena vako ijieki. Ro kuke buka ire zuvi ije bu naebe are besu ire ro bume ijia oenoevo igeki. Ro e ijieki ijiebuo are ije ka ma titutema bu maza boeje ijia karivadufuo ije fune Godire buefuo amaerijiae.

¹⁴Ro e ijiebuo vua ije fune e Adamudo uifari be e Inoki kuavo ijare ude buesina kuae. Ro vua ije fu ijiege kuae,Gafia gafo! E Ireobo fuka anera fuone akae ka ma uruvana kaenamia fuina ruome.

¹⁵Fu kaenamiana e boeje kena mazie giakiro ruome. Fu Godido e ani ije bu vame ise fu naebe oemaedufuo ijia renoevo ije kame isekafiakiro ruome. Ro kuke fu e ije bu vua kuriaekuriaeki Godisina kuaevo ije kame isekafiakiro ruome.

¹⁶E ije buka vua kame e bino namiakinu zie vua ije maza boeje kuaevo. Ro kuke buka aroekarana vame ise ije bu vierafevo ije nuvediavo. Ro maza bino buka e gue biesiriana ire buone maeje kekuae kame soesoevo. Vua nijasiana ijuriaga bu ijia nuvena karidufuo ijene

¹⁷Ro kairafano vua ije e Afasero e ije bu E Ireobo Jesu Kuraesido imenoejo bu kuariavo ije mukoreigia vierafefo.

¹⁸Bu kuariana kia, Maza radekuma ije ruakuma e buka usiaena vame jone maeje ja kenoevo ije kame varaemena kisiadufuo. Areme bu uri vame buone ise ije Godi fu naebe oemaremo ije renoeke.

¹⁹Ro e ijieki ije bu Godido Kavene ije bu naebe abei. Ijadufuo buka e kame ataga bu buone binobino karinoeke. Ro kuke buka uri ire ije vajaema buone bu oemadiadufuo bu vierafevo ije renoeke.

²⁰Ro kairafano jaeje jade vame ijiege renoevo. Ro nika giriesana ifejanamiga jone ja ma vierafevo ije fuka ireobo refo. Ro nika maza boeje Kavene Akae ijadufuo daro ijia baname isoenoefo.

²¹Ro maza boeje nika Godi izege fu e oetuamo ijene dabe jone nijaenamifo. Ja ijiege renoekuva maza ije Jesu Kuraesi fu una ruomo ijia fu una ve ja marejiana ifejiaga ja ma karivako ije abeke.

²²Ro kuke nika e ije bu Godi ma vierafekuae zazaevo ije buone oefiane abekinu oetuana ifejiaga bu una Godi gikikimana ma vierafefo.

²³Ro ni e ije gue Godi fu rade ise ije bu renoevo ijadufuo kame miane ije naeno ije isekafiakuveno ije ifejiana faradia turana una vame maeje ijia uniafo. Ro kuke ni e ije bu vame ise ijare bu kame toenamiaema ije oetuana karauniafo. Ro ja bu ifejiakuva ni mukoreigia jone samuanamikiro jade bu reva ijiege mamoena ise bino renoevo. Baname isoena Godido oemarevo ijene

²⁴Roga noka Godi e ije fu no karaunuema ijadufuo oemarefo. Ro ni baname isoega Godi fu ja mukoreigia samuagiaga jone ja ma vierafevo ije jabe mamoena ari kaniake. Ro fu kaenamiaga ja nidua fuone sanaema ijia maturaena karike.

²⁵Ro Godi fuosukua fuka Godi ma ro kuke fure Jesu Kuraesido duvado ijia no karaunue. Ijadufuo roga no Jesu Kuraesido duvado ijia maza boeje Godi ijene dabe aroekinu oemarejafo. No vierafe e buka sanaema fuone ijiakiro daro ro ire boeje samuagiamo ijadufuo fu dabe aroekinu kari vake. Buka izege e bu iko zinume ijia fu dabe aroeva ijiege bu iviama ro maza rade ijiege dabe aroekinu vake. Mare!