Read Girawa Revelesen 11 Bible Online

Revelesen 11 - Girawa bible

Revelesen 11

¹Areme fu ine be bu ire bino mina giavo ije abe miena kie, Ije abena va Godido Are ije mi areme fata ije bu ijia Godido zinone ifaejevo ije mino kie. Ro kuke ni e izege bu ijia Godido baname isoevo ije dano kie.

²Ro ade Are makave ije Godi fu abena e Jiusi baki ije miaema ije mino kie. Ijadufuo maeje Are makave ije fune abena e Jiusi baki ije miae. Ijadufuo rade buka sidove akae Jerusareme kuavo ijia juaevasia inokubeke ro be ririkua ijia dabe arafirike.

³Bu dabe ijiege arafirinoeke na e inokiro bu none akaegue ijia vua none dabe e gue kuariavo ije kiaga bu vuake. Bu vua ijia usiaena ugone ije e bu oefiadiaga savo ije sama areme vua none ijene e nijasianoeke. Ro vua none ije bu nijasiadufuo ije bu mu uvani taoseni tu aderedi sisiti (1260) ijiege nijasianoeke.

⁴Ro e inokiro ije bu ine inokiro bu kua Orivino kuavo ijiakiro ire inokiro gorodi ijia amaeriaeva bu raete kuriavo ijene. Ro ire inokiro ije bu E Ireobo aesakae boege amaerima ijadufuo nidua ijia irevo ijene.

⁵Ro eranebe bu e ije kena isekafiakuae ruakuva ije miane fuka itire buone ijia naena usiae e ani buone kena isekafiake. Ijadufuo eranebe bu kena isekafiakuva bu vame ijieki ijia e ani buone ije kaniaga bu oeke.

⁶Bu daro namo ijadufuo bu saove ijia ve ije fu damo ije bijukuraga maza ije bu vua nijasianoevo ijia ve ije fube dake. Ro kuke bu daro naovo ijadufuo bu do isesina ije e bu ivo ije kena kuderiaga bu una kavuane reke. Ro kuke bu daro naovo ijadufuo bu maza bino buone vierafeva ijia ire ise bino rena e ume igia oenoevo ije kena isekafiake.

⁷Bu Godido vua e nijasiana vakuma furino ijia fanu kuriae be fu mako dibuore ije gavo baki ijia ajia kekena e ijena bijaeke. Fu buina bijaema areme fure iraraena sakiaga bu oeke.

⁸Bu oega surive buone ije bu kena sidove ireobo Jerusareme bu E Ireobo abena kurosi kanaeva vame ijia naga bu ijia naoke. (Ro sidove ireobo ijadufuo ive bu abe dakudena una sidove ise Sodome ro Ijifiti bu kiavo ijiege kuake).

⁹E ijiebuo surive ije bu mu inokubeke ro be ijadufuo maza uvuoka manino ijiege bu ijia naokega e sakae binobino ro agane ro isama binobino ro vajae surive binobino ije bu giadufuo. Rove bu kena mako rukuva baki.

¹⁰E inokiro ije Godido vua nijasianoevo ije bu oekuva e boeje ume igia oenoevo ije buka ireobo oemaredufuo. Buka iro ina oemarekinu sinuome buone ivajuonamike. Ijadufuo maeje bu e inokiro ijiebe e ume igia oenoevo ije kame arafiriako bu vajae fiane abeve.

¹¹Ro mu inokubeke ro be ijadufuo ukua ijia Godi fu una ivua vajiamoga bu una urivo e ije bu giaeva ije buka ireobo jumei.

¹²Areme e inokiro ije Godido vua nijasiavo ije bu fieke e be saove ijia uruke kumei, Igia ruano kumei. Fu ijiege kumenoga e ani buone ije bu irena giakoga bu ajiana amite ije burana saove ijia vae.

¹³Bu ajiana vakoga aesakae ije fuka ireobo uvemoga sidove ireobo ije akaegue fuka sakae ijare ufena ari okurae. Fu ijiege rena e seveni taoseni kaniavoga buka oe furi. Ro e gue ije naebe kaniaeva ije bu ije giana buka jumei. Areme bu una oe kuderiana Godi saove ijia fino ijadufuo daro ireobo ije dabena aroe.

¹⁴Areme na una fieko fu kumei, Ire ka ma ise be ririkua ije fune ijifureki remo fune furi. Ro be ije fu uriado fu sone rade ruakono kumei. Anera naba seveni ije fu vegu fuone ufeima ijene

¹⁵Anera naba seveni ije fune vegu fuone ije dabe ufenoga e uruvana bu saove ijia urukeigia kumei, E daroki ije fu aesakae boege samuadufuo ije fune iviama una Godi E Ireobo nuvuone ro E Ije fu kuamo fu ruaema ijadufuo daro rotire ijia fine. Ijadufuo fure maza boeje aesakae ige samuakinu fivake.

¹⁶Bu ijiege kumevoga e uguaeki ije bu Godido nidua ije fata buone ijia kariva ije bu kurituana ume ijia dijena fuone baname isoe.

¹⁷Bu baname isoena kua,Godi E Ireobo ka daroki a isuibe ijia fina ruae ro iviama a uria ijia fine. Ro are iviama daro one ijia sakae ige samuamo ijadufuo noka one oemareve.

¹⁸E aesakae binoko ije bu a irinavo baki ro buka aena ziekinu nigaraeve. Rove maza ije a bu isekafiadufuo ijiakiro e ije oeva ijiebuo ise ije a kena mazie giadufuo ije fune ruae. Ro kuke a e one mamekanu ro isesina uruvana ije bu vame one ijia akae karinoeva ijiakiro e ije bu a aguarana jumenoeva ije ire maeje a vajiadufuo maza ije fune ruae. Ijadufuo a e ije bu ume igia e one kame kaniakinu ire one kame isekafiaeva ije a una ve ijadufuo bu kame isekafiake.

¹⁹Areme saove ijia Godido Are bu baname isoevo ijadufuo viene fu dauvekoga na mavua ije bu Godido akae ije abieseva ije gae. Na ijiege gakoga saove fu karana kumekinu guroekoga aesakae ije fuka dabe uve. Fu uvekoga ve ireobo majaufikuma dako ire aesi ije fu ijia ari.