Read Girawa Revelesen 15 Bible Online

Revelesen 15 - Girawa bible

Revelesen 15

¹Areme na una saove ijia ire ka sumiki ijene gae. Na gake anera seveni bu ire seveni kena aesakae ije isekafakuae ruove. Ire ijiebe radekuma ijia aesakae ijia isekafaga Godido ziemo ije fu ijia furike.

²Areme na una ire be davare igege nafuema irituraema miane ijiakuma biemaroema fu naeno ijene gae. Na ire ije ganaro una e ije bu mave kuriae ijiakiro kavene fuone bu umui ijia amaeriva ije giriesa iraraena asidiaeva bu ireva ijene giae. E ijiebe e ije bu mave kuriae ijadufuo naba isoeva ijene mukoreigia asidiae. Bu davare irituraema ijia irena ufuaenoena areme ire gita igeki ije umui buone ijia faradiae.

³Bu ijia irena Mosisi e Godido imeno ijadufuo dua ijiakiro Mave-Sifi Ame ijadufuo dua ijene uruve. Ro dua ije bu uruvo ije bu kua,Godi E Ireobo daroki vame one a kemo ije fuka ma mukore. Ro E Ireobo aesakae boeje samuagiamo vame one a kemo ije fuka ma ijiaru ro ise bino ijia fuka baki. Ro Kini ireobo a osukua aka ma akae ro e boeje buka a jumekinu dabe arorake. Ro e boeje aesakae binobino ijia karinoeva ije buka ro a atogesana baname isoeke. Ijadufuo maeje vame one ije aka ma ijiaru kemo ije e boeje ume igia oenoevo ije bune gae.

⁵Na ije gana furi areme rade na una saove ijia gake Godi Are ije fu fino ijia viene ka ireobo ijare ijia dauve.

⁶Fu dauvekoga anera seveni bu ire ka ma ise aesakae ije isekafadufuo seveni kena viene ijia usiae ruae. Ro anera ije bu ugone abaeki jiamadogo ijene sae. Ro guge buone ije bu ire birete gorodi ijia amaeriaeva ije suvae.

⁷Areme ire fo ni uria kariva ije be fune urina anera seveni ijene disi gorodi ijia amaeriaeva ijene seveni kena vajiae. Ro disi ijia buka Godi ije maza boeje ijia fivako ijadufuo ziemo ijare ijia iritoeje.

⁸Ro Godido Are guove ije fuka fuone sanaema ijiakiro daro fuone ijadufuo fete ijiebe ijia irarae. Ijadufuo e bino bu izege Are ijia aruna vakuva baki. Ro bu samuake ire seveni ise ije anera bu kena aesakae ije isekafakuae ruaeva ije bu furiga bu sone ijare aru vake.