Read Girawa Revelesen 16 Bible Online

Revelesen 16 - Girawa bible

Revelesen 16

¹Areme na fieke vua be fuka urukeigia Godido Are ijia anera seveni ije kuariae. Fu kumei, Usiaena va ire ise Godido ziemo ije disi seveni ijia naovo ije kame aesakae ijia usiakoreno kumei.

²Ijadufuo anera amure ije fune disi fuone ijene dabe va aesakae ijia usiakorei. Fu ijiege remoga vajae fiane ijiakiro matane ka ma ise ijiebe aesakae ijia ruae. Bu usiaena e ije mave kuriae ijadufuo nuga ije naeva ijiakiro ire ije bu umui ijia amaerina fuone baname isoevo ijiebuo vajae ijia ruae.

³Areme anera tu ije fune disi fuone ije dabe davare ijia usiakorei. Fu ijia usiakoremoga do ije fuka una e baronema ijadufuo kavuane igege rei. Ijiege rekoga ire boeje binobino bu davare ijia oenoevo ije buka oe furi.

⁴Ijiege rekoga anera tiri ije fudua fune disi fuone dabe do ije bu vako ijia usiakorei. Fu usiakoremoga do boeje buneka una kavuane re furi.

⁵Areme na fieke anera ije do boeje samuamo fu una saove ijia Godi kuarana kumei, O Godi Akae, aka isuibe ijia fina ruae ro iviama a uria fine. Ro e ije ise revo ije a kena isekafiamo ije aneka mukoreigia vierafekinu reme.

⁶E ise revo ijiebe e one a ma vierafevo ijiakiro e vua one abe kuaenoevo ije kaniavoga bu kavuane usiaena oe. Ijadufuo aka vame maeje rena do ije a aregaro a kavuane ije kena una e ije bu ijiege reva ije vajiaga bu ivono kumei.

⁷Areme na fieke vua be fu fata ije bu Godi zinone ifaejavo ijia kumei, Godi E Ireobo ro E Daroki a e ume igia ise renoejo ije a kame vame ijiege isekafiamo ije aneka mukoreigia remono kumei.

⁸Areme anera fo ije fune disi fuone dabe mazani ije usiamadimoga fuka kuriaekuriaekigia kekekoga fete fuone ijare e boeje kaniae.

⁹Ijadufuo e ije bune Godi ije fu daro fuone ijia ire boeje isekafiamo ijadufuo ive ije dabe buzei. Rove bu naebe oe kuderiana una Godido daro ireobo ijene dabe aroe.

¹⁰Areme anera faeve ije fune disi fuone dabe mave kuriae amure ijadufuo fata ijia usiakorei. Fu ijia usiakoremoga mave kuriae ijadufuo are ije fu samuamo ije funeka titutekoga e ije buka vajae fiadiamoga bu ubae sakinami.

¹¹Bu vajae fiane ijiakiro matane ije bu abevo ijadufuo uri Godi saove ije samuamo ije dabe buzeikinu una fu namae. Rove bu naebe vame ise buone bu renoevo ije arena una oe kuderia Godi ma vierafe.

¹²Areme anera sigisi ije fune disi fuone ije dabe do ireobo Iufureti kuavo ijia usiakorei. Fu ijia usiakoremoga do ije fuka si furi. Ro do ije fu si furima ije fu e kini boeje are mazani ajiamo nake samuavo ijiebuo vame amaerijiae.

¹³Areme na una gakoga kavene ise ire sabade igeki ijiebe e ise inokubeke ijiebuo itire ijia usiae. Be fu duregoni ijadufuo itire ijia kekei. Ro be fu mave kuriae ijadufuo itire ijia kekei ro be fu e ije vua kufuimeno ijadufuo itire ijia kekei.

¹⁴Ro kavene ise ije buka daro buone ijia ire sumiki bino renoejo. Bu usiaena va e kini aesakae binobino samuavo ije kaenamiana besu afuikina bu Godi E Daroki ijadufuo mazani ijia una fuina bijaedufuo.

¹⁵Ro igia fie, naeje naka e iniemeno igege ruake. Ro e ije fu oemarekinu fidufuo ijeja funeka e ije fu maza boeje naebe ni naeno ro fu sinuome fuone ije umui ijia faradiana samua fino ijare. Fu ivuake ijia faradiana rerekinu samua fino ijadufuo fube e boeje ijiebuo nidua ijia detaba jaevekinu oenoeke.

¹⁶Areme kavene ise ije bune e kini gue kaenamiana are ije bu e Iburukobuo isama ijia kua Amagedonino kuavo ijia besu afui.

¹⁷Ijiege rekoga anera seveni ije fune disi fuone dabe kave ijia usia korei. Fu ijiege remoga vua be fu Godido Are guove ijia urukeigia kumei, Ire boeje bune ijia furimano kumei.

¹⁸Fu ijiege kumekoga saove karana guroekoga aesakae ije fuka dabe urukeigia uvei. Ro are ije fu uvema ije Godi isuibe ema ije fu amaerima ijia fu naebe be ijiege uvei. Ude fume isesina bino uve ro ige fu uvema ijare fuka ka ma ireobo.

¹⁹Ire ije fu ijiege rekoga sidove ireobo Bebironi fuka dabe atana inokubeke rekoga aesakae boeje ijiebuo sidove mamekanu ije buneka mukoreigia iserei. Ro Godi fu sidove Bebironi fu isekafadufuo ije fu naebe tote. Ijadufuo fu dabe isekafamoga fu Godido ziene ije bu dabe do vuaeni igege kafusi ijia veseva ijene dabe i.

²⁰Are ije fu ijiege uvekoga sakae boeje bu davare ukua ijia turana naovo ijiakiro uruo mamekanu ije bune bakirena vae.

²¹Ro saove ijia ire aesi mune igeki ka mamekanu irufui buone buka fifiti (50 kg) ijieki ijiebe diduena ari. Bu diduena ari e ije Godi fu ire ka ma ise ije rekoke bu isejavaena fu dabe buzeivo ije kaniana matane vajiae.