Read Girawa Revelesen 22 Bible Online

Revelesen 22 - Girawa bible

Revelesen 22

¹Areme anera ije fune una do be e bu ina ijia karivako ije fu ruvako ijene nijasie. Ro do ije fuka mukore abaekiraema ijare Godikiro Mave-Sifi Ame ijiebuo fata rotire ijia kanana keke ruae. Do ije fu kanana sidove ijadufuo vame ije vaema ukua ijia vae. Ro do irifo guegue ije bu ine ije bu fo tura ina maza boeje ijia karivako ijiebe ijia nana vae. Ro ine ije bu asame besubesu guove ijia kiravo ro juaevasia besu ije buka kukuma kiravo. Ro ine ijadufuo a ije e aesakae igia oenoevo bu turana matane buone ro vajae fiane buone omaniga bu madiavo.

³Ro ire ije naebe maturaeva Godi fu ijuonemo ije bu sidove ijia giakuma baki. Ro Godikiro Mave-Sifi Ame ijiebuo fata ije fu sidove ijia manikega e Godido imejo boeje bu buone baname isoeke.

⁴Ro kuke Godido nikubae ije bu ijia gake ro ive fuone ije bu variatare buone ijia isoejiake.

⁵Sidove ijadufuo guove ijia titutema ije fuka ma baki. Ro ire raete ro mazani ije bu ijia vierafekuva baki ijadufuo maeje Godi E Ireobo ijadufuo sanaema ijare ijia sanaejiame. Ro e Godido imejo ijiebe e mamekanu rena e boeje ume igia oenoevo ije maza boeje samuagiana vake. Jesu fu una ruomo ijadufuo vua ijene

⁶Areme anera ije fu na kie, Vua ige fuka mano abena ma vierafeno kie. Ro Godi E Ireobo ije fu Kavene fuone kena e ije vua fuone vierafena e kuariavo ije vajiamo ije fu anera fuone kuamoga fu arina ruae. Fu arina e ije Godido imejo ije irere fu maza rade rekuveno ije kuariakiro ruae.

⁷Jesu fu kia, Mukoreigia fiefo naeje naka migegire una ruake. Ro erare fu e ije Godido vua vierafena kuaevo ijiebuo vua maeje bu buki ijia isoeva ije iriniakuva e ije buka oemareno kiae.

⁸Ro na Joni nare vua boeje adane none ijia fiekinu ni none ijia giakoga ire boeje bu rei. Na ire boeje giakinu fiema furi areme uri anera ije fu ire boeje nijasiemo ijadufuo nidua ijia augesana fuone baname isoekiro vierafe.

⁹Rove anera ije fu una na kie, Ade none baname isoekiro ni una Godido baname isoene. Ijadufuo maeje naeje na e be a vareki Godido imevo. Ro kuke na e uviarafa nuvuone ije Godido vua vierafena kuaevo ijieki be. Ro na e ije bu Godido i menoekinu vua fuone maeje buki igia isoeva ije iriniavo ijieki beno kie.

¹⁰Areme anera ije fu kuke kie, Ade vua ije irere bu rade rekuvejo bu buki igia isoeva ije abe nuriemo. Ijadufuo maeje maza ije funika ivuaredo ire boeje buka redufuo.

¹¹Ro igia fie, maza nuvuone maeje no ise nuvuone ije arena una oe kuderiana Godido ruadufuo ije none mukoreigia nise furi. Ijadufuo erare fu uria ise renoekiro vierafekuma ije ni arega fu ijiege renoene. Ro erare fu uria siroe igege vame ka ise ije renoekiro vierafekuma ije ni arega fu ijiege renoene. Ro erare fu vame mukore ijiaru renoekinu ro e akae rena finoeno ije ni arega fu uria ijiege e akae renoeno kuae.

¹²Ro Jesu fu kuke kuae, Igia fiefo naeje naka iviama igiebuo una ruove. Ro na ruakuva na ire bino kena ruaekina na e ije bu izege noefuo mukoreigia imenoeva ije una ve ire bino vajiake.

¹³Ro naeje na Amure ijene ro Radekuma ijene. Nare ude zinuivedo nare una rade rena furike.

¹⁴Ro eranebe oe buone ije bune ugone igege soma abaekiraeva ije buka oemaredufuo. Ijadufuo maeje bune manido bu ine sunine bu ina maza boeje ijia karivadufuo ije nubuna ike. Ro kuke bu manido bu sidove iviaeko guove ijia aruna vake.

¹⁵Ro sidove ijadufuo makave ro diruo ije bu e ije vame ise renoejo ijiakina e ije kinenavo ijiebe ijia oenoeke. Ro kuke bu e ije barubara fudaenamina ise revo ijiakina e kaniavo ijiebe ijia oenoeke. Ro bu e ije kine kufui umui ijia amaeriaeva ije oetuavo ijiakina e ije bu vua kufui kuaenoevo ro vame kufui ije kenoejo ijiebe ijia oenoeke. E ije bu Godido sidove iviaeko ijia bube aru vakiro maza boeje bu makave ijia oenoeke.

¹⁶Na Jesu nare anera none ije kuavoga fu vua ije abena sosi ijia kuariakiro vuae. Ro naeje na e Devidido uifari na agane fuone ijia uinuvena ruae. Naeje na ire zuvi ije mukoreigia sanamo ije fu ve irasekiro ajiamo ijene.

¹⁷Ro Kavene Akae ijiakiro sosi ije fu bara igege baru fuone manikuveno ije bu kua, Migegire rono kuave. Ro erare fu vua ije fiemo ije fudua fu kua, Rono kuame. Ro erare fu do duaevoga roga na do ije bu ina maza boeje ijia karivako ije monido fuaevevo baki ije vekinu abena ijane. Ro erare fu do ije ikiro vierafekuma fuka korofuo ro abena idufuo. Vua radekuma ijene

¹⁸Na Joni nare ire ije fu rade redufuo ije buki igia isoe. Na isoena e boeje ja ejafiana ju kuariavo fiefo. E ije erare vua fuone bino vua igadufuo ubine ijia ifena kuaekuma Godire ire ije fu e isekafiadufuo bu buki igia isoeva ijia kena e ijene isekafake.

¹⁹Ro erare fu ire ige bu rade redufuo na buki igia isoeva ije gue masikoregaro buse una bino isoekuva Godire ine fo ije bu ina maza boeje ijia karivako ije fu fuefuo nijaema ije abe vake. Ro kuke e ije fu sidove akae ije na buki igia isoena kuaeva ijia fube vadufuo.

²⁰Jesu Kuraesi e ije vua boeje ige kuaruomo ije fu kume, Ije fuka ma. Naeje naka migegire una ruovono kume. Ro e Joni na una kume, Maremano Jesu E Ireobo ni rono kume!

²¹Na baname isoega Jesu E Ireobo fu Godido e boeje are irore igia karinoeva ije marejiana ifejiaga bu mukoreigia karinoedufuo. Marei!