Read Girawa Revelesen 4 Bible Online

Revelesen 4 - Girawa bible

Revelesen 4

¹Areme na una kuke nimamaena gake viene be fu saove gufia dauvei. Areme na fiekoga vua be na ude fieva ije fu igege kumena na vua kuarie. Fu kume, Ajiana igia roga na irere fu rade rekuveno ije nijasano kumei.

²Areme saroruba Kavene Akae ijare na dabe nirokiemo na saove ijia gake e be fu Godido fata ijia fine.

³Ro e ije fata ijia fino ijadufuo nikubae ije fuka abaekirama ire mune ka mukore kavuane be bu jasifa kuavo ijieki. Ro kuke mune getiki be bu kanerianino kuavo ijieki. Ro fata ije fu fino irifo ije fu anuage getiki ijare ijia sana ufuaenoe.

⁴Ro Godido fata irifo ijia fu fata binodua tuaedi fo (24) ijiege ijia irei. Ro e ugaeki tuaedi fo ugone abaeki saeva bu ijia kari. Ro nigofo buone bu ire gorodi zine iramo ijia amaeriaeva ijene sae.

⁵Areme na gake saove ijare Godido fata ijia karana sanakinu uruvana guroeme. Ro Godido fata ijadufuo nidua ijia na gake ire raete seveni ijiebe ubine ijia naena sanave. Ro raete ije sanamo ije Godido Kavene seveni ijene.

⁶Ro kuke Godido fata nidua ijia na gake ire be fu davare igege ijia nafue ro fuka irituraema ma abaekirae. Godido fata ije namo irifo ijia ire fo (4) ni uria kariva ijia kari. Ro vajae buone ijuone ro uine ije buka niome ijiebe ijia irarae.

⁷Ro ire ije kariva amure ije na gaga fu fanu raejoni igeki ro be ije fu mave-kau igeki. Ro ririkua ije fu emabuo nikubae igeki. Ro rane ije na gaga fu ire ume buruome kave ijia baraejona oenoeno igeki.

⁸Ro ire fo ni uria karivo ije besubesu buka adave sigisi (6) ijiege bijianae. Ro ire ijiebuo vajae boeje foteke ro adave rotire ije buneka niome ijiebe okuriae. Ro ire ije kariva ije bu mumaza bu kuaevo,Akae Akae Akae Godi E Ireobo ije fuka E Daroki. Fu iko zinume ijia fi ruae ro iviama fu uria fine ro rade fu una ruadufuo.

⁹Ire fo ni uria ije kariva ijiebe e ije fu fata ijia maza boeje fivako ijadufuo sanaema ije dabe aroekinu oemarejave.

¹⁰Bu ijiege rekoke e uguaeki tuaedi fo (24) ije kariva ije bu e ije fu fata ije maza boeje fivako ijadufuo nidua ijia tuana umeke dijena fuone baname isoeve. Bu ire ije gorodi ijia amaeriaeva bu nigofo buone ijia saeva ije kari fata rotire ijia korekinu kuaevo,Aeje aka E Ireobo ro Godi nuvuone. Are ire boeje no giavo ije amaeriae. Ro are vierafe one ijia kena uniaema ijadufuo bu ni uria karina imeve. Ijadufuo no daro one ka ireobo ijiakiro one sanaema ije no arorana kafiafirakinu oemarejavo ije fune marema ijadufuo no ijiege renoeve.