Read Girawa Revelesen 8 Bible Online

Revelesen 8 - Girawa bible

Revelesen 8

¹Mave-Sifi Ame ije fune anume seveni ije abena irakoga ire boeje saove ijia kariva ije buka maza aokube katibite.

²Ro na giakoga bu anera seveni ije Godido nidua ijia irevo ije seveni kena vajiae.

³Ro anera be fu ire udi mukore urimo bu ifaejavo ijadufuo disi ije bu ire gorodi ijia amaeriva ije abena ruoma fata ije bu Godi zinone ifaejavo irifo ijia mani. Anera ije bu ire udi mukore urimo boeje kena vajavo fu kena e Godi ma vierafena fuefuo imevo ijiebuo baname ijiakuma una Godi zinone ifaejae.

⁴Ro ire ije udi mukore urimo ijiakiro Godido e ijiebuo baname ije bu anera ije Godido nidua ijia manino ijadufuo umui ijia udi urina ajia Godido vako.

⁵Fu ijiege re areme anera ije fune ire ije udi mukore urimo ijadufuo disi ane ije abei. Fu abena miane ije bu fata ijia Godi zinone ifaejavo ije karana ijia sama abena aesakae igia didue korei. Fu didue koremoga saove ije fuka karana urukeigia guroekoga aesakae ije fuka uve. Anera bu buone ije ufeva ijene

⁶Areme anera seveni ije bune uri buone seveni ije ufekuae samuae.

⁷Bu samuama irekoga anera amure ije fu fuone dabe ufei. Fu ufenoga ire aesi ijiakiro miane ijare kavuane ijiakuma biezena ume igia usiae. Fu usiaena ari umeigia aesakae aobe ine ro vajoma boeje funeka naena furi.

⁸Fu ijiege rekoga anera tu ije fu uri fuone dabe ufei. Fu ufemoga ire be uruo ireobo miane naeno igeki ijare tuana davare ijia dijei. Fu ijia dijemoga davare ije fu dabe atana inokubeke rei. Areme davare ije aobe fuka kavuane ijare okurakoga kijume guove ijia oenoevo boeje buka oe furi. Ro kuke sisime ije bu ijia oenoevo boeje buka ma iserei.

¹⁰Areme anera tiri ije fune vegu fuone dabe ufekoga zuvi ireobo ijare saove ijia ikuome sae igege naena kuariari. Fu arina aesakae aobe do ije vako ijiakiro do ije e bu ijo ijia ari.

¹¹Fu ijia arimoga do ije gue bune una imagi arui. Ijadufuo maeje zuvi ijadufuo ive ije bu kua Imagino kuavo. Do ije bu imagi aruiva ijadufuo e uruvana bu do ije ivoga bune oe furi.

¹²Areme anera fo ije fune uri fuone dabe ufei. Fu ufenoga mazani ijadufuo biruame gue fune iserekoga asame ijiakiro zuvi ijiebuo sanavo ije biruame gue bune iserei. Bu ijiege isereva ijadufuo mazani ije fume suoke ijiaru saname. Ro asame fu sanana vakuma ro ve ufirema ije fu areme.

¹³Areme na una manina fiekoga ume buruome kave ijia oenoeno ijare uruvanaigia kumei. O ja isekijo O ja isekijo e ume ijia oenoevo ije isekijo. Anera inokubeke ije uria ireva ije bu buone ufekuva ire ka ma omise ijiebe e boeje kame mukoreigia arafiriakono kumei.