Read Goan Konkani Mt 10 Bible Online

Mt 10 - Goan Konkani bible

Mt 10

¹Apleam bara xisank apoun haddun, Jezun tankam mhelleam atmeancher odhikar dilo ani devchar kaddunk ani sogllea jin’sacho pidda-rôg boro korunk tankam podvi dili.

²Bara Apostlanchim nanvam him: poilo Simanv (Pedru mhonntat to) ani tacho bhav Andre; Zebedevacho put Jakob ani tacho bhav Juanv;

³Filip ani Bartolomêv; Tomas ani dônddvosuldar Matêv; Alfevacho put Jakob, ani Tadêv;

⁴Krantikar Simanv, ani Tacho ghat ghetlo to Judas Iskariot.

⁵Heam bara zannank Jezun oso updês diun dhaddle: “Onbhavarteancheam ganvanchi vatt dhorinakat ani Samariekarancheam nogramnim bhitôr soronakat;

⁶punn odik korun Israelacheam Ghoranneacheam sanddleleam menddram sorxem vochat.

⁷Ani vochun ‘Sorginchem Raj ieunchem zalem!’, oxem porgott korat.

⁸Vaittakarank borim korat, mel’leank jivont korat, koddkarank nitoll korat, devchar kaddat. Tumi funkott ghetlam, funkea diat.

⁹Tumchê kodde bhangar, rupem, tambem legun potient aschem nhoi;

¹⁰nhoi mhonn vattek bhuti, vô don angavlim, vô vhannô, vô danddo; kiteak vavraddeak aplem jevonn-khann favo.

¹¹Khõichea eka nogrant vô ganvant bhitôr sortôch, tantum konn mannsugecho monis asa to sodun kaddat ani thõisorle bhair soro-sôr tanger ravat.

¹²Tachea ghorant bhitôr sortana, ‘hea ghorak xanti!’, oxem mhonnun taka noman korat.

¹³Ani tea ghorak favo zalear, tumchi xanti tacher denvteli; favo nhoi zalear, tumchi xanti tumkam porot ieteli.

¹⁴Ani konn-ui tumkam ievkar dinam zatit zalear, nhoi mhonn tumchim utram aikonam zatit zalear, tea ghorantle vô nograntle bhair sorun tumcheam pãianchi dhull fafddun uddoiat.

¹⁵Hanv tumkam khorench sangtam: Zhôddtechea disa Sodom’ ani Gomorra nogranchi zhôddti hea nograchê zhôddtê itli khôr zaunchi na.

¹⁶Aikat! Landdgeam modem menddram koxim Hanv tumkam dhaddtam. Hea pasot sorpam porim chotur, tori parveam porim sadim zaiat.

¹⁷Mon’xam thãi xidduk ravat; tim tumkam dhorun dhormsobhent vhortelim ani apleam devsthanamnim tumkam jerbond martelim.

¹⁸Mhojê pasot odhikaream ani razam mukhar, tanchea ani onbhavarteanchea fuddeant tumi govai diunchê khatir, tumkam vhortelim.

¹⁹Punn tumkam dhorun ditôch, tê ghoddier tumi kitem ulounchem tem, Dev tumkam kolloitolo kiteak uloitat tim tumi nhoi, punn tumchê udexim uloita To, tumchea Bapacho Atmo To, te khatir koxem ani kitem ulounchem te vixim husko kaddinakat

²¹Jivexim marunk bhav-bhoinn, bhavam-bhoinnink ani avoi-bapui putam—dhuvank lavun ditelim; bhurgim avoibapaicher uprasun tancho prann kaddunk laitelim.

²²Mhojea nanva pasot sogllo lôk tumcho dvês kortolo; punn xevottak porian thir ravtit tanchench taronn zatelem.

²³Mon’xacho Put ieunchê fuddem Israelachim nogram tumi bhonvun sarchinant nant mhonn Hanv tumkam khorench sangtam dekhun, eka nogrant tumkam dhumallo ditit zalear, dusrea nogrant pollun vochat.

²⁴Aplea guru poros xis ani aplea dhonia poros chakôr vorto nhoi;

²⁵xis aplea guru sarko, ani chakôr aplea dhonia sarko zaunk puro! Ghorabeachea dhoniak Beelzebul mhonnla zalear, tacheam ghorcheank tea-vôn anink kitem mhonnchim nant!

²⁶Tea pasot kitench dhamplelem asa tem ugttem zainastana urchem na ani liplelem asa tem kollo nastana urchem na dekhun tankam bhie nakat.

²⁷Hanv tumkam kallokant sangtam tem tumi disa-uzvadda sangat; ani kanant futfutlelem tumi aikolam tem pattsar thaun porgott korat.

²⁸Kuddicho jiv kaddtat punn jiv-prannacho nas korunk zaina tankam bhienakat, punn emkonddant kudd ani jiv-prannacho ekach farak nas korunk xokti asa Taka odik bhieiat.

²⁹Eka as’sarionak [2] don xerkam viktat nhoi? Toripunn tantlem ek-ui tumchea Bapachea hukume virêt bhi poddona.

³⁰Tumchê tokleche kens porian soglle mêzlele asat.

³¹Mhonntôch tumi bhienakat. Xerkanchea bhirea poros tumi odik vortim.

³²Hea pasot konn-ui Mhaka mon’xam hujir ollkhun ghetit zalear, tankam sorgar asto Mhojea Bapa hujir Hanv-ui ollkhun ghetolom;

³³punn mon’xam hujir konn-ui Mhaka ollkhun ghenam zatit tôr, tankam sorgar asto Mhojea Bapa hujir Hanv-ui ollkhun gheuncho na.

³⁴Hanv prithumecher xanti haddunk ailam mhonn somzo nakat; xanti nhoi, punn torvar haddunk Hanv ailam;

³⁵karann putak tachea bapaicher add, dhuvek tichê avoicher add, sunek tichê sasucher add doxim korunk Hanv ailam;

³⁶eka mon’xache dusman tachoch ghorcho lôk.

³⁷Mhojê-vôn aplea bapaicho vô avoicho odik môg kortat tim Mhaka laik nhoi; Mhojê-vôn aplea putacho vô dhuvecho odik môg kortat tim Mhaka iukt nhoi;

³⁸aplo khuris gheun Mhojê pattlean ienant tim Mhaka purtim nhoi.

³⁹Aplo jiv samballunk sôdtat tim aplo jiv hogddaitelim, ani Mhojê pasot aplo jiv hogddaitat tankam aplo jiv melltolo.

⁴⁰Tumkam ievkar ditat tim Mhaka ievkar ditat, ani Mhaka ievkar ditat tim Mhaka dhaddla Taka ievkar ditat.

⁴¹Eka provadeak, to provadi mhonn, svagôt kortat tim provadeacho inam ghetelim; ani promannik eka mon’xak, to promannik mhonn svagôt kortat tim promannik mon’xacho inam ghetelim.

⁴²Hanv tumkam sot sangtam: heam lhanantlea ekleak, to Mhozo xis mhonn, thondd udkacho êk pelo legun konnem pieunk dilo zalear, tankam koxei toren aplo inam mellonastana urcho na.”