Read Goan Konkani Mt 11 Bible Online

Mt 11 - Goan Konkani bible

Mt 11

¹Apleam Bara Xisank updês diun sompoilea uprant, Jezu tancheam heram nogramnim xikovnn diunk ani provochon korunk thõi thaun vochunk bhair sorlo.

²Tedna, Kristacheam kornneanchi khobor bondkhonnint aikun, Juanvan Tachê kodde oxem vicharunk apleam xisank dhaddle:

³“Ieuncho asa to tunch to, vô ami dusrea konnachi vatt polleunchi?”

⁴Jezun tankam oso zobab dilo: “Tumi aikolam ani dekhlam tem vochun Juanvak sangat:

⁵kurdd’dim polleunk lagtat, thonttim choltat, koddkaram nitoll zatat, bherim aikotat, melelim jivim zatat, goribank bori khobor porgott zata;

⁶ani Mhojê vixim zancho bhavart halonam tim mon’xam bhagi.”

⁷Te niropi thõisorle vetanam, Juanva vixim Jezu urponjik mhonnunk laglo: “Tumi kitem mhonn polleunk oronneant gel’leat? Varean halta tosli bet?

⁸Na tôr, kitem mhonn tumi polleunk gel’leat? Nazuk-mov vostram neslolo monis? Na; nazuk-mov vostram nestat tim razvadde-amnim astat.

⁹Tôr kiteak mhonn polleunk gel’leat tumi? Eka provadeak polleunk? Hôi, ani to provadea-vôn vorto mhonn Hanv tumkam sangtam.

¹⁰‘Ho polle tujê mukhar Hanv Mhojea dutak dhaddtam ani to tuji vatt tujê fuddem toiar kortolo’ , oxem mhonn zachê vixim boroilelem asa to hoch to.

¹¹Hanv tumkam khorench sangtam: bailank zolmol’leam bhurgeam bhitôr Juanva Batista poros vhôdd dusro konn zolmunk na; toripunn Sorginchea Rajeant odik lhan tim tachê-von vhodd.

¹²Juanv Batist aila tedna thaun tem az porian Sorginchem Raj nêtt bhôgta, ani nêtt kortat tim tem zhombun ghetat.

¹³Soglleam provadeamnim ani Somurtin Juanv ieit porian bhakit kelem.

¹⁴Ani tem mandun gheunk tumkam khoxi asot zalear,ieuncho asa to Elija hoch to.

¹⁵Aikunk kan asat tãnnim aikunchem.

¹⁶He atanche pinddkek konnak mhonn Hanvem sôr korchi? Ttinttear bosun asleleam apleam boraborcheank oso ulo marto bhurgeam porim ti:

¹⁷‘Ami tumkam nachpachim songitam vennuncher vazoilim, punn tumi nachunk nant’; ‘ami tumkam vilapachim gitam gailim, punn tumi roddunk nant.’

¹⁸Tôr Juanv jevonn toxem pivonn chakinastanam ailo, ani lôk mhonnta: ‘Tacher devchar bosla.’

¹⁹Mon’xacho Put khaun-pieun ailo, ani lôk mhonnta: ‘Ho asa pottio ani bebdo, dônddvosul-darancho ani patkeancho ixtt.’ Tori Devachê zannvaiecheo kornneo tika sakxi ditat.”

²⁰Magir, zõi-zõi Apnnem ogllim vismitam kel’lim, team nogrank, tãnnim jivit-mon bodôl’lem na dekhun, Jezu oso bexttaunk laglo:

²¹“Korazin, tujem kotta! Bethsaidê, tujem kotta! Tôr tumchê modem kel’lim vismitam Tir ani Sidon nogramnim kel’lim zalear, kedna tim sakafottem ani gobôr ghalun prachit korto aslim!

²²Hanv tumkam khorench sangtam: Zhôddtechea Disa Tirachi ani Sidon’chi zhôddti tumchê-itli khôr zaunchi na.

²³Ani tum Kapernauma, voir mollba porian tum ubaron pavtoli mhonn ravtai kitem? Emkondda porian tum sokla xevttotoli, kiteak tujê sovem keleant tim vismitam Sodomant kel’lim zalear, az porian tem ubem urto aslem.

²⁴Hanv tumkam khorench sangtam: Zhôddtechea Disa, Sodomachi zhôddti tujê-itli khôr zaunchi na.”

²⁵Tedna Jezu oso udgarlo: “Bapa, sorga ani prithumechea Dhonia, heô vostu zannarank ani xanneank lipoun dovorleôi ani supurleam ballkank ugteô keleôi mhonn Hanv Tuka dhin’vastam.

²⁶Hôi, Bapa, oxench korunk Tuka borem dislem.

²⁷Sogllem Mhojea Bapan Mhojea hatant dilam. Ani Putak konnuch ollkhona, bogor ekloch Bap; toxench Bapak konnuch ollkhona, bogor ekloch Put ani zankam Put Aplê khuxen Bap dakhoun diit, tinch mon’xam.

²⁸Sogllim tumi koxtt kortat ani ojeachea bhara khal asat tim, Mhojê-xim ieiat ani Hanv tumkam somadhan kortolom.

²⁹Mhojem zum tumcher gheiat ani Mhojê lagim xikat, kiteak Hanv dulôb ani lhan’vik kallzacho, ani tumchea jivak somadhan melltelem;

³⁰tôr Mhojem zum gheunk sompem, ani hollu Mhojem ojem.”