Read Goan Konkani Mt 12 Bible Online

Mt 12 - Goan Konkani bible

Mt 12

¹Team disamnimn, eka Sabbatha disa, Jezu xetantlean vetalo. Tache xis bhukel’le dekhun konnsam toddun khaunk lagle.

²Farizevamnim tem polleun Taka mhonn’lem: “Sabbatha disa korum nozo toslem kam’ he polle Tuje xis kortat.”

³Punn Tannem tankam sanglem: “Davidak ani tacheam sangateank bhuk lagli tedna, tannem kitem kelem tem tumi vachunk na kitem?

⁴Mhonngê, koxê bhaxen to Devachea ghorant bhitôr sorlo ani taka ani tacheam boraborcheank khaunk sot’tea nasli punn fokot iadnikamnim khavum-ietale te Devak bhettoilele undde tãnnim khele — hem tumi vachunk na kitem?

⁵Vô Sabbatha disa iadnik Devmondirant Sabbath môddtat, torui guneanvkar zainant, hem-i tumi Somurtint vachunk na bi?

⁶Tôr Hanv tumkam sangtam: Devmondira-vôn vhôdd Konn-Eklo hanga asa.

⁷‘Iôdn naka Mhaka, doia zai’, heam utrancho ôrth tumi zanno asleat zalear, kednanch niropradi mon’xank tumi guneanvkar korche nasleat.

⁸Tôr Mon’xachea Putak Sabbathacher-ui odhikar asa .”

⁹Thõi thaun To fuddem gelo ani tanchea devsthanant bhitôr sorlo.

¹⁰Ani zalem oxem: hatak ar zal’lo êk monis thõisôr aslo. Jezucher koslo-i êk guneanv ghalunk mellot kai mhonn polleunk, “Sabbatha disa konnak boro korum-ieta?”, oxem tãnnim Tachê kodde vicharlem.

¹¹Tannem tankam sanglem: “Tumchê bhitôr konn-eklea kodde êk menddro asot ani to Sabbatha disa eke khonddint poddot zalear, to taka dhorun bhair kaddcho na kai?

¹²Menddrea poros monis kitlo mhonn vorto! Mhonntôch Sabbatha disa borem korum-ieta, oxem zalem.”

¹³Magir Tannem tea mon’xak mhonn’lem: “Tuzo hat sôdd.” Ani tannem to sôddlo; ani tachea dusrea hata bhaxen to adim aslo toso sarko boro zalo.

¹⁴Tedna te Farizev thõisorle bhair sorle ani Jezucho ghat koso gheuncho tê vixim guddmêll korunk lagle.

¹⁵Punn tem somzun To thõisorlo koddsorlo. Zaitim zannam Tachê pattlean gelim ani tankam soglleank Tannem borim kelim,

¹⁶punn Apnnak porgôtt korinakat mhonn Tannem tankam xiddkailim.

¹⁷Izaias provadean sanglelem tem oxem khorem zalem:

¹⁸“Polleiat, Hanvem vinvchun kaddla To, Mhozo Sevok Ho, To Mhojê opurbaiecho! Tacher purnn sontôs Mhozo! To Mhojem taronn sorv raxttrank porgott korunk, Hanv taka Mhojea Atmean bhôrtolom. Vad-vivad to korcho na, bob marun ardduncho na, tacho tallo rosteancher konnak aikunk ieuncho na. Sotak zoit mellot porian futtloli bet môddcho na, ozun dhunvorto vat to kodinch palouncho na. Tachea Nanvar sogllim raxttram aplo bhorvanso dovortelim!”

¹⁹

²⁰

²¹

²²Tedna devchar boslolea eka kurddea-moneak Jezu sorxem haddlo ani Tannem taka boro kelo; ani to ulounk ani polleunk laglo.

²³Sogllo lôk thottakun mhonntalo: “Davidacho Put zait kai Ho?”

²⁴Punn Farizevamnim hem aikun mhonn’lem: “Ho monis devchar kaddta to, fokot devcharanchea pordhana Beelzebulachea odhikaran kadd’ta.”

²⁵Tanchim chint’nam ollkhun Jezun tankam mhonn’lem: “Khõichea-i eka rajea bhitôr nagrikanche pongodd ekamekacher uprasun zhuz korunk lagle zalear, tem raj padd zatelem; ani khõichea-i eka xarantlea loka modem vô eka kuttumbantleam vangddeam modem zhogddim-zhuzam upraslear, tem xar vô tem kuttumb ubem dhòrchem na.

²⁶Soitanachea rajeant-ui ekamekacher zhuztele pongodd astit zalear, tem raj fantton gelem, oxem zalem. Tôr tem anink koxem mhonn ubem urtelem?

²⁷Ani zôr Hanv Beelzebulachê podven devchar kaddtam, tumchim bhurgim konnachê podven kaddtat tôr? Mhonntôch tinch tumchi nit kortelim.

²⁸Punn Hanv Devachea Atmea udexim devchar kaddtam zalear, Devachem Raj tumchê thãi pavlem, oxem zalem.

²⁹Tea bhair, bollixtt mon’xak poilo bandlea bogor, tachea ghorant bhitôr sorun tacho mal luttunk zait? Taka bandlear mat tachem ghor luttunk zata.

³⁰Mhojea bhaga nant tim Mhojer add; ani Mhojê borabôr punzainant tim ximpddaitat.

³¹Hea pasot Hanv tumkam sangtam: sogllim patkam ani devninda Dev mon’xank bhôgxitolo, punn Atmeacher kel’li devninda Dev bhôgxicho na.

³²Ani konn-ui Mon’xachea Putacher vaitt uloitit zalear, tankam Devachem bhogsonnem astelem; punn konn Povitr Atmeacher add uloitit zalear, tankam bhogsonnem aschem na , zaum atanchea zaum fuddlea kallant

³³Zhadd borem korat ani tachim follam borim zatelim; zhadd vaitt korat ani tachim follam vaitt zatelim, kiteak follam pormannem zhadd ollkhunk mellta.

³⁴Furxeancheam pileamnô, tumi vaitt zaun tumchean borem ulounk koxem zatelem? Kallzantlem bhoron òt’ta tench tonddantleam utramnim vhanvta.

³⁵Borim mon’xam aplea borea bhanddarantlem borem kaddtat; vaitt mon’xam aplea vaitt bhanddarantlem vaitt kaddtat.

³⁶Hea pasot Hanv tumkam sangtam: mon’xachea tonddantlem bhair sorta tea dor-eka sabsubea utracho Zhôddtechea Disa hixôb diuncho poddtolo.

³⁷Tujeanch utramnim tum niropradi mhonn ruzu zatelem, ani tujeanch utramnim tum opradi mhonn tujer xikxechem formonn poddtelem.”

³⁸Tedna dhormxastream ani Farizevantleam kãi zannamnim Tachê kodde uloun mhonn’lem: “Guruji, Tujê koddli amkam êk khunna polleunk zai.”

³⁹Tannem oxi zap dili: “Hi atanchi khotti ani ghatki pinddka êk khunna sôdta. Punn, Jonas provadeachi khunna kaddun, Dev tika dusri khunna diuncho na;

⁴⁰mhonngê, zoso Jonas tin dis ani tin rati tivmaxeachea pottant aslo, tosoch Mon’xacho Put tin dis ani tin rati zomnichea pottant astolo.

⁴¹Zhôddtechea Disa Ninivecho lôk hê pinddkê borabôr ubo zatolo ani ticho guneanv dakhoun ditolo, kiteak Jonasachem provochon aikun tannem aplem jivit-mon bodôl’lem; ani polleiat, Jonasa poros vorto hanga asa Eklo.

⁴²Zhôddtechea Disa Dokhinnechi ranni hê pinddkê borabôr ubi zateli ani ticho guneanv dakhoun diteli, kiteak ti prithumechê ximer thaun Solomanvachem xanneponn aikunk ail’li; ani polleiat, Solomanva poros vorto hanga asa Eklo.”

⁴³“Mhello atmo mon’xa velo bhair sortôch sukea soddear visôv sodit bhonvta, punn taka visôv mellonam.

⁴⁴Tedna to mhonnta: ‘Bhair sorlolom tea mhojea ghorant porot rigtolom hanv.’ Ani thõi ie zalear, tem ritem, zhaddlelem ani nettoilelem taka mellta;

⁴⁵tedna vochun, apnna-vôn odik noxtte anink sat atme apnna borabôr gheun ieta; ani bhitôr rigun, thõi to aplem tthikann korta, ani tea mon’xachi magirli doxa adlê goti poros paxtt zata. Hê khottê pinddkek-ui toxench ghòddtelem.”

⁴⁶Oxem To loka kodde uloita thõich astana, ovchit Tachi avoi ani Tache bhav pavun sorlim ani bhair ubim ravun Tachê kodde ulounk sôdtalim.[3]

⁴⁷

⁴⁸Punn Apnnak ti khobor ditelea lagim uloun, Jezun oxem mhonn’lem: “Mhoji avoi konn? Mhoje bhav konn?”

⁴⁹Ani Apleam xisank hat dakhoun Tannem mhonn’lem: “Him asat Mhoji avoi ani Mhoje bhav;

⁵⁰karonn sorgar asto Mhojea Bapachi khuxi kortat titlim-i Mhozo bhav, Mhoji bhoinn ani Mhoji avoi.”