Read Goan Konkani Mt 14 Bible Online

Mt 14 - Goan Konkani bible

Mt 14

¹Team disamnim Jezuchi kirti upraza Herodichea kanar poddli

²ani tannem aplea razvaddeantleam mon’xank mhonn’lem: “ Juanv Batist ho; to mel’leantlo jivont zala; hea pasot tachê vorvim ochoriam zatat.”

³“Tujea bhavachê bailek tum gheun asai tem tujem kortub sarkem nhoi.”, oxem Juanv Batistan Herodik sanglelem dekhun, Herodias mhonnlolê, aplea bhava Filipachê bailek lagun, Herodinuch Juanv Batistak dhorun bandlolo ani bondkhonnint ghal’lo.

⁵To taka jivexim marunk sôdtalo, punn lokak bhietalo, kiteak lôk Juanvak provadi mhonn man’talo.

⁶Uprant, Herodichea zolmachea disa Herodiasichi dhuv soglleam mukhar ieun nachli ani Herod itlo khuxi zalo,

⁷ki apnna kodde ti magit titlem-i tika ditolom mhonn soput gheun tannem bhasailem.

⁸Aple avoiche xikovnne pormonnem tinnem maglem: “Eka tattant anga ani atam mhaka Juanv Batistachem xins ghalun di.”

⁹Raza khontibhorit zalo, punn soputak lagun ani ponkttik bosleleanchê bhiddek poddon, tannem ti tika diunk laili;

¹⁰ani monis dhaddun bondkhonnint Juanvachem xins kaplem.

¹¹Tachi tokli eka tattant ghalun haddli ani cheddvak dili ani tannem ti aplê avoi-xim vheli.

¹²Juanvache xis aile ani tãnnim tachi kudd vhorun nikhipili, ani vochun Jezuk hi khobor dili.

¹³Hem aikona fuddem, Jezu thõicho bhair sorlo ani hoddear bosun êkê eksurê svater, eklo ravchê khatir, koddsorun gelo; punn hem lokak kolltôch, nogram thaun tim Tachê pattlean pãi-vatten cholun gelim.

¹⁴Hoddea velo denvun Tannem puskôll lokak dekhlo; ani tanche churchure dhorun tancheam vaittakarank borim kelim.

¹⁵Sanjechea vellar Tacheam xisamnim lagim sorun mhonn’lem: “Hi svat eksuri ani sanz zali; mhonntôch lokak dhaddun di; tankam apnnank jevonn-khann viktem gheum-di.”

¹⁶Jezun tankam mhonn’lem: “Tãnnim khõisoruch vechi goroz na; tankam khaunk-jevunk tumich diat.”

¹⁷Punn tãnnim portipall kelo: “Panch undde ani don maslleô kaddun, amchê lagim hanga kãich na.”

¹⁸Tedna Tannem mhonn’lem: “Tim hanga Mhojê-xim haddat.”

¹⁹Lokak Tannem tonnacher jevnnak bosunk lailem; panch undde ani don maslleô hatant gheun, Tannem sorgak dolle ubarle ani Devak dhin’vaslo; magir unddeanche kuddke kele ani xisam lagim dile, ani xisamnim te lokak vanttle.

²⁰Sogllim jevlim ani dhadoxi zalim; ani urlole kuddke-tukdde tãnnim ektthãi kele, bara panttleô upott bhòrloleô.

²¹Bailank ani bhurgeank dhorinastanam jevlele te dadlech sumar panch hozar asle.

²²Ani rokddench Apunn lokak ghora dhaddta mhonnosôr, Jezun xisank hoddear choddunk ani Apnna adim pelê toddi vochunk lailem.

²³Lokak dhaddlea uprant, To ekloch magnnem korunk dongrar gelo. Sanje vell zatôch porian To thõi ekloch aslo.

²⁴Hoddem bhair doriant pavun lharamnim boddovtalem, kiteak portem varem martalem.

²⁵Fantea parar Jezu doriacher cholun tanchê sorxem ailo.

²⁶Ani Taka doriacher cholun ieta to polleun, bhut mhonn somzun te bhiele, ani bhirantin tãnnim bob marli.

²⁷Punn rokddench Jezun tanchê kodde uloun mhonn’lem: “Dhir dhôrat, Hanv To! Bhienakat!”

²⁸Pedrun portipall korun mhonn’lem: “Saiba, Tunch zalear, udkacher cholun Tujê sorxem hanv ie-so kôr.”

²⁹Jezun mhonn’lem: “Ie.” Tedna Pedru hoddea velo denvun Jezu sorxim vochunk udkacher cholunk laglo;

³⁰punn vadoll polleun bhielo ani buddunk laglo. Bob marun tannem mhonn’lem: “Somia, mhaka vattai!”

³¹Ani rokddoch Jezun hat pavoun taka dhôrlo ani mhonn’lem: “Holkea bhavartachea mon’xa, kiteak mhonn dubhavloi tum?”

³²Ani te hoddear choddtat mhonnosôr, varem thamblem.

³³Hoddeant asle tãnnim Tachê mukhar sorpottun mhonn’lem: “Khoreponnim Devacho Put Tum!”

³⁴Ani pelê toddi pavtôch, te Genezaret ganvant aile.

³⁵Tea ganvcheam mon’xamnim Taka ollkhotôch char-ui kodden sangunk dhaddlem; tedna somest vaittakarank Tachê sorxim haddlim;

³⁶Tachea vostrachê degek tori hat lavunk di mhonn Tachê lagim magtalim, ani hat lailo titlim-i sarkim borim zalim.