Read Goan Konkani Mt 15 Bible Online

Mt 15 - Goan Konkani bible

Mt 15

¹Tedna Jeruzalea thaun Farizev ani dhormxastri Jezu-xim aile. Tãnnim mhonn’lem:

²“Purvozamnim korun dovorleli chal Tuje xis kiteak môddtat? Tôr te jevnna adim aple hat dhuinant.”

³Tannem portipall kelo: “Ani tumi tumchê chalik lagun Devachi adnia môddtat tem kiteak?

⁴Tôr Devan sanglam: ‘Bapaik ani avoik man di’; ani ‘bapaik vô avoik xiraptat tim morun vochum.’

⁵Punn ‘Mhojê koddlem kitem-i tuka upkarto aslem, tem hanvem Devak bhettoilam,’ oxem Konn-ui bapaik vô avoik mhonnta

⁶tedna bapaik vô avoik man diuncho tankam anink kaido na .’ tumi mhonntat He baxen tumchê chalik lagun tumi Devachi adnia nopoit keli.

⁷Ddhongiamnô! ‘Ho lôk onttamnim Mhaka vakhannta, punn tanchem kalliz Mhojê thaun pois asa. Ho lok Mhoji puza korta ti polki puza. Ho lok xikoita tim xastram fokot mon’xamnim kel’le kaide!”’, oxem Izaiasan tumchê vixim adim- fuddench sarkench tem sangun dovorlam.

¹⁰Lokak Apnna sorxem apoun Tannem tankam sanglem: “Aikat ani somzun gheiat:

¹¹tonddant bhitôr veta tem mon’xank mhellim korina; punn tonddantlem bhair sorta tench mon’xank mhelloita.”

¹²Tedna xisamnim lagim ieun mhonn’lem: “Hem Tujem utor aikun Farizevank opman zalo mhonn zannoi tum?”

¹³Tannem portipall kelo: “Mhojea sorginchea Bapan lavunk nant tim sogllim zhaddam umtton vetelim.

¹⁴Tanchi khoboruch naka. Te apunnuch kurdde; ani eklo kurdd’do dusream kurddeank vatt dakhoita tedna dog-ui fonddant poddtele.

¹⁵Tedna Pedrun uloun mhonn’lem: “Amkam hê voparichi somzonni di.”

¹⁶Jezun zap dili: “Tumkam ozun somzonni na?

¹⁷Tonddant bhitôr veta titlem-i pottant pavta ani pottantlem bhair veta mhonn tumi somzonant kitem?

¹⁸Punn jem tonddantlem bhair sorta tem kallzant thaun ieta ani tench mon’xank mhelloita.

¹⁹Tôr kallzant thaun bhair sortat vaitt ievzonnô, prannghat, pordvar, kazar zainasleam ekamekacho lingbhog, choriô, lottik govaiô, ninda.

²⁰Mon’xank mhellim kortat tim hinch. Punn hat dhuinastanam jevlear mon’xam mhellim zainant.”

²¹Ani Jezu thõicho bhair sorlo ani Tirachea ani Sidon’chea prantant koddsorun gelo.

²²Ani ovchit teach prantantli Khanaan’chi êk bail, bhair sorun, “Somia, Davidachea Puta, mhoji kaklut kôr! mhojê dhuvek devchar zobôr piddapidd dita.”, oxi huiêli marit, Tache xim aili.

²³Punn Tannem tika êk zap kaddli na. Mhonntoch lagim sorun Tacheam xisamnim Tachê kodde oxem poratun maglem: “ ti amchê pattlean bob marit ieta dekhun tika vochum-di”

²⁴Punn Tannem portipallun mhonn’lem: “Devan Mhaka fokot Israelachea ghoranneacheam sanddleleam xelliam thãi dhaddla.”

²⁵Toripunn lagim ieun, “Somia, mhaka pav!”, oxem mhonnun ti Tachê mukhar sorpottli.

²⁶Tannem zabab diun, oxem mhonn’lem: “Bhurgeancho unddo kaddun, sunneank ghalop mhonnlear sarkem nhoi.”

²⁷“Khorem, Saiba”, Tinnem mhonn’lem: “ Punn aplea dhoniachea meza vele dhornnir poddtat te kuddke sunnim-i khatat.”

²⁸Tedna portipallun Jezun tika mhonn’lem: “Eh ostore, vorto tuzo bhavart! Tuka zai toxem zaum.” Ani tichi dhuv têch ghoddier bori zali.

²⁹Thõicho bhair sorun, Jezu Galileiachea doria-degechean gelo ani dongrar choddun thõi boslo.

³⁰Ani lokacheô urponji longddeank, kurdd’deank,thontteank, moneank ani zaiteam herank gheun Tachê sorxim aileô, ani Tacheam pãiam lagim tãnnim tankam dovorlim ani tankam soglleank Tannem borim kelim.

³¹Mhonn’toch monim uloito, osad poddlelim sarkim zato, longddim cholto ani kurdd’deank dixtti podd’to polleun teo urponji ojap zaleô ani tannim Israelachea Devak mhoima dili.

³²Punn Apnna xim apoun, Jezun Apleam xisank mhonn’lem: “Tin dis zale tim Mhojê borabôr asat ani jevunk-khaunk tanchê kodde kãich na dekhun Mhaka tanche churchure distat. Ani tankam upaxim dhaddunk Mhaka naka. Na zalear tim vatter ghunvoll ieun poddtit.”

³³Xisamnim Taka mhonn’lem: “Tôr hê eksurê svater itlea lokak dhadoxi korunk amchê kodde itle undde khõiche astele?”

³⁴Jezun tankam vicharlem: “Tumchê lagim kitle undde asat?” Tãnnim sanglem: “Sat, ani thoddeo daktteo maslleo.”

³⁵Tedna Jezun lokak dhornnir bosunk lailo.

³⁶Tannem sat undde ani maslleô ghetlim ani Devak dhin’vasun tanche kuddke kele ani Tannem te xisankodde dile ani xisamnim te lokak vanttle.

³⁷Tim sogllim jevlim ani dhadoxi zalim. Ani urloleam kuddkeam-tukddeancheô sat panttleô tãnnim bhôrleô.

³⁸Bhurgeank ani bailank dhorinastanam jevlele te dadlech char hozar asle.

³⁹Ani lokak ghora dhaddtôch To hoddear choddlo ani Magedan’chea prantant gelo.