Read Goan Konkani Mt 16 Bible Online

Mt 16 - Goan Konkani bible

Mt 16

¹Farizev ani Saduki Tachê-xim aile ani Tachi porikxa korunk apnnank sorga veli êk khunna dakhoi mhonn Tachê kodde magunk lagle.

²Tannem oso portipall kelo: “Sanz zatôch tumi oxem mhonntat: ‘Mollob tambddem zal’lem asa dekhun, az xitollai asteli’;

³ani sokallim tumi mhonntat: ‘Mollob tambsar zalam ani molbhott asa dekhun, az modd astelem.’ Mhonntôch mollbachem rup tumi ollkhunk zannont, punn hea kallacheô khunna mat tumchean ollkhunk zaina !

⁴Hi atanchi khotti ani bhavart-nasleli pinddka khunna sodta! Punn Jonasachê khunnê bhair Dev tika her dusri anink khuinchi-i khunna diuncho na.” Ani tankam thõich sanddun To gelo.

⁵Xis doriachê pelê toddi ietana undde haddunk visorlole.

⁶Jezun tankam sanglem: “Polleiat, Farizevanchê ani Sadukinchê fugi vixim chotraien cholat.”

⁷Ani te apnnam modem mhonnunk lagle: “Ami undde haddunk nant dekhun To oxem mhonnta.”

⁸Ani te vixim zanna zaun Jezun mhonn’lem: “Undde haddunk nant dekhun mhonn kiteak tumchêch modem uloitat tumi? Unnea bhavartacheamno?

⁹Ozun porian somzunk nant tumi? Panch undde panch hozar dadleank pavoile ani kitleô panttleô tumi bhorun kaddleô, hacho tumkam ugddas na?

¹⁰Toxench sat undde char hozar dadleank pavoile ani kitle korondd tumi bhorun kaddle, tacho-i bi tumkam ugddas na?

¹¹Unddeam vixim nhoi, punn Farizevanchê ani Sadukinchê fugi vixim chotraien cholunk, Hanv tumche kodde uloilom tem tumi somzunk nant tem koxem?”

¹²Tedna unddeanchê fugi vixim nhoi, punn Farizevanchê ani Sadukinchê xikovnnê vixim chotraien cholat, oxem Tannem mhonnlelem mhonn te somzole.

¹³Filipa Xezareiachea prantant pavtôch Jezun Apleam xisam kodde vicharlem: “Mon’xachea Putak lôk konn mhonn dhôrtat?”

¹⁴Ani tãnnim zobab dilo: “Kãi zonnam Juanv Batist, konn-konn Elija, dusrim konn-konn Jeremias vô provadeantlo konn-eklo, oxem mhonntat.”

¹⁵Tannem vicharlem: “Tôr tumi Hanv konn mhonntat?”

¹⁶Tedna Simanv Pedru oso uloilo: “Krist To Tum, jivea Devacho Put!”

¹⁷Zobab diun, Jezun taka mhonn’lem: “Simanv, Jonachea puta, tum subhagi, kiteak rogta-masan nhoi punn sorgar asto Mhojea Bapan hem tuka ugtem kelam.

¹⁸Tôr Hanv-ui tuka sangtam: tum Pedru, mhonngê khoddop ani hea khoddpacher Hanv mhoji sobha bandtolom, ani ticher zoit vhorunk emkonddak legun podvi aschi na[5]

¹⁹Hanv tuka Sorginchea Rajeacheô chaviô ditolom; jea kiteak sonvsarant tum na mhonnxi, taka sorgar Dev na mhonntolo; ani jea kiteak sonvsarant tum hôi mhonnxi, taka sorgar Dev hôi mhonntolo.”

²⁰Magir Apunn Krist mhonn konnakuch sanginam zaunk Tannem xisank khôr adnea dili.

²¹Tedna thaun Jezu Apleam xisank spôxtt sangunk laglo: “Devachê khuxê pormannem, Hanv Jeruzaleak vecho asam; zannteanchea, mukhel iadnikanchea ani dhormxastreanchea hatantlem Hanvem zaitem sõschem asa; te Mhaka jivexim martele; ani tisrea disa Dev Mhaka punorjivont kortolo.”

²²Tedna, Taka kuxin vhorun, Pedru oso Taka bhexttaunk laglo: “Kednanch na, Saiba! hem Dev Tuka kednanch nirminam zaum!”

²³Ani Tannem vollon Pedruk sanglem: “Mhojê mukhavelo voch, Soitana! Hanv adllon poddunk Mhojê vatter ubo zal’lo fatôr tum; kiteak tujem chintop mon’xanchem, tem Devachem nhoi.”

²⁴Tedna Jezun Apleam xisank mhonn’lem: “Konnank Mhozo pattlav korchi khuxi asa zalear, tãnnim apnnanchêch khuxechi vatt sôddchi, aplo khuris ukôlcho ani Mhojê pattlean ieunchem.

²⁵Kiteak jim konn aplo jiv samballun dhorunk sôdtat, tim aplo jiv hogddaitelim; punn jim konn Mhojê khatir aplo jiv hogddaitat, tim aplo jiv samballun dhôrtelim.

²⁶Tôr sogllo sonvsar zôddit ani aplo jiv ibaddit zalear, mon’xak koslo adav? Vô aplea jivachê bodlek mon’xan kitem diunk zait?

²⁷Mon’xacho Put Apleam dutam borabôr Aplea Bapachê mhoimen ietolo, ani tedna zonn-ekleak ap-apleam kornneam pormannem inam’ ditolo.

²⁸Hanv tumkam khorench sangtam: hanga asat tantlim kãi zonnam Aplea rajeant ieto, Mon’xachea Putak polleunchê adim morchim nant.”