Read Goan Konkani Mt 17 Bible Online

Mt 17 - Goan Konkani bible

Mt 17

¹Sov disam uprant Pedruk, Jakobak ani tachea bhava Juanvak Jezun eka unch dongrar kuxin vhele

²ani tanchê mukhar Tachem rup bodòl’lem. Tachem mukhamoll suria porim loklokit zalem ani Tachim vostram uzvadda porim dhovim-ful zalim.

³Ovchituch Moizes ani Elija Tachê kodde uloito tankam dixtti poddle.

⁴Tedna Pedrun Jezuk mhonn’lem: “Somia, ami hangach ravlear borem. Tuka zai zalear, tin tombu hanga hanv ubartam: êk Tuka, êk Moizesak ani êk Elijak.”

⁵To uloita thõich astana, tankam eka porzollit kupan dhample ani, “Ho Mhozo Put, kherit opurbaiecho; Tacher asa Mhojem dhadosponn. Tachem tumi aikat.” oso tea kupantlo êk tallo aikum ieilo.

⁶Hem aikun, xis omte poddle ani ekdom’ bhiele.

⁷Punn Jezun lagim sorun tankam hat lailo ani mhonn’lem: “Utthat, bhieum nakat.”

⁸Dolle ugddun polle zalear, tankam Jezu bogor anink konnuch dislo na.

⁹Dongra vele denvtastana, Jezun tankam oxem formailem: “Mon’xacho Put mel’leantlo punorjivont zait porian hea dorxonachi khobor konnakuch sanginakat.”

¹⁰Ani Tacheam xisamnim Tachê kodde oxem vicharlem: “Elija poilo ieunk zai, oxem dhormxastri kiteak mhonntat tôr?”

¹¹Tannem oxi zap dili: “Elija ietolo khoro, ani sogllem tharear ghaltolo;

¹²punn Elija ailo mhonn Hanv tumkam sangtam, ani tãnnim taka ollkhun ghetlo na ani apnnank zai toxem tannim taka kelem. Têch porim Mon’xachea Putan-ui tanchea hatantlem sõschem asa.”

¹³Tedna Juanv Batista vixim To uloitalo mhonn xis somzole.

¹⁴Ani Jezu lôk aslo thõi pavtôch êk dadlo Tachê sorxim ailo, ani Tachê mukhar dimbi ghalun,

¹⁵tannem mhonn’lem: “Somia, mhojea putachi kaklut kôr! taka moddnnem marta ani to chôdd koxttovta; sobar pavtti ujeant ani bhonvn-bhonvn udkant to poddta;

¹⁶hanvem taka Tujeam xisam sorxim vhelo, punn tanchean taka boro korunk zalem na.”

¹⁷Tedna Jezun portipallun mhonn’lem: “Bhavart nasloli ani khotti pinddka tumi! Kitlo vêll mhonn tumchê sorxem Hanvem ravchem? Kedna porian Hanvem tumkam sõschim? Taka hanga Mhojê-xim haddat.”

¹⁸Ani Jezun taka bobatt kortôch, devchar tachê velo bhair sorlo ani to bhurgo têch ghoddier thaun boro zalo.

¹⁹Tedna Jezu sorxem kuxin ieun xisamnim vicharlem: “Taka bhair ghalunk amchê kodde kiteak ghòddunk na?”

²⁰Jezun tankam sanglem: “Tumcho bhavart unno dekhun. Hanv tumkam khorench sangtam: sansvachea konnea edo tumkam bhavart asot zalear, hea dongrak tumi mhonntelet: ‘Hanga thaun thõi voch!’, ani to vetolo; ani tumchean korunk zaina toslem kãich aschem na.”[6]

²²Te Galileiant ektthovlele astana, Jezun tankam mhonn’lem: “Mon’xacho Put mon’xanchea hatant poradhin zatolo,

²³te Taka jivexim martele ani tisrea disa Dev Taka punorjivont kortolo.” Hem aikun tankam motti khônt zali.Devmondirachi Pott’tti Farik Korop

²⁴Te Kapernaumant pavtôch, Devmondirachi pott’tti gheteleamnim Pedru sorxem ieun vicharlem: “Tumcho Guru ordea staterachi[7] devosthana-pott’ti farik korinam?”

²⁵Tannem zobab dilo: “Korta.” Ani oxem mhonnun to ghorant bhitôr gelo. Punn to ulounchê adinch Jezun taka mhonn’lem: “Simanv, tuka kitem dista? Sonvsarantle raza konnam koddcho dôndd vô pott’tti ghetat? Apleam nagrikam koddcho vô porkeam koddcho?”

²⁶Tannem zobab dilo: “Porkeam koddcho.” “Mhonntôch nagrik suttlim.

²⁷Punn tankam vaitt dêkh dina zaunk, doriant vochun gori ghal, ani poili choddta ti maslli dhôr, tichem tondd ugôdd ani tantum tuka êk stater melltolo; to ghe ani Mhojea ani tujea nanvan tankam di.”