Read Goan Konkani Mt 18 Bible Online

Mt 18 - Goan Konkani bible

Mt 18

¹Ekdam xisamnim Jezu-xim ieun vicharlem: “Sorgarajeant soglleam-von vhôdd konn?”

²Tedna Jezun, eka dhakttea bhurgeak apoun haddun, taka tanchê modem ubo kelo

³ani mhonn’lem: “Hanv tumkam sot sangtam: tumchem jivit-mon bodòl’lea bogor ani tumi novean dhakttuleam bhurgeam vori zalea xivai, tumi Sorgarajeant bhitôr sorchinch nant.

⁴Mhonntôch konn-ui apnnankuch hea bhurgea porim lhan kortit zalear, tim Sorgarajeant soglleam-von vhodd.

⁵Eka dhakttulea oslea bhurgeak konn Mhojea nanvan ghetit zalear, tim Mhakach ghetat.

⁶Punn Mhojer bhavart dovorteleam heam lhanam modlea ekleak ho bhavart soddunk konn-ui oddun vhortit tôr, danteachem ek pedd tanchea golleak bandun tankam khôl doriant buddoilear odik borem.

⁷Dusreank bhavart soddunk oddun vhortat tosleam mon’xam pasot sonvsarachem kotta! herank bhavart soddunk oddun vhortat toslim mon’xam astelinch; punn jim konn dusreank bhavart soddunk oddun vhortat, tanchem kotta-kotta!

⁸Tumcho hat vô pãi bhavart soddunk tumkam oddun vhorta zalear, to katrun uddoiat ani bhair marat; don hat vô don pãi asun sasnnachea ujeant tumkam uddoil’lê poros, lunddim vô thonttim zaun Jivitant bhitôr sorlear tumkam odik borem.

⁹Ani tumcho dollo bhavart soddunk tumkam oddun vhorta zalear, to umttun kaddat ani bhair uddoiat; don dolle asun ujeachea emkonddant tumkam uddoil’lê poros, êkuch dollo gheun Jivitant bhitôr sorlear tumkam odik borem.

¹⁰Polleiat, heam dhakttuleantlea ekleachi legun tumi beporva korum noiê, karonn, Hanv tumkam sangtam, sorgar tanche dut sorgar asto Mhojea sorgim-Bapachem mukhamoll thambonastanam polleit asat.[8]

¹²Tumkam kitem dista? Konn-eklea mon’xa kodde xembhôr xelliô astit ani tantuntli êk sanddlea zalear, nnoian’nnoi dongrancher soddun, hinddantli koddsorun gelea tika to sodunk vecho na kai?

¹³Ani Hanv tumkam khorench sangtam: ti mell’li zalear, sanddunk nasleleam nnoian’nnoi xelliam poros, hichê vixim to odik khuxal zata.

¹⁴Hêch baxen heam dhakttuleam bhitorlo eklo-i ibaddlolo tumchea Sorgim-Bapak naka.

¹⁵Tuzo bhav tujer patok korit zalear, voch ani tumam-doganchêch bhitôr tachi chuk taka dakhoi. Tujem to aikot zalear, tujea bhavak tunvem zoddun ghetlo.

¹⁶Tuka to aikona zait zalear, ‘dogam vô tegam sakxeanchê govaikecher sogllo tonn’to ruzu zaunk zai’ dekhun, tujê borabôr anink ekleak vô dogank gheun voch.

¹⁷Punn tankam-i aikona zait zalear, sobhek kolloi; sobhek aikonai zait zalear, tedna tosleak sobhê bhailo vô dônddvosuldar zaum-di.

¹⁸Hanv tumkam khorench sangtam: jea kiteak sonvsarant tumi na mhonnxeat, taka sorgar Dev na mhonntolo; ani jea kiteak sonvsarant tumi hôi mhonnxeat, taka sorgar Dev hôi mhonn’tolo.

¹⁹Anink ek Hanv tumkam sangtam: tumchê bhitorlim dogam zannam sonvsarant kiteai vixim magunk eka monachim zatit zalear, Mhozo sorgim-Bap tem tumkam ditolo;

²⁰kiteak dogam vô tegam zannam Mhojea nanvan ektthãi zatat thõi tanchê modem Hanv asam.”

²¹Tedna Tachê sorxem vochun Pedrun Taka mhonn’lem: “Somia, kitlê pavtti mhojea pelean mhojer chuk kelear hanvem taka bhôgsuncho? Sat pavtti legun?”

²²Jezun taka oso zobab dilo: “Sat pavtti nhoi, punn sot’tôr pavtti sat!

²³Hea pasot, Apleam chakrancho hixôb tharear ghalunk sodto konn eka patxaia porim sorginchem raj.

²⁴Hixôb gheunk suru kortôch, dha hozar talentanchem[9] vorixtt rinn aslelea eka chakrak raza mukhar haddlo.

²⁵Farik korunk tachê kodde kãich naslem dekhun, tachê bailek, bhurgeank soit tachê lagim aslem-naslem titlem-i vikunk ani rinn farik korunk tachea dhonian hukum’ ghalo.

²⁶Mhonn’toch, ‘Tokôs kaddun matso rav, sogllem tujem hanv farik kortam.’ oxem mhonnun, to chakor tacheam pãiam poddlo.

²⁷Tea chakrache churchure dhorun, tea dhonian taka soddlo ani tem rinn-ui taka bhogxilem.

²⁸Ho chakôr bhair gelea uprant, taka fokot xembhôr holke dinar[10] devo aslolo êk vangddi-chakôr taka mell’lo ani taka dhorun to tachi gomtti pillunk laglo. Tannem mhonn’lem: ‘Mhojem rinn farik kôr!’

²⁹Punn tacho vangddi tacheam pãiam poddun tachê kodde oxem magunk laglo: ‘Tokôs kaddun matso rav, sogllem tujem hanv farik kortam.’

³⁰Tori to aikonam zalo, punn gelo ani aplem rinn farik korit porian tannem tea vangddea-chakrak bondkhonnint ghalo.

³¹Hem ghòddlelem polleun, tache her vangddi-chakor bhov dukhovle, ani vochun ghòddlelem titlem-i tãnnim aplea dhoniak kollit kelem.

³²Tedna dhonian taka apoun haddun mhonn’lem: ‘Khottea chakra, tunvem mhojê kodde magli dekhun, hanvem tuka sogllem tujem rinn bhôgxilem.

³³Tôr mhaka tuji doia disli toxich, tuka tujea vangddea-chakrachi doia disunk naka asli?’

³⁴Ani ragabhorit zaun, tannem sogllem aplem rinn farik kori porian, dhonian taka kosabanchea hatant ghalo.

³⁵Tumi zonn-eklo tumchea peleak kallzant thaun bhôgxina zaxeat zalear, Mhozo sorgincho Bap-ui tumkam bhôgxicho na.”