Read Goan Konkani Mt 19 Bible Online

Mt 19 - Goan Konkani bible

Mt 19

¹Ho updês dilea uprant, Jezu Galileia soddun gelo ani Jordanachê poltoddi Judeiachea prantant ailo.

²Puskôll lôk Tachê pattlean gelo ani thõi Tannem tankam borim kelim.

³Farizev Tachê-xim aile ani Taka kosak lavunk tãnnim vicharlem: “Koslea-i karonnak lagun ghovachean aplê bailek soddun dium-ieta?”

⁴Tannem oso zobab dilo: “Survatek Devan tankam kelim, ‘tankam dadlo ani bail kelim’,

⁵ani Tannem mhonn’lem: ‘Hea pasot monis aplea avoibapaik sanddtolo ani aplê potinnik ektthovtolo ani dogam-i êk zatelim’, oxem tumi vachinaslam?

⁶Mhonntôch tim anink dogam nhoi, punn êk . Hea pasot Devan zôddlam tem mon’xan doxim korum noiê.”

⁷Tãnnim Taka vicharlem: “konn aplê potinnik soddun dita zalear, tika ghottsfottichem potr diun sôddchi mhonn Moizesan hukum’ ghala tachem karonn kitem tor?”

⁸Tannem zap dili: “Tumchea kallzache niborsannek lagun Moizesan tumcheam potinnink soddun diunk tumkam rojea dili; punn orombak thaun oxem nhoi aslem.

⁹Tôr Hanv tumkam sangtam: Somurticher add logn-sombondant jietelea karanna bhogor konn-ui aplê potinnik soddun diit ani dusrê kodde logn zait, to pordvar korta.”

¹⁰Tacheam xisamnim Taka mhonn’lem: “Aple potinikodde dadleachi poristhiti oxi zait zalear, lognuch zainastanam ravlear odik borem.”

¹¹Punn Tannem oxi tankam zap dili: “Hem mandun gheunk soglleanchean zainam. Zankam Devan hem dennem favo kelam tancheanuch zata.

¹²Avoichea kusveant thaun izdde zolmolele asat, ani mon’xamnim kel’le izdde asat, ani sorginchea rajeak lagun apnnankuch izdde korun ghevpi asat. Mandun gheunk zata tãnnim hem mandun gheunchem.”

¹³Jezun supurleam bhurgeancher Aple hat dovrunk ani magnnem korunk lokan tankam Tachê sorxem haddlim. Xis tankam bobatt korunk lagle,

¹⁴punn Jezun sanglem: “Bhurgeank Mhojê sorxim ieunk diat ani tankam addainakat, kiteak Sorginchem Raj osleanchench.”

¹⁵Magir tancher Tannem Aple hat dovorle ani thõicho bhair sorun To Aplê vatten gelo.

¹⁶Ani ovchit lagim ieun konn-eklean Taka vicharlem: “Guruji, mhaka sasnnik jivit mellcheak hanvem kitem borem korunk zai?”

¹⁷Ani Tannem zap diun taka sanglem: “Kitem borem tea vixim Mhojê lagim kiteak vichartai? Boro to Ekloch Dev. Punn tum jivitant bhitôr sorunk sôdtai zalear, adnea samball.”

¹⁸Tannem vicharlem: “Konn teô?” Jezun sanglem: “Heô: jivexim marum noiê; pordvar korum noiê; chorum noiê; lottik-govai dium noiê;

¹⁹tujea bapaik ani avoik man di; ani tuzo môg kortai tosoch tujea peleacho kôr.”

²⁰Tea tornnattean Taka zabab dilo:”Heô soglleô adnea hanvem samball’leat; mhaka kitem ozun unnem asa?”

²¹Jezun taka sanglem: “Tuka sompurnn zaunchi khuxi zalear, voch, tujê lagim asa titlem-i vikun goribank di, ani sorgar tuka tthevo melltolo; tea magir Mhojê pattlean ie.”

²²Punn hem utor aikotôch to khontibhorit zaun gelo; tôr taka puskôll girestkai asli.

²³Tedna Jezun Apleam xisank mhonn’lem: “Hanv tumkam sot sangtam: eka girest mon’xak Sorginchea Rajeant bhitôr sorunk kotthin.

²⁴Hôi, anink-ui sangtam: eka girest mon’xak Sorginchea Rajeant bhitôr sorchê poros, eka unttak suiechea birddeantlean vochunk odik sompem.”

²⁵Hem aikun xis bhov thottakle. Tãnnim mhonn’lem: “Toxem zalear, konnak mhonn taronn melltelem?”

²⁶Jezun tancher nodor marun mhonn’lem: “Mon’xam kodde hem zaina, punn Deva lagim sogllem zata.”

²⁷Tedna zap diun Pedrun mhonn’lem: “Polle, ami sogllem sanddlam ani Tuzo pattlav kela; tôr amkam kitem melltelem?”

²⁸Jezun tankam sanglem: “Khorench Hanv tumkam sangtam: Novo Sorg ani Novi Prithum zaunchea vellar, Mon’xacho Put Aplea mhoimechea xinvasonar bostolo tedna, Mhozo pattlav kela te tumi-i bara xinvasonancher bostelet ani Israelacheam bara kullancher odhikar choloitelet.

²⁹Ani zãnnim Mhojea Nanva khatir ghor-dar vô bhav vô bhoinni vô bapui vô avoi vô bail vô bhurgim-ballam vô xetam-bhattam sanddleant, tim xembhôr pavtti odik ghetelim, ani sasnnik jivit tanchem daiz zatelem.

³⁰Sobar zannam poilim asat tim nimannim zatelim ani nimannim tim poilim zatelim.”