Read Goan Konkani Mt 2 Bible Online

Mt 2 - Goan Konkani bible

Mt 2

¹Herod raza razvôtt choloitalo tedna, Judeiachea Bethlehemant Jezu zolmolea uprant ovchituch Udenti thaun kãi vidvan Jeruzaleak aile

²ani oxem tãnnim vicharlem: “Zolmola to Judevancho raza khõi asa? Tachem noketr udetanam ami pollelam ani sorpottun taka nomoskar korunk ami aileanv.”

³Hem aikun Herod raza ghaborlo ani tachê borabôr akhem Jeruzalem.

⁴Somest mukhel iadnikank ani porjecheam dhormxastreank zomoun, Krist khõi zolmuncho asa tê vixim to tanchê kodde khobor kaddunk laglo.

⁵Tãnnim taka oso zobab dilo: “Judeiachea Bethlehemant, kiteak provadea vorvim oxem boroilelem asa:

⁶‘Ani tum, Judachea prantantlea Bethlehema, Judacheam mukheleam modem koxêch bhaxen soglleam-vôn lhan nhoi tum! Kiteak tujê thaun nipzotolo êk fuddari ani toch Mhojê Israel-porjecho gonvlli zatolo.’

⁷Tedna Herodin team vidvanank guptim kuxin vhele ani noketr kedna dixtti poddlelem tê vixim tannem tanchê kodde barkaien khobor kaddun ghetli,

⁸ani tankam Bethlehemak dhaddun mhonn’lem: “Vochat, ballkachi sarki khobor gheiat, ani to tumkam melltôch, hanvem-i sorpottun taka nomoskar korunk vechê khatir, mhaka kolloiat.”

⁹Razachem aikun te vattek lagle; ani tãnnim udetanam dekhlelem tem noketr ovchit tanchê mukhar vochunk laglem, ani ballôk aslo thuim tharlem.

¹⁰Noketr polleun te ekdomuch khuxalbhorit zale.

¹¹Ani ghorant bhitôr sorun ballkak Tachê avoi Mariechea sangata tãnnim dekhlo, ani saxttangim poddun tãnnim Taka nomoskar kelo. Uprant, aplim bhanddaram ugddun, Taka him dennim somorpilim: bhangar, dhump ani gondhrôs.

¹²Punn Herodi-xim porot vochona zaunk, Devan tankam sopnant xiddkaile, ani dusrê vatten aplea desant te portole.

¹³Te vochona fuddem, ovchituch êk devdut Juzek sopnant dixtti poddlo; tannem mhonn’lem: “Utth, tôr Herod ballkacho jiv kaddunk Tachi sôd korcho asa dekhun ballkak ani Tachê avoik ghe ani Ejiptak pollun voch, ani hanv sangin porian thõi rav.”

¹⁴Juze utthlo ani, Ballkak ani Tachê avoik gheun, têch rati Ejiptak pollun gelo,

¹⁵ani Herod moro-sôr thõi ravlo. “Ejiptak thaun Mhojea putak Hanvem apoun haddlo”, oxem Sorvesporan provadea vorvim sanglelem utor pallon ieunchê khatir hem ghòddlem.

¹⁶Tedna Vidvanamnim apnnak fottoilo mhonn polleun, Herod ekdom’ ragabhorit zalo ani Bethlehemant ani tea akhea jil’leant, aple monis dhaddun vidvanam kodde khobor kaddun ghetlelea kallachea hixoba pormannem, don vorsancheam vô unnê piraiecheam ballkank marun uddoile.

¹⁷Tedna, “Mottea roddnneachi ani vilapachi êk bob Ramant aikunk aili, Aplim bhurgim anink nant dekhun, tanche khatir rodd’to Rakel buzvônn gheunk nakarta”, oxem Jeremias provadea udexim sanglelem aslem tem pallon ieilem.

¹⁹Herod mortôch ovchituch devdut Ejiptant Juzek sopnant dixtti poddlo;

²⁰tannem oxem mhonn’lem: “Utth, ballkak ani Tachê avoik ghe ani Israel desant porto voch, kiteak ballkacho jiv kaddunk sôdtale te morun gele.”

²¹To utthlo ani ballkak ani Tachê avoik gheun Israel desant porot gelo.

²²Punn aplea bapai Herodichê svater Arkelav Judeiant razvôtt choloita mhonn aikun, thõi vochunk to bhielo; ani sopnant apnnak oso xiddkailo mhonnun, Galileia prantant gelo.

²³Thõi Nazaret mhonntat tea nogrant tannem tthikann kelem. “Taka Nazaretkar mhonn nanv poddtelem”, oxem provadea udexim sanglelem utor pallon ailem.