Read Goan Konkani Mt 20 Bible Online

Mt 20 - Goan Konkani bible

Mt 20

¹“Aplea dakam-molleant vauraddi launk bhov sokallim bhair sorun gelelea eka bhattkara porim Sorginchem Raj.

²Disvoddeak êk dinar farik korunk vavraddeam lagim koblat korun, tannem tankam aplea molleant dhaddle.

³Sumar nov vaztam bhair sorun tinttear bekar asleleam herank tannem dekhle

⁴ani tankam mhonn’lem: ‘Tumi-i mhojea molleant vochat ani hanv tumkam favo tem ditolom.’

⁵Ani te gele. Portun bara ani sanjechim tin vaztam bhair sorun tannem toxench kelem.

⁶Sumar panch vaztam to anink êk pavtt bhair sorlo ani anink-ui ube aslele taka mell’le, ani tannem tankam mhonn’lem: ‘Tumi akho dis hangasôr kiteak bekar ravleat?’

⁷Tãnnim zobab dilo: ‘Amkam konnench vavrak lavunk nant dekhun.’ Tannem tankam sanglem: ‘Tumi-i mhojea molleant vochat.’

⁸Tin’sanam molleachea dhonian aplea mukdomak mhonn’lem: ‘Vavraddeank apoi ani nimanneam thaun suru korun poileank porian disvoddo di.’

⁹Sumar panch vaztam kamak laglele te aile ani zonn-ekleak êk dinar mell’lo.

¹⁰Poile ailele te lagim sorun apnnank odik melltelem mhonn somzole, punn tankam-i zonn-ekleak êkuch dinar mell’lo.

¹¹Tãnnim to ghetlo khoro, punn te bhattkaracher gunn-gunnun mhonnunk lagle:

¹²‘Heam nimanneamnim êkuch tas-bhôr kam’ kelam ani ami zalear akhea disacho bhar ani hulop ghetleat, tori amkam ani tankam tunvem eksarke kelei.’

¹³Punn tantlea ekleak zobab diun tannem sanglem: ‘Ixtta, hanv tuka onit korinam; tôr eka dinarachi tunvem mhojê kodde koblat korunk nãi?

¹⁴Tujem tem ghe ani voch. Tuka dilam titlench heam nimanneank-ui diunk mhaka khuxi.

¹⁵Tôr mhojeam poixeanchem mhaka zai tem mhojean korum nozo? Vô hanv boro mhonn tuzo dollo futtlo?’

¹⁶Hêch porim nimannim tim poilim zatelim ani poilim tim nimannim zatelim.”

¹⁷Jeruzaleak choddon vetana, Jezun vatter bara xisank kuxin vhele ani tankam sanglem:

¹⁸“Polleiat, ami Jeruzaleak choddot vetanv ani Mon’xachea Putak mukhel iadnikanchea ani dhormxastreanchea hatant ghaltele; Tacher te mornnachem formonn martele

¹⁹ani Tacheô moskoreô korunk, Taka jerbond diunk ani khursar marunk Taka videxeanchea hatant poradhin kortele; ani tisrea disa Dev Taka punorjivont kortolo.”

²⁰Tedna Zebedevacheam putanchi avoi Tachê sorxem apleam putank gheun aili ani Tacheam pãiam poddun Tachê kodde ek upkar magunk lagli.

²¹Tannem tika mhonn’lem: “Tuka kitem zai?” Tinnem mhonn’lem: “Heam mhojeam dogam putank, ekleak Tujea uzvea hata ani dusreak davea hata, Tujea Rajeant bosunk lai.”

²²Jezun portipall kelo: “Tumi kitem magtat tem tumich nokllot. Hanv pietolom tea patrantlem tumchean pieum ietelem?” Tãnnim mhonn’lem: “Hôi, pieum ieta.”

²³Tannem tankam sanglem: “Mhojea patrantlem tumi pietelet khore, punn Mhojea uzveak vô daveak bosunk diunk Mhojê adhin na; te zage Mhojea Bapan nirmun dovorleat tankam.”

²⁴Hem aikun her dha zann team dogam bhavancher chiddle.

²⁵Punn Jezun tankam Apnna sorxem apoun haddun sanglem: “Videxeam modem tanche odhikari tancher apli podvi zobordosten choloitat mhonn ani toxench tanche vhoddil aplê sot’techo bhar tancher ghaltat mhonn tumi zannont.

²⁶Tumchê modem oxem zaunchem nhoi! Na, tumchê modem konn vhoddlo zaunk sodit to tumcho sevôk zauncho;

²⁷tumchê modem konn poilo zaunk sodit to tumcho gulam’ zauncho.

²⁸Oxench Mon’xacho Put herank Aplê chakrek lavunk ieunk na, bogor heranchi chakri korunk ani somestanchê soddvonnê pasot Aplo jiv diunk aila.”

²⁹Te Jerikea thaun vetana, lokachi vhôdd urpônz Jezu pattlean geli.

³⁰Ovchit dog kurdde vattechê deger bosun asle; tevxilean veta to Jezu mhonn aikotôch, te oxi bob marunk lagle: “Saiba, Davidachea Puta, amchi kaklut kôr!”

³¹Oge ravat mhonn lokan tankam bobatt keli; toripunn te odik vhoddlean toxich bob marit ravle: “Saiba, Davidachea Puta, amchi kaklut kôr!”

³²Jezu thamblo ani tankam apoun haddun Tannem vicharlem: “Hanvem tumkam kitem kel’lem zai?”

³³Tãnnim mhonn’lem: “Saiba, Tunvem amche dolle ugôddlele amkam zai.”

³⁴Tanche churchure dhorun Jezun tancheam dolleank hat lailo; ani rokddich tankam nodor aili ani te Tachê pattlean gele.