Read Goan Konkani Mt 21 Bible Online

Mt 21 - Goan Konkani bible

Mt 21

¹Jeruzalea lagim ietôch, Olivet Dongra sorxim Betfage pavlea uprant, Jezun dogam xisank daddle,

²tankam oxem sanglem:”Tumchea fuddeant asa tea gramant vochat. Thõi rokddem ek bandlelem gaddum ani tachea sangata tachem xingrum tumkam melltelim. Tankam sôddat ani Mhojê sorxim haddat.

³Konn-ui tumkam kitem mhonnot tôr, Somiak tanchi goroz asa mhonn sangat, ani to rokddoch tankam vhorunk ditolo.”

⁴Provadea vorvim Devan sangun dovorlelem tem pallchê khatir:

⁵“Zion Xarak sangat : Ho polle tuzo Rai tujê-xim ieta; to vinômr-khalto; eka gaddvacher ani tachea xingracher, zum ghetlelê avoichea poracher, to bosun ieta.”, hem sogllem ghoddon ailem.

⁶Xisamnim vochun Jezun tankam formail’lem toxem kelem.

⁷Ani gaddvak ani xingrak haddun tãnnim tancher aplim avoronnam ghalim ani Jezuk voir bosoilo.

⁸Khup lokan aplim avoronnam vatter patllailim; dusrim kãi zannam, zhaddanche talle moddun, te vatter ximpddaitalim.

⁹Fuddlean ani pattlean vetalo to lôk bob marun mhonntalo: “Davidachea Putak zôi ! Sorvesporachea nanvan ieta taka zôi! Bhov vortea Devak zôi! zôi!” [11]

¹⁰Ani Jeruzaleant provês kortôch, “ho konn kai?” mhonnun akhem xar chollboll’lem.

¹¹Lôk zobab diun mhonntalo: “Ho Jezu, Galileiantlea Nazaretcho provadi!”

¹²Magir Jezu Devmondirant bhitôr sorlo ani Mondirant vikteleam ani gheteleam soglleank bhair ghalunk laglo; savkaranchim mezam ani parve vikteleanchim asonam Tannem omtun uddoilim.

¹³Tannem mhonn’lem: “Mhojem Ghor magnneachem ghor, oxem Povitr Pustokar boroil’lem asa, punn tachi tumi choranchi dhôl kelea.”

¹⁴Kurddim ani thonttim Tachê sorxim Devmondirant ailim ani Tannem tankam borim kelim.

¹⁵Tannem kel’lim ojapam polleun, ani toxench “Davidachea Putak zôi!” oxem mhonnun bhurgim Mondirant arddotalim tem polleun, mukhel iadnik ani dhormxastri zobor chiddle,

¹⁶ani tãnnim Taka vicharlem: “Him kitem mhonntat tem tunvem aikolãi mum?” Jezun oso zobab dilo: “Hôi! ‘Tuvem toiar kel’li, bhurgeanchea ani dud pieteleam ballanchea tonddantli vakhann’nni Tunvem ghetli!’— oxem tumi kednanch vachunk nam bi?”

¹⁷Ani tankam sanddun, xara bhair sorun To Betaniek gelo ani thõi vostek ravlo.

¹⁸Sokallim Xarant portun ietana Taka bhuk lagli.

¹⁹Ek anjirachem zhadd vattechê degek polleun, To tachê sorxem ailo ani panam bogor tacher kãich Taka mell’lem na. Ani Tannem taka mhonn’lem: “Hea fuddem kednanch tuka foll zaum noiê !” Ani tem anjirachem zhadd teach vellar suklem.

²⁰Hem polleun xis ojap zale. Tãnnim mhonn’lem: “Arê, koxem mhonn hem anjirachem zhadd khinna bhitôr sukun gelem?!”

²¹Jezun portipall kelo: “Tumkam bhavart asot ani kosloch dubhav tumi dhorinam zaxeat, anjirachea zhaddak Hanvem kelam tem tumi-i kortelet; itlench nhoi, punn hea dongrak porian tumi oxem mhonnxat zalear: ‘Umtton voch ani doriant vochun podd!’, toxem ghòddtelem.

²²Ani prarthon kortana bhavartan tumi magxeat titlem-i tumi ghetelet.”

²³Devmondirant vochun To xikoita astana, mukhel iadnikamnim ani lokacheam zannteamnim lagim sorun Taka vicharlem: “Koslê sot’ten heô vostu kortai tum ? Ani konnem dilea tuka hi sot’tea?”

²⁴Jezun portipall kelo: “Hanv-ui tumchê kodde ekuch vichartam: tumi tem Mhaka sangxeat zalear, koslê sot’ten Hanv heô vostu kortam, tem Hanv-ui tumkam sangtolom.

²⁵Juanvacho batism khõi thaun ailo? Sorgar thaun vô mon’xam thaun?” Ani te apnnanchêch bhitôr oxem chintunk lagle: “Ami ‘sorgar thaun’ mhonnin zalear, to amkam vichartolo: ‘Tor tumi tachem kiteak aikunk na?’

²⁶Punn ami ‘mon’xam thaun’ mhonnin zalear, ami lokak bhietanv, kiteak sogllim Juanvak provadi mhonn man’tat.”

²⁷Hea pasot Jezuk portipallun tãnnim mhonn’lem: “Ami nokllonv.” Ani Tannem sanglem: “Koslê sot’ten Hanv heô vostu kortam tem Hanv-ui tumkam sanginam.”

²⁸“Tumkam kitem dista? Konn-eka mon’xak dog put asle; tannem poilea sorxem ieun mhonn’lem: ‘Puta, voch ani dakanchea molleant az kam’ kôr.’

²⁹Putan mhonn’lem: ‘Hanv vechonam punn uprant tannem aplem mon bodol’lem ani gelo.

³⁰Magir dusrea lagim vochun, tannem toxench mhonn’lem. Putan zobab dilo: ‘Hanv vetam, Saiba punn uprant vochunk na.

³¹Heam dogam bhitôr konnem bapaichi khuxi keli?” Tãnnim mhonn’lem: “Poilean.” Jezun tankam sanglem: “Hanv tumkam khorench sangtam: dônddvosuldar ani xindoll bailô tumchê adim Sorginchea Rajeant vetat.

³²Karonn Juanv Devak man’ta toslea jivitachi vatt dakhounk tumchê-xim ailo, punn tumi tachem mandun gheunk na; punn dônddvosuldaramnim ani xindoll bailamnim tachem aikolem. Tem polleun tori, tachem mandun gheun tumim tumchem jivit-mon bodlunk na.”

³³“Anink êk vopar aikat: Konn-êk bhattkar aslo; tannem êk dakancho mollo lailo, tachê bhonvtonnim addo ghalo, khonnun êk kollombi toiar keli, ani êk gopur bandlo; magir to mollo tannem kullvaddeank kumlleak dilo ani apunn poixilea ganvant gelo.

³⁴Pikecho vêll lagim pavtôch, aplem kumllem gheunk tannem team kullvaddeam-xim apleam chakrank dhaddle;

³⁵punn kullvaddeamnim, tacheam chakrank dhorun, ekleak mar ghalo, dusreak jivexim marlo, ani tisreak fatrailo.

³⁶Anink êk pavtt poilê pavtti-vôn odikchodd, tannem dusream chakrank dhaddle, ani tãnnim tankam-i toxench kelem.

³⁷‘Mhojea putak bhiddetele’, oxem mhonnun xekim tannem aplea putak tanchê-xim dhaddlo;

³⁸punn kullvaddeamnim putak polleun apnnam bhitôr mhonn’lem: ‘Ho tacho daiji; ieiat, haka jivexim marum-ia ani tachem daiz amchem korun gheum-ia.’

³⁹Ani tãnnim taka dhorun mollea bhair vhelo ani jivexim marlo.

⁴⁰Atam molleacho dhoni ieta tedna, team kullvaddeank to kitem kortolo?”

⁴¹Tãnnim zap dili: “Team noxtteancho vhôdd bhosm kortolo ani dusream kullvaddeank, apnnak kalla-follam diteleank, aplo mollo kumlleak ditolo.”

⁴²“ ‘Zo fatôr bandpiamnim soddun dil’lo toch zalo mhuk’ki-konnxea fatôr. Hem Sorvesporanuch ghoddun haddlam: ani tem polleun ami thottak zaleanv.’ oxem Povitr Pustokant, tumi kednanch vachunk na?” Jezun tanchekodde vicharlem.

⁴³Mhonntôch Aplem Raj Dev tumchê koddlem kaddun ghetolo ani tachim follam dito eke porjek ditolo.”[12]

⁴⁴Ani konnui hea fatracher adllun podd’ta tache kuddkean kuddke zatele; punn konnancher to podd’ta tanchi pudd zateli.

⁴⁵Tacheô vopari aikolea uprant mukhel iadnik ani Farizev apnnam vixim To uloita mhonn somzole;

⁴⁶ani Taka te dhorunk sôdtale, punn lokak bhiele, kiteak provadi mhonn lôk Taka man’talo.