Read Goan Konkani Mt 22 Bible Online

Mt 22 - Goan Konkani bible

Mt 22

¹Jezu novean tanchê lagim voparimnim ulounk laglo:

²“Sorginchem Raj oxem: Aplea puta khatir logna-jevonn dil’lea eka raza porim Sorginchem Raj.

³Lognak amontronn dhaddleleank apoun haddunk tannem apleam chakrank dhaddle, punn ieunk tankam naka zalem.

⁴‘Apoileleank oxem sangat: Polleiat, Mhojem jevonn toiar asa, mhoje padde ani chorboil’lim zonavoram hanvem marlim, ani sogllem toiar zalam; jevnnak ieiat.’, oxem sangun, aniêk pavtt tannem dusream chakrank dhaddle.

⁵Punn tãnnim kan diunk na, ani eklo aplea bhattant, dusro aplea vepar-dhondeak gelo;

⁶heramnim chakrank dhôrle, tankam mostin vagoile ani tancho jiv kaddlo.

⁷Hem aikun razacho rag pettlo ani aplim loskoram dhaddun team khuneancho tannem bhosm kelo ani tanchem nogor lasun uddoilem.

⁸Uprant, ‘Logna-jevonn tôr toiar asa,punn apoil’leank tem favonam zalem; he khatir tumi mukhel rosteam-nakeanr vochat ani tumkam melltit titleank-ui lognak apoun haddat.’, oxem tannem apleam chakrank sanglem:

¹⁰Ani mukhel-rosteancher vochun, apnnank mell’lim titleank-ui, boreank toxem vaittank, chakramnim zomoilim, ani logna-vosro soireamnim bhòrlo.

¹¹Jevnnak bosleleank pollounchê khatir raza bhitôr ie zalear, lognachi nesônn ghalinastanam thõi aslelea eka mon’xak tannem dekhlo,

¹²ani taka vicharlem: ‘Ixtta, lognachem vostr nastanam tum hanga koso bhitôr ailoi?’ Punn tannem zap kaddli na.

¹³Tedna razan chakrank sanglem: ‘Tache hat-pãi bandun taka kallokant bhair uddoiat; thõi sogllim rudon korun ani dant korkoraun astelim.’

¹⁴Kiteak apoil’lim zaitim, punn vinchun kaddlelim thoddim.”

¹⁵Tedna Farizev gele ani Jezuk koso utrak dhôrcho tê vixim tãnnim ektthãi zaun tharav ghetlo.

¹⁶Ani Herodicheam pokxvadeam borabôr tãnnim apleam xisank oxem mhonnunk Jezu-xim dhaddle: “Guruji, tum sotan choltai ani Devachi vatt sotan xikoitai; ani tuka konnachich bhidda na, kiteak mon’xanchem tondd polleun tum uloinãi: hem ami borem zannonv.

¹⁷Tôr tuka kitem dista? Somrazak dôndd farik korunk kaideachem ki na?”

¹⁸Punn tanchem noxtteponn ollkhun, Jezun oso portipall kelo: “Arê ddhongeamnô! Tumi kiteak mhonn Mhaka fas mandd’tat?

¹⁹Mhaka êk donddacho nanno dakhoiat, polleum-ia.” Tãnnim Taka êk dinar dakhoilo.

²⁰Jezun tankam vicharlem: “Hem rup konnachem? Ani hem borouop konnachem?”

²¹Tãnnim zobab dilo: “Somrazachem.” Tedna Jezun tankam sanglem: “Borem tôr, Somrazachem tem Somrazak diat, ani Devachem tem Devak diat.”

²²Tacho zobab aikun te thottakle ani Taka sanddun gele.

²³Teach disa Saduki, punorjivontponn na mhonntat te, Jezu-xim aile ani tãnnim Tachê lagim oxem vicharlem:

²⁴“Guruji, Moizesan mhonn’lam: ‘Sonsôt nastanam konn-ui morot zalear, tachea bhavan tachê bailê lagim logn zaunchem ani aplea bhavak bhurgim utpon korchim.’

²⁵Tôr amchê modem sat bhav asle; poilo logn zalo ani melo; ani sonsôt na zaun, apli potinn aplea bhavak dovrun gelo;

²⁶têch porim dusro ani tisro ani toxench satvo porian.

²⁷Ani te soglle mortôch, bail-ui meli.

²⁸Tôr, punorjivontponnachea somoiar, sat zannam bhitôr konnachi potinn zateli ti? Kiteak mhonn’lear soglleanchi ti potinn zal’li.”

²⁹Jezun portipallun tankam mhonn’lem: “Povitr Pustokanchi, nhoi mhonn Devachê podvechi, tumkam ollokh na dekhun tumi chuktat.

³⁰Karonn, punorjivontponnachea somoiar dadle logn zainant ani bailank logn korun dinant, punn tim sorgar asto Devacheam dutam sarkim zatat.

³¹Punn mel’leanchea punorjivontponna vixim ‘Abrahamacho Dev, Izakacho Dev, ani Jakobacho Dev Hanv.’, oxem Devan tumkam sanglam tem tumi vachunk na?

³²Mel’leancho nhoi, bogor jivim asleleancho Dev To!”

³³Ani lokan hem aikotoch tim Tachê xikovnnê vixim ojap zalim.

³⁴Punn Sadukink Tannem oge kele mhonn aikun, Farizev ektthãi zaun aile,

³⁵ani Tachi porikxa korunk, tanchê bhitorlea eklea vokilan ek oso vichar kelo:

³⁶“Guruji, Somurtinit vhoddli adnea ti khõichi?”

³⁷Jezun portipall kelo: “soglleam-vôn vhoddli ani poili adnea ti hi: ‘Sogllea tujea kallzan, sogllea tujea jivachea bollan, ani sogllea tujea monan, Sorvespora tujea Devacho môg kôr.’

³⁹Ani tichech baxen dusri ti hi: ‘Tuzoch kortai toso, tujea peleacho môg kôr.’

⁴⁰Heam don adneancher dhòrleli asa soglli Somurt ani Provadi.”

⁴¹Farizev ektthovlele astana, Jezun tanchê kodde ho vichar kelo:

⁴²“Tea Krista vixim tumkam kitem dista? Konnacho put To?” Tãnnim Taka zobab dilo: “Davidacho.”

⁴³Tannem vicharlem: “Toxem zalear, Atmeachea preronnan David taka Somi mhonnta tem koxem? Tôr tannem mhonn’lam:

⁴⁴‘Sorvesporan mhojea Somiak mhonn’lem: Tujeam dusmanank tujeam pãianchi monnoi Hanv koriin porian, tum Mhojea uzvea hatak bos.’

⁴⁵Zôr David taka Somi mhonnta, to tacho put koso tôr?”

⁴⁶Konnachean Taka êk zap diunk zaunk na, nhoi mhonn to dis meren anink Tachê kodde kitem-i vicharunk konnakuch kalliz zaunk na.