Read Goan Konkani Mt 23 Bible Online

Mt 23 - Goan Konkani bible

Mt 23

¹Tedna loka ani Apleam xisam kodde Jezu oso uloilo:

²“Moizesachea asonacher dhormxastri ani Farizev bosleat.

³Mhonntôch te tumkam sangtat titlem-i tumi korat ani pallat, punn tancheam kortubam pormannem tumi cholo nakat, kiteak te herank sangtat tem apunnuch korinant.

⁴Zodd ani sõsum nozo toslim ojim te bandtat ani herancheam bhuzancher ghaltat, punn tim ubarunk aplem bott legun launk kobul nant.

⁵Mon’xank dakhounk soglleô apleô kornneô kortat, dekhun Somurtintlim sutram asleleam pettulancheô vadiô te lamboit asat, toxench apleam avoronnanchê degek lail’le gondde lamb-lamb korun bhonvtat.

⁶Jevnnank poileô svatô, devsthanamnim poile-voile zage,

⁷tinttear salam’ ghevop, ani apnnank mon’xamnim ‘Guru’ mhonnun pacharop, hich tanchi as-ruch.

⁸Punn tumkam ‘Guru’ mhonnun pacharchim nant kiteak tumcho Guru ekloch ani tumi sogllim bhavbhoinni.

⁹Sonvsarant konnakuch tumcho ‘Bap’ mhonno nakat kiteak tumkam asa To sogar asto Ekloch Bap.

¹⁰Ani tumcho Guru Ekloch To Krist dekhun tumi apnnank ‘Guru’ mhonnun ghe nakat.

¹¹Tumchê bhitorlo konn vhôdd to tumcho sevôk zauncho.

¹²Apnnankuch unch kaddtat tankam Dev khala uddoitolo ani apunnuch khaltim zatat tankam Dev unch kaddtolo.”

¹³“Dhormxastreamnô ani Farizevamno, kotta tumchem, ddhongeamno! Kiteak Sorginchem Raj tumi mon’xam mukhar dhamptat ani tumi-i bhitôr soronant, nhoi mhonn bhitôr sorunk sôdtat tankam-i bhitôr sorunk dinant.[13]

¹⁵Ddhongeam dhormxastreamnô ani Farizevamnô, kottakotta tumchem! Kiteak êk novxis korchê khatir doriacher ani dhortorecher tumi firtat ani, konn-ekleak sampddailea uprant, don pavtt odik emkondd favo-aslolo tumchê sarko tumi taka kortat.

¹⁶Kurddeam fuddareamnô, kottakotta tumchem! Tumi oxem mhonntat: ‘Devmondirachean konn-ui soput ghetit zalear, tem kãich nhoi; punn Devmondirachea bhangarachean soput ghetit zalear, tim rinnkarim zatat.’

¹⁷Arê murkheam-kurdd’deamnô! Kitem odik vortem? Bhangar vô bhangar povitr zai-xem korta tem Devmondir?

¹⁸Toxench tumi mhonntat: ‘Vedichean konn-ui soput ghetit zalear, tem kãich nhoi; punn vedicher asa tea danachean soput ghetit tim rinnkarim zatat.’

¹⁹Arê kurdd’deamnô! Kitem odik vortem? Dan vô dan povitr zai-xem korta ti vedi?

²⁰Tôr vedichean soput ghetat tim tichean ani ticher asa titleaichean soput ghetat.

²¹Ani Devmondirachean soput ghetat tim tachean ani tantum ravta tea Devachean soput ghetat.

²²Ani sorgachean soput ghetat tim Devachea xinvaso-nachean ani tacher boslolo asa tea Devachean soput ghetat.

²³Ddhongeam dhormxastreamnô ani Farizevamnô, kottakotta tumchem! Hortelanv, boddixêp ani jirem, osleancho dhavo vantto tumi Devak mhonn farik kortat, punn Somurtintle odik molache kaide, mhonngê neainit, doia ani visvaxiponn, he tumi soddun dileat. Te her bhairainastana tumi he poile pallche asle.

²⁴Êk zollar gallun kaddtat ani akhem untt gilltat te kurdd’de fuddari tumi!

²⁵Ddhongeam dhormxastreamnô ani Farizevamnô, kottakotta tumchem! Tôr patra ani tatta bhailean asa tem tumi nitoll kortat ani bhitorlean dusreakoddchem apleak zai tem bollan kaddun gheupa ani apleak zai titleanthuim meklleponnan dadosponn gheupa-axen bhòrlele asat tumi.

²⁶Arê kurdd’dea Farizeva! Bhailean asa tem-i nitoll zaunchê khatir, patra ani tatta bhitorlean asa tem poilem nitoll kôr.

²⁷Ddhongeam dhormxastreamnô ani Farizevamnô, kottakotta tumchem! Tôr tumi chuno kaddleleam somadhim sarke; teô bhailean mon’xank sobit distat, punn bhitorlean mel’leancheam haddamnim ani sogllea jin’sachê ollxiken bhòrleat.

²⁸Têch porim tumi-i bhailean lokak promannik distat khore, punn bhitorlean tumi ddhongeponnan ani khotteponnan bhòrlole asat.

²⁹Ddhongeam dhormxastreamnô ani Farizevamnô, kottakotta tumchem! Tumi provadeancheô somadhi bandtat ani nitivont mon’xancheô iadgiri nettoitat,

³⁰ani mhonntat: ‘Amcheam purvozancheam disamnim ami asleleanv zalear, provadeanchem rogot varounk ami tanchê borabôr vantto gheunche nasleanv.

³¹Mhonntôch provadeank jivexim martleanchi tumi sonsôt mhonn tumchech tumi govai.

³²Oxem tôr, tumcheam purvozanchea patkachem map tem tumi bhôrun kaddat.

³³Sorpamnô, furxeancheam pileamnô, emkonddachea formonnantle koxe mhonn vattovtoleat tumi?

³⁴Tôr polleiat, Hanv tumchê thãi provadeank, zannarank ani xastreank dhaddtam. Punn tumi tantleam kãi zannank jivexim martelet ani khursar khillaitelet, ani kãi zannank tumcheam devsthanamnim jerbond ditelet ani eka nogrant thaun dusrea nogrant tanchê pattapattik lagtelet.

³⁵Devak manovlelea Abelachea rogta thaun tem Gabharea ani vedi modekot tumi jivexim marlelea Barakiachea puta Zakariasachea rogta meren prithumer niropradi rogot varoilam titlem-i tumcher buzchê khatir tumi oxem kortelet.

³⁶Hanv tumkam khorench sangtam: hem sogllem hê pinddkechea mathear ietelem.

³⁷Jeruzalea, Jeruzalea! Tum provadeank jivexim martai ani tujê thãi dhaddleleank fatraitai! Zoxem kombi apleam paktteam tolla apleam pilank ektthãi korta, toxem kitlê pavtti mhonn tujeam bhurgeank ektthaunk Hanvem sôdlem, punn tem tumkam naka zalem!

³⁸Chotrai dhôrat, tumchem ghor tumkam padd zal’lem urtelem.

³⁹Hanv tumkam khorench sangtam: ‘Sorves-porachea nanvan ieta taka zôi!’, oxem tumi mhonnxeat porian tumi Mhaka hea fuddem anink polleunchim nant.”