Read Goan Konkani Mt 24 Bible Online

Mt 24 - Goan Konkani bible

Mt 24

¹Jezu Devmondirantlo bhair sorun vetastanam, Devmondirachê bandavollicher lokx lai mhonn Taka sangunk Tache xis lagim sorle.

²Tannem zap diun tankam mhonn’lem: “Hem sogllem tumi polletat nhoi? Hanv tumkam khorench sangtam: hanga nisontton zaun fatrar fatôr urcho na.”

³To Olivet dongrar bosun aslo, tedna ekvodde ieun xisamnim Tachê kodde vicharlem: “Hem kedna ghòddtelem tem, ani Tujea ienneachi ani kallachea xevottachi khunna konn ti, amkam sang.”

⁴Ani portipallun Jezun tankam sanglem: “Tumkam konnem fottoinam zaunk chotraien ravat;

⁵kiteak sobar zann Mhojem nanv gheun ani apunn Krist mhonnun ietele, ani zaiteank fottoitele.

⁶Tumi zhuzancho avaz ani loddaianchi khobor aikotelet. Uchamboll zaina zaunk chotrai dhorat; tôr hem sogllem ghoddon ieunk zaik; punn xevôtt rokddoch ieuncho na.

⁷Kiteak raxttr raxttracher ani raj rajeacher uprastelim. Hanga-thõi bhuk poddteli ani bhikamp zateli.

⁸Punn hem sogllem fokot porsuttvenninchi survat.

⁹Tedna piddapidd diunk tumkam dhorun ditelim ani tumkam jivexim martelim ani Mhojea nanva pasot sogllim raxttram tumkam zolltelim.

¹⁰Tedna sobar zannancho bhavart haltolo; mon’xam ekamekak lavun ditelim ani ekamekak zolltelim.

¹¹Sobar khotte provadi uprastele ani zaiteank fottoitele;

¹²ani kaido-modd’ni vaddta tea mapan zaiteancho môg xellmoddo zatolo.

¹³Xevottak porian thir ravtit tankam Dev taronn ditolo.

¹⁴Ani heam soglleam porzank ek sakxi mhonn hea Rajeachi hi bori khobor akhea sonvsarant porgott zateli. Ani tea uprant xevôtt ietolo.

¹⁵Daniel provadean sangun dovorlolo to ‘Sotianasacho kanttallo’ polletat tedna, (konnui vachta tem taka somzun ieum-di)[14] povitr zagear ubo aslolo tumi polletôch (vachtat tãnnim hem somzunchem),

¹⁶Judeiant asleleamnim dongracher pollun vechem;

¹⁷pattsar aslelean aplea ghorantlem kitench vhorunk sokla denvchem nhoi;

¹⁸xetant aslelean aplem avoronn vhorunk porot ieunchem nhoi.

¹⁹Te dis ietôch gorbest bailanchem ani dud diteleanchem kotta!

²⁰Tumchi pollapôll hinvalleant vô Sabbatha disa zaina zaunk magat;

²¹kiteak tedna sonvsarachea orombak thaun tem atam porian zaunk na ani hea fuddem zauncho na toslo êk vhôdd sontap ietolo.

²²Ani te dis unne korunk nasle zalear, konnuch vattavoncho naslo; punn vinchun kaddloleam khatir te dis unne keleat.

²³Tedna, ‘polle, Krist hanga asa’ vô ‘To thõi asa’ mhonn konnuch tumkam sangit zalear, tumi tem sotmani nakat;

²⁴kiteak lottik Krist ani lottik provadi upzotele ani zata zalear, vinchun kaddleleank porian fosounk, vhoddleô khunna ani ochoriam korun dakhoitele.

²⁵Chotrai dhôrat, Hanvem tumkam hem adinch sangun dovorlam.

²⁶Dekhunuch oxem konn tumkam mhonntit zalear, ‘ho polle to oronneant asa’, tumi bhair soronakat; vô ‘ho polle to ghorant bhitôr asa’, tem tumi sotmaninakat;

²⁷kiteak zoxem zhogla-nnem udentik marta ani ostomtek porian zhogzhogta, toxench Mon’xachea Putachem iennem zatelem.

²⁸Moddem asa thõi gid-ui ektthovtele.

²⁹Team disancho sontap iena fuddem suriacher kallôk poddtolo, chondrim’ aplo uzvadd diuncho na, noketram mollba velim sokla poddtelim ani ontralla veleô xokti kolkolteleô.

³⁰Ani tedna Mon’xachea Putachi khunna mollbar dixtti poddteli; sonvsarantlim kullam dhuk kortelim ani podven ani vhoddê mhoimen mollba-cheam kupancher ieto Mon’xachea Putak dekhtelim.

³¹Ani kornneachea eka mottea avazan To Apleam dutank dhaddtolo, ani sonvsaracheam char-ui dixam veleam, ontrallachê êkê ximê thaun dusrê ximê porian asleleam Tacheam vinchleleank te zomoitele.

³²Anjirachea zhaddachi vopar somzun gheiat: tacheô khandiô rosbhorit zatat ani tankam kombreô futt’tat tedna, gim’ lagim pavla mhonn tumkam kollon ieta;

³³têch porim tumi hem sogllem pollelea uprant, To lagim pavlo, darachea umbrear asa mhonn zanno zaiat.

³⁴Hanv tumkam khorench sangtam: hem sogllem ghòddlea bogor hi pinddka ontorchi na.

³⁵Ontrall ani prithum’ sortelim, punn Mhojim utram kednanch sorchim nant.

³⁶Punn ekleach Bapak kaddun, anink konnakuch, sorgincheam dutank vô Putak legun, tea disachi ani tê ghoddiechi khobor na.

³⁷Noacheam disamnim zoxem zalem, toxench Mon’xacho Put ieta tedna zatelem.

³⁸Buddtê adleam disamnim Noa pett-tarvant bhitôr sorlo to dis meren lôk khata-pietalo, logn zaun ani logn korun diun aslo,

³⁹ani poriallo ieun tancho soglleancho nas zait porian, tankam kãi ek koll’lem na; toxench Mon’xacho Put ietolo tedna zatelem.

⁴⁰Tedna xetant asleleam dogam dadleantlea ekleak vhortele, dusreak sanddtele;

⁴¹dantear dollunk asleleam dogam bailantlê eklêk vhortele, dusrêk sanddtele.

⁴²Mhonntôch, tumcho Somi khõichea disa ietolo tem tumi nokllot dekhun zagrut ravat.

⁴³Punn hem mat monant dhôrat: konn-ui ghorkar ratichea khõichea parar chôr ietolo mhonn zanno aslo zalear, to zagrut ravto aslo ani aplem ghor foddun nagounk diuncho naslo.

⁴⁴Mhonntôch tumi-i toiar ravat, kiteak tumi chintinant tê ghoddier Mon’xacho Put ietolo.

⁴⁵Ghorant asleleam heram chakrank vogtar jevonn diunk dhoni aplea ghorabeacher chakrak odhikar dita to visvaxi ani xanno chakor konn zait?

⁴⁶Aplo dhoni ieta tea vellar taka oxem korto mell’tolo to chakor subhagi.

⁴⁷Hanv tumkam khorench sangtam: to taka sogllê aplê dovloticher odhikar ditolo.

⁴⁸Punn baskôll chakôr apnnach bhitôr oxem mhonnot zalear: ‘Mhozo dhoni ieunk kallav korta’,

⁴⁹ani apleam boraborcheam chakrank marunk ani bebdeam borabôr jevunk ani pieunk lagot zalear,

⁵⁰to ravonaslolea disa ani to nokllo aslelê ghoddier tea chakracho dhoni pavtolo;

⁵¹ani taka koddok xikxa ditolo, ani tachi gôt ddhongiam sarki zai-xi kortolo. Thõi sogllim rudon korun ani dant korkoraun astelim.”