Read Goan Konkani Mt 25 Bible Online

Mt 25 - Goan Konkani bible

Mt 25

¹“Dha ankvari apleô divleô gheun novreak ievkar diunk bhair sorleô: tankam ghoddlem toxem Sorginchea Rajeant zatelem.

²Tanchê modleô panch pisatt ani panch xanneô asleô.

³Panch pisatt ankvarimnim divleô ghetleô, punn apnnam borabôr tel gheunk na;

⁴xanneamnim divleam borabôr apleam xinsleamnim tel-ui vhelem.

⁵Novreak uxir zalo ani teô soglleô jemieunk lagleô ani nhidleô.

⁶Punn modianir oso avaz zalo: ‘Ho polle novro! Taka ieukar diunk vochat.’

⁷Tedna teô soglleô ankvari zageô zaleô ani apleam divleam-vati toiar korunk lagleô.

⁸Pisattamnim xanneank mhonn’lem: ‘Tumchem ilem tel amkam diat, amcheô divliô palovtat.’

⁹Punn xanneamnim oxi zap dili: ‘Tumkam ani amkam titlem aschem na. Vikteleager vochat ani tumkam viktem gheiat: hench odik borem’.

¹⁰Teô tel viktem gheunk vetat mhonnosôr novro pavlo; toiar asleô teô ankvari tachê borabôr kazra-vosreant bhitôr geleô ani dar bond kelem.

¹¹Xekim dusreô ankvari pavleô ani mhonnunk lagleô: ‘Saiba, Saiba, amkam dar ugôdd!’

¹²Punn tannem zap dili: ‘Hanv tumkam khoreponnim sangtam, hanv tumkam ollkhonam.’

¹³Mhonntôch zagrut ravat, kiteak dis, nhoi mhonn ghoddi, tumi nokllot.”

¹⁴“Têch bhaxen, apleam chakrank apoun haddun ani tanchekodde apli girestkai diun apunn ekdom poixil’lea desant ek monis veto aslo zal’lea porim Sorginchem Raj.

¹⁵ekleak tannem panch talent[15] dile, dusreak don ani tisreak êk, zonn-ekleak ap-aplê kuveti pormannem. Magir to bhair sorun gelo.

¹⁶Panch talent ghetlele to rokddoch gelo ani te gheun tannem vepar-dhondo kelo ani anink panch zôddle.

¹⁷Têch porim don talent ghetlele tannem-i anink don zôddle.

¹⁸Punn êk talent ghetlolo tannem vochun zomin khonnli ani thõi aplea dhoniacho duddu purun lipoilo.

¹⁹Zaito kall bolanddlea uprant team chakrancho dhoni portun ailo ani tannem tanchê lagim hixôb maglo.

²⁰Panch talent ghetlele to lagim sorlo ani, anink panch talent dakhoun, tannem mhonn’lem: ‘Saiba, tunvem mhaka panch talent dil’lei, tôr polle hanvem anink panch zôddleat.’

²¹Tachea dhonian taka mhonn’lem: ‘Xabas, borea ani visvaxi chakra! Thoddeach vostumnim apunn visvaxi mhonn tunvem dakhoili dekhun, hanv oglleô vostu tuka patietolom. Ie ani tujea dhoniachea sukhant vantto ghe.’

²²Uprant don talent ghetlele to-i lagim ailo ani tannem mhonn’lem: ‘Saiba, tunvem mhaka don talent dil’lei, tôr polle hanvem anink don zôddleat.’

²³Tachea dhonian taka mhonn’lem: ‘Xabas, borea ani visvaxi chakra! Thoddeach vostumnim apunn visvaxi mhonn tunvem dakhoili dekhun, hanv oglleô vostu tuka patietolom. Ie ani tujea dhoniachea sukhant vantto ghe.’

²⁴Êk talent ghetlolo tannem-i lagim sorun mhonn’lem: ‘Saiba, tum khôr monis mhonn hanv zannom: tunvem vompunk nãi thõi tum lunvtai, ani lavunk nãi thõichem tum punzaitai;

²⁵dekhun bhieun hanv gelom ani tuzo talent dhornnint purun hanvem lipoilo. Ho polle to hanga asa; tuzo to tum ghe.’

²⁶Punn dhonian portipallun taka mhonn’lem: ‘Khottea ani allxea chakra, hanvem vompunk na thõi hanv lunvtam ani lavunk na thõichem hanv punzaitam mhonn tum tôr zanno asloi;

²⁷mhonntôch mhozo duddu tunvem savkaram kodde dovrunk zai aslo, portun ietôch, mhojem tem, tea bhair kolantor, hanv gheto aslom.

²⁸Mhonntôch tachê lagcho to talent kaddun gheiat ani dha talent asat taka diat;

²⁹kiteak asleleank Dev anink-ui ditolo ani tanchi bhôr zateli; punn nasleleanchem asa tem-i Dev kaddun ghetolo.

³⁰Kiteakuch upkaronaslelea hea chakrak kaddun bhair kallokant uddoiat; thõi sogllim rudon korun ani dant korkoraun astelim.’ ”

³¹Mon’xacho Put soglleam Apleam dutank gheun mhoimen ietolo, tedna To Aplea mhoimechea xinvasonar bostolo,

³²ani Tachê mukhar sogllim raxttram zomtelim, ani zoso gonvlli bokdde-ankoddchim xelliank doxim korta toso To-i soglleam raxttrank ekak dusrea-koddchim doxim kortolo.

³³Xelliank Aplea uzveak ani bokddiank Aplea daveak dovortolo.

³⁴Tedna Raza Aplea uzveak asleleank mhonntolo: ‘Mhojea Bapacho axirvad ghetleleamnô, ieiat ani sonvsar rochleleak tumkam toiar kel’lem tem raj, tumchem daiz gheiat.

³⁵Kiteak Hanv bhukel’lom ani tumi Mhaka jevunk vaddlem; Hanv tanel’lom ani tumi Mhaka pieunk dilem; Hanv vattsur koso ail’lom ani tumim Mhaka biradd dilem;

³⁶Hanv vingllo aslom ani tumi Mhaka nhesunk dilem; piddent aslom ani tumi Mhoji khobor-mat ghetli, bondkhonnint aslom ani tumi Mhaka bhett dili.’

³⁷Tea vellar promannik mon’xam Taka zobab korun vichartelim: ‘Somia, kedna mhonn ami Tuka bhukel’lo polleun jevunk dilem? Tanel’lo polleun Tuka pieunk dilem?

³⁸Kedna mhonn Tuka vattsur koso polleun amger biradd dilem? Vingllo polleun Tuka nhesunk dilem?

³⁹Ani Tum piddent vô bondkhonnint astanam, kedna Tuka bhett diunk ieileanv?’

⁴⁰Ani zap diun Raza tankam mhonntolo: ‘Hanv tumkam sot sangtam: Mhojeam lhanantleam lhanam bhavam-bhoinnim modlea ekleak jem tumi kelem, tem tumi Mhakach kelem.’

⁴¹Magir Aplea daveak asleleank To mhonntolo: ‘Xirap poddleleamnô, devcharak ani tacheam dutank toiar kel’lea sasnnachea ujeant Mhojê thaun koddsorun vochat.

⁴²Kiteak Hanv bhukel’lom, punn tumi Mhaka jevunk vaddunk na; Hanv tanel’lom, punn tumi Mhaka pieunk diunk na;

⁴³vattsur koso ail’lom, punn tumi Mhaka biradd diunk na; vingllo zal’lom, punn tumi Mhaka nhesunk diunk na; piddent ani bondkhonnint poddlolom, punn tumi Mhaka bhett diunk na.’

⁴⁴Tea vellar him-i Taka zobab korun vichartelim: ‘Somia, kedna mhonn ami Tuka bhukel’lo, tanel’lo, vattsur vô vingllo zal’lo, piddent vô bondkhonnint poddlolo polleun, Tuji chakri korunk na?’

⁴⁵Tedna To tankam zap diun mhonntolo: ‘Hanv tumkam sot sangtam: heam lhanantleam lhanam modlea ekleak-ui jem kitem tumi korunk na, tem tumi Mhaka-i korunk na.’

⁴⁶Ani him sasnnachê khastik vetelim, punn Devak manovlelim mon’xam sasnnik jivit bhogunk vetelim.”