Read Goan Konkani Mt 26 Bible Online

Mt 26 - Goan Konkani bible

Mt 26

¹Hem sogllem uloun sompoilea uprant Jezun Apleam xisank mhonn’lem:

²“Don disamnim Pask zaunchem asa mhonn tumi zannont; ani Mon’xachea Putak khursar marunk dhorun ditele.”

³Tedna mukhel iadnik ani porjeche zann’te Kaifas nanvachea porom’-iadnikachea nivasant zomle

⁴ani visvas ghat korun Jezuk dhorunk ani jivexim marunk tãnnim guddmêll kelo.

⁵Tori astana tãnnim mhonn’lem: “Hem Porbecheam disamnim naka; na zalear lokachi uchambollai zaum ieit.”

⁶Jezu Betanient Simanv koddkarachea ghorant astana,

⁷êk bail eka chon-drokanti aidonant unch molachem pormollit tel gheun aili, ani jevnnak boslolo thõi Tachea mathear tinnem tem ôtlem.

⁸Hem polleun xis chiddle; tãnnim mhonn’lem: “Ho ibadd kiteak?

⁹Hem vhodd molak vikun, goribank diunk zatem.”

¹⁰Hem aikun Jezun tankam mhonn’lem: “Hê bailek tumi kiteak kimar kortat? Êk bori kornni tinnem Mhojê sorim kelea.

¹¹Gorib mon’xam tumchê modem sodam asatuch, punn Hanv sodanch tumchea sangata na.

¹²Mhojê kuddir hem tel otoun tinnem Mhaka nikhipinnek toiar kelo.

¹³Akhea sonvsarak, khuim-i hem Xubhvhortoman porgott zata titlei kodden, tinnem kitem kelam tem-i tichea ugddasak mhonn porgott’tele mhonn Hanv tumkam khorench sangtam.”

¹⁴Tedna Barantlo eklo, Judas Iskariot nanvacho, mukhel iadnikam-xim gelo;

¹⁵tannem mhonn’lem: “Hanv Taka tumchea hatant ghalin zalear, tumi mhaka kitem diunk raji asat?” Tãnnim taka rupeache tis nanne mezun dile.

¹⁶Ani to dis thaun Jezuk dhorun diunk boro soêg to polleun aslo.

¹⁷Fug-nasloleam Unddeanchea poilea disa xis Jezu lagim vicharunk aile: “Tujem Pask-Jevonn khõi ami toiar kel’lem Tuka zai?”

¹⁸Ani Jezun sanglem: “Omkea mon’xak hea xarant mellunk vochat ani taka mhonnat: ‘Guruji oxem sangta: Mhozo vêll lagim pavla; Mhojeam xisam borabôr tujea ghorant Hanv Pask kortam.”

¹⁹Mhonn’toch Jezun tankam hukum’ dil’lo to xisamnim pall’lo ani Pask toiar kelem.

²⁰Sanz zatôch, Apleam bara xisam sangatim To jevnnak boslo.

²¹Ani te jevtastanam Tannem mhonn’lem: “Hanv tumkam khorench sangtam: tumchê bhitorlo eklo Mhozo ghat gheuncho asa.”

²²Te zobor khontibhorit zale ani ek-eklo Taka mhonnunk laglo: “Somia, hanv nhoi mum to?”

²³Tannem oso portipall kelo: “Mhojê borabôr tattant hat ghala to Mhozo ghat ghetolo.

²⁴Mon’xacho Put Tachê vixim boroil’lem asa tea pormannem veta khoro, punn zannem Mon’xachea Putacho visvas-ghat ghetla tachem kottakotta! Zolmakuch ieunk naslolo zalear, tea mon’xak odik borem zato aslem!”

²⁵Tacho visvas-ghat gheupea Judasan oxem vicharlem: “Guruji, hanv nhoi mum to?” Jezun taka zap dili: “Oxench tum sangtai.”

²⁶Ani te jevtastanam Jezun unddo ghetlo, Devak dhin’vasun to môddlo, to xisank dilo ani mhonn’lem: “Gheiat ani khaiat, hi mhoji kudd.”

²⁷Magir Tannem patr ghetlem ani Devak dhin’vasun tem tankam dilem ani mhonn’lem: “Patkanchea bhogsonnea khatir, soglleam monxam pasot varoilam tem, novea korarachem, hem mhojem rogot dekhun tumi sogllim tantlem pieiat.

²⁸

²⁹Ani tumkam sangtam: tumchea sangata Mhojea Bapachea rajeant novo to soro Hanv piein porian, hea fuddem dakechea follachem Hanv anink pieuncho na.”

³⁰Stotram gailea uprant, te Olivet dongrar vochunk bhair sorle.

³¹Tedna Jezun tankam sanglem: “‘Hanv gonvlleak martolom ani xellianchi duspôtt zateli.’, oxem boroilelem asa te khatir, aichêch rati tumi soglle Mhaka soddun vetelet.

³²punn Devan Mhaka punorjivont kortôch Hanv tumchê adim Galileiant vetolom.”

³³Hea utrak Pedrun mhonn’lem: “Tuka lagun sogllech pasun Tuka soddun vetit zalear, hanv kosoch Tuka sôddun vecho nam.”

³⁴Jezun taka zap dili: “Hanv tuka sot sangtam: aichê rati, kombean sad ghalchê adim, Mhaka ollkhonãi mhonn tin pavtti sangtoloi.”

³⁵Pedrun taka mhonn’lem: “Tujê borabôr mhaka morchem poddlem zalear-ui, hanv Tuka kodinch soddun vechonam.” Heram-i xisamnim toxench mhonn’lem.

³⁶Tedna Jezu tanchê borabôr Getsemani mhonnlelea molleant gelo ani Tannem xisank mhonn’lem: “Ho-thõi vochun Hanvem magnnem kori-sôr tumi hanga bosat.”

³⁷Ani Pedruk ani Zebedevacheam dogam putank Tannem Apnna borabôr vhele; tedna To tollmollunk ani khontibhorit zaunk laglo.

³⁸Tedna Tannem tankam mhonn’lem: “Ekdom chodd khontin bhoron Mhozo jiv mornnachê tonnir pavla. Tumi hanga ravat ani Mhojê sangatim zagrônn korat.”

³⁹Ani matso fuddem vochun To omto poddlo ani oxem magnnem korunk laglo: “Bapa Mhojea, zata zalear, Mhojê velem hem patr pois vochum-di; toripunn Mhaka zai toxem nhoi, Tuka zai toxem zaum-di.”

⁴⁰Xisam sorxem porot ietoch, te Taka nhidlele mell’le, ani Tannem Pedruk mhonn’lem: “Mhonntôch êk hor-bhôr Mhojê borabôr zage ravunk tumchean nozo zalem mum?

⁴¹Tumi tallnnent poddonam zaunk zagrut ravat ani magnnem korat. Otmo raji asa khoro, punn kudd osokt.”

⁴²Tanchê sorxilo vochun, Tannem novean, dusrê pavtti, oxem magnnem kelem: “Bapa Mhojea, Hanvem hem patr pielea bogor tem pelean kaddunk zaina zalear, Tuji khuxi zaum.”

⁴³Ani portun ietoch, tanche dolle jemen zodd zal’le dekhun te Taka nhidlele mell’le.

⁴⁴Tankam thõich sanddun novean To pois gelo ani tinch utram mhonnun Tannem tisrê pavtt magnnem kelem.

⁴⁵Uprant xisam sorxem porto ieun, Tannem mhonn’lem: “Azun porian nhidtat atam ani visôv ghetat tumi? Polleiat, Mon’xacho Put patkeanchea hatant poradhin zauncho vêll pavlo atam.

⁴⁶Utthat! Vochum-ia! Mhozo ghat ghetolo to ho polle laginch asa.”

⁴⁷Oxem uloita thõich astanam, Judas, Barantlo eklo, thõi pavlo ani tachê borabôr torvari ani tonnke gheun porom’-iadnikamnim ani porjecheam zannteamnim dhaddlolo lokacho êk vhoddlo zomo.

⁴⁸Ghatkean tankam oxem mhonnun khunna dil’li: “Hanv umo ghetolom polle, toch to; taka dhôrat.”

⁴⁹Hea pasot rokddoch Jezu-xim ieun tannem mhomm’lem: “Noman Tuka, Guruji!”, ani Tacho umo ghetlo.

⁵⁰Jezun taka mhonn’lem: “Ixtta, tum anga korunk ailai tem kam’ kôr.” Tedna te fuddem sorle ani Jezuchea angar hat ghalun tãnnim Taka dhôrlo.

⁵¹Ani ovchit Jezu sangatim asleleantlea eklean, rokddoch aplê torvarik hat ghalun, ti bhair kaddli ani porom’-iadnikachea chakracher marun tacho kanuch katrun uddoilo.

⁵²Tedna Jezun taka mhonn’lem: “Tuji torvar tichê svater ghal, kiteak torvar kaddtat te torvarin mortele.

⁵³Mhojea Bapa kodde Hanvem maglear, To bara-vôn ogllim devdutanchim loskoram atanch Mhojea adarak dhaddcho na mhonn dista tuka?

⁵⁴Punn oxem zaunk zai mhonn Povitr Pustok sangta tem koxem ghoddon ietelem tôr?”

⁵⁵Tea vellar Jezun te urponjik mhonn’lem: “Tumi torvari ani tonnke gheun Mhaka dhorunk ieunk Hanv konn pundd kitem? Dispottim tumchê modem bosun Hanv Devmondirant xikovnn ditalom tedna tumi Mhaka dhôrunk na.”

⁵⁶Punn provadeanchim borovpam pallon ieunchê khatir hem sogllem ghòddlem. Tea vellar soglle xis Taka sanddun pollun gele.

⁵⁷Jezuk dhôrlolo team mon’xamnim Taka porom’-iadnika, Kaifasager vhelo; thõi xastri ani zannte ektthãi zal’le.

⁵⁸Pedru pois thaun Tachê pattlean cholun porom’-iadnikachea angnnant porian gelo ani bhitôr sorun hachi sompadnni koxi zait ti polleunk kamdaram borabôr boslo.

⁵⁹Mukhel iadnik akhê Mha-Dhormsobhê borabôr Jezuk mornnachem formonn diunchê khatir Tacher add firiad korunk konn-ui lottik aropi melltit kai mhonn sôdtale;

⁶⁰punn sobar fottkire aropi fuddem sorun-ui, tankam zai tosli firiad tankam mellonam zali. Xekim dog zann fuddem sorle

⁶¹ani tãnnim sanglem: “Hannem mhonn’lam: ‘Devachem Mondir môddunk ani tem tin disamnim bandunk mhaka podvi asa.’ ”

⁶²Tedna ubo ravun porom’-iadnikan Tachê kodde vicharlem: “Kãich zap dinãi? He tujer add hi firiad ditat tem kitem?”

⁶³Punn Jezun zap kaddli na. Ani porom’-iadnikan Taka mhonn’lem: “Jivea Deva mhukar soputa khal ulounk hanv Tujekodde magtam, Krist To, Devacho Put To, Tunch zalear amkam sang.”

⁶⁴Jezun taka portipall kelo: “Tunvem sanglem toxench tem. Tôr Hanv tumkam sangtam: Mon’xachea Putak dev-podvechea uzvea hata boslolo ani sorgincheam kupam velean ieto tumi dekhtelet.”

⁶⁵Tedna aplim vostram pinzun porom’-iadnikan mhonn’lem: “Hannem devninda keli! Sakxidaranchi anink kosli goroz amkam? Chotrai dhôrat, tumi atanch devninda aikolea.

⁶⁶Tôr tumkam kitem dista?” Tãnnim zobab dilo: “Taka moronn favo!”

⁶⁷Tedna kãi zannamnim Tachea tonddar thimpi uddoili ani Tacher thapttam marlim; heramnim Tacher mutti marun

⁶⁸mhonn’lem: “konnem marla tuka? Are Krista! bhakit kor amkam.”

⁶⁹Itlea mhonnosôr Pedru bhair angnnant bosun aslo; ani êkê chakornnin tachê sorxem vochun mhonn’lem: “Tum-vui Galileikar Jezu borabôr astaloi.”

⁷⁰Punn soglleam hujir na mhonnun tannem sanglem: “Tum kitem mhonntai tem hanv nokllom.”

⁷¹To darvonttea bhair vetanam dusrê êkê chakornnin taka pollelo ani thõi asleleank tinnem mhonn’lem: “Ho Nazaretkara Jezu borabôr aslo!”

⁷²Ani tannem soput gheun novean na mhonn’lem ani sanglem: “Hea mon’xak hanv ollkhoch na!”

⁷³Anink thoddea vogtan thõi asleleamnim lagim sorun Pedruk mhonn’lem: “Dubhava vinnem tum-vui tanchê bhitorlo eklo, ani tujem ulouopuch tuka dakhoun dita.”

⁷⁴Tedna to apnnacher xirap ghalun ani soput gheun mhonnunk laglo: “Hanv hea mon’xak ollkhoch na!” Teach vellar kombean sad ghalo,

⁷⁵ani apnnak Jezun kitem sanglelem to Pedruk ugddas ailo: “Kombean sad ghalchê adim tum tin pavtti Mhaka ollkhonãi mhonn sangtoloi.” Ani bhair vochun Pedru dukhamnim roddunk laglo.