Read Goan Konkani Mt 27 Bible Online

Mt 27 - Goan Konkani bible

Mt 27

¹Dis uzvaddonam fuddem, soglleam mukhel iadnikamnim ani porjecheam zannteamnim Jezucho jiv kaddunk lavcho mhonn tharav ghetlo.

²Tãnnim Taka bandlo ani vhorun Pilat razpalachea hatant ghalo.

³Jezuk formonn marlelem polleun, Tacho ghat ghetlolo tea Judasak ontoskornnacho kiddo taka khaunk laglo dekhun, rupeache tis nanne mukhel iadnikank ani zannteank portun dile ani mhonn’lem: “Niropradi rogtacho ghat gheun hanvem patok kelem.”

⁴Tãnnim mhonn.lem: “Tem amkam kiteak poddlam? Tujem tunch polle.”

⁵Tannem te rupeache nanne Devmondirachea Gabhareant apttun uddoile ani vochun gôll ghetlo.

⁶Mukhel iadnika-mnim te nanne kaddun mhonn’lem: “Te rogtachem mol dekhun, te Devmondi-rachea bhanddarant ghalum noiê.”

⁷Ani tharav gheun, pordexeank purunk team poixeamnim tãnnim kumbhara-chem ek bhatt viktem ghetlem.

⁸Hea karonnak lagun tê svatek az porian Hakeldama, mhonngê “Rogtachem Bhatt”, mhonn nanv asa.

⁹Tedna, “Ani rupeache te tis nanne, Israelachea loka modem, taka lagun, diunchem tharailelem tem mol, tannim ghetle

¹⁰ani Sorvesporan mhaka hukum’ ghal’lo tea pormannem kumbharachea bhattak te môddle.”, oxem Devan Jeremias provadea vorvim sanglolem tem khorem zalem.

¹¹Magir Jezuk razpala mukhar ubo kelo; ani razpalan Tachê lagim oxem vicharlem: “Judevancho raza tum?” Jezun taka mhonn’lem: “Tum sangtai toxem tem.”

¹²Ani mukhel iadnik ani zannte Tacher add garannem korit astana, Tannem zapuch kaddunk na.

¹³Tedna Pilatan Taka mhonn’lem: “Kitleô govaiô Tujer add te ditat teô tum aikonãi?”

¹⁴Punn Tannem eka utrak legun, apnnak zap kaddunk na mhonn razpalak ekdom’ mottem ojap dislem.

¹⁵Dôr porbecheam somoiar khõichea-i eka koideak, lokak zai taka, razpalan suttka diunchi sonvoi asli.

¹⁶Tedna Barab’bas mhonnlolo, soglleanchê ollkhicho, êk koidi aslo.

¹⁷Hea pasot thõi ektthãi zal’leam lagim Pilatan vicharlem: “Konnak hanvem sôddlolo tumkam zai? Barab’basak[16] vô Krist mhonntat tea Jezuk?”

¹⁸Nattkaien tãnnim Jezuk apnnachea hatant ghala mhonn Pilat borem zanno aslo.

¹⁹Razpal niti-sodrer boslolo astana, tachê potinnin oxem taka sangunk dhaddlem: “Taka lagun aiz eka sopnnant hanvem zaitem sonslam dedkhun tea promannik mon’xachê ban’goddent tum poddo naka.”,

²⁰Tea mhonnosôr mukhel iadnikamnim ani zannteamnim Barab’basak suttka ani Jezuk mor-nnachem formonn magunk lokachea monant ghalem.

²¹“Heam dogam bhitorlea konnak hanvem suttka dil’li tumkam zai?”, oxem tea razpalan tankam vicharlem. “Barab’basak.”, oso tãnnim zobab dilo.

²²Pilatan tankam mhonn’lem: “Tôr Krist mhonntat tea Jezuk hanvem kitem korchem?” Soglleamnim zobab dilo: “Taka khursar mar!”

²³Tannem tankam vicharlem: “Tôr Tannem vaitt kitem kelam?” Punn tim odik vhoddlean bob marunk laglim: “Taka khursar mar!”

²⁴Tedna, aplea-chean kainch korunk zaina zalem punn uchambollai odikuch vaddta ti polleun, “Hea promannik mon’xachea rogta vixim mhozo kosloch guneanv na. Hi zobabdari tumchi!”, oxem mhonnun Pilatan udok ghetlem ani loka hujir aple hat dhule.

²⁵Ani akhê porjen portipall kelo: “Tachem rogot amcher ani amcheam bhurgeam-ballancher poddum!”

²⁶Tedna, tannem tankam Barab’basak sôddun dilo ani Jezuk jerbond diun khursar marunk tanchê adhin kelo.

²⁷Tedna razpalacheam soinikamnim Jezuk raznivasant vhelo ani Tachê bhonvtim soglli polttonn ektthãi keli.

²⁸Tachim vostram kaddun Tacher ek tambddem-lal avoronn ghalem;

²⁹ani kantteancho êk mukutt vinnun Tachea mathear ghalo, ani Tachea uzvea hatant êk boddi dili. Tachê mukhar dimbi moddun, te Taka kenddun mhonntale: “noman tuka Judevanchea raza!”

³⁰Tacher thimpi uddounk lagle ani boddi kaddun gheun ti Tachê tokler marunk lagle.

³¹Tachim khebaddam kelea uprant tãnnim tem tambddem avoronn kaddlem ani novean Taka Tachim khaxa vostram ghalim; ani khursar marunk te Taka gheun gele.

³²Bhair sortôch, Simanv nanvacho, Siren ganvcho, konn-êlo monis tankam mell’lo ani tãnnim taka Jezucho khuris bollan vhorunk lailo.

³³Ani Golgota mhonnlolea zagear (mhonngê Kortteachea zagear) pavtôch,

³⁴tãnnim soreant pint misllun Taka pieunk dilem, punn tem chaklea uprant To pienam zalo.

³⁵Taka khursar marlea uprant, tãnnim sorti ghalun Tachim vostram vanttlim,

³⁶ani thõi bosun te Taka rakhunk ravle.

³⁷Tachea mathea voir Tacho guneanv oso boroun ghalo: “Judevancho Raza To Jezu Ho”

³⁸Tedna Tachê borabôr dogam punddank-ui khursar marle, ekak uzvean ani dusreak davean.

³⁹Tennem ieto-veto lôk apli tokli haloit Jezucheô kenddnneô kortalo

⁴⁰ani mhonntalo: “Devmondir moddun uddoupacho ani tem tin disamnim novean bandpacho to tum mum rê?! Tum Devacho Put zalear, tukach nivar ani khursa velo denv atam!”

⁴¹Têch porim dhormxastream ani zannteam borabôr mukhel iadnik-ui Tachi ninda korun mhonntale:

⁴²“Dusreank soddoilim hannem, hachê lagim apnnakuch soddounk zaina! To Israelacho raza khõi! Tôr taka atam khursa velo denvum-di ani tedna ami tacher bhavart dovortolenv!

⁴³Hannem Devacher visvas tthevlo, atam Devak to zai zait zalear, Tannench haka soddouum-di tôr ‘Hanv Devacho put’, oxem hannem sanglelem asa!”

⁴⁴Têch bhaxen Tachê borabôr khursar marlele te pundd-ui Tacheô kexttaeô kortale.

⁴⁵Don’par thaun tin vazo porian sogllea desacher kallôk poddlo

⁴⁶ani sumar tin vaztam Jezun vhoddlea tallean mhonn’lem: “Eli, Eli, lama sabakthani?” mhonngê “Deva Mhojea, Deva Mhojea, kiteak Tunvem Mhaka sanddloi?”

⁴⁷Hem aikun thõi asleleam kãi zannamnim mhonn’lem: “Ho Elijak ulo marta.”

⁴⁸Ani tanchê modlea eklean dhanv marun ek allombem haddlem, ani tem xirkeant buddoun ani êkê boddiek lavun tannem Jezuk pieunk dilem.

⁴⁹Heramnim mhonn’lem: “Rav! Elija Taka soddounk ieta zalear polleum-ia.”

⁵⁰Punn aniêk pavtt vhoddlean arddun Jezun prann sôddlo.

⁵¹Tedna Devmondirantlea Gabhareacho podd’do voir thaun sokol doxim pinzlo, bhi kampli, khoddpam futtlim,

⁵²somadhi ugteô zaleô, ani zaiteam meleleam promannik mon’xancheô kuddi jivont zaleô,

⁵³ani Tachea punorjivontponna uprant tim apleam somadhintlim bhair sorun povitr xarant gelim ani sobar zannank dixtti poddlim.

⁵⁴Bhikamp ani her ghòddtalem tem polleun, xotpoti ani tachê borabôr Jezuk rakhtale te zobor bhieun mhonnunk pavle: “Ho khoreponnim Devacho Put aslo!”

⁵⁵Jezuchi seva-chakri korun Galileiak thaun Tachê pattlean aileleô sobar bailô thõi asleô ani pelean ravun hem sogllem polletaleô.

⁵⁶Tanchê bhitôr Mari Magdalen, Jakobachi ani Juzechi avoi Maria, ani Zebedevacheam putanchi avoi.

⁵⁷Sanz zalea uprant, Juze nanvacho, Arimateiacho êk girest monis ailo; to-i Jezucho xis zal’lo.

⁵⁸Tannem Pilata-xim vochun Jezuchi kudd magli. Tedna Pilatan ti kudd diunk laili.

⁵⁹Kudd gheun, Juzen ti êkê nitôll olin guttlaili

⁶⁰ani khoddpant katrun kel’lê aplê novê somadhint ti nikhipili. Magir tannem êk vhoddli fatôr lonvddun haddli ani, somadhichea darak ti lavun, apunn gelo.

⁶¹Mari Magdalen ani dusri Maria somadhi mukhar bosun ravleô.

⁶²Dusrea disa, mhonngê Toiarechea Disa uprant, mukhel iadnik ani Farizev Pilata-xim ektthãi zale;

⁶³tãnnim mhonn’lem: “Xrêxtt Razpala, tea fottingan jivo astanam oxem sanglam mhonn amkam ugddas asa: ‘Tin dis zatôch hanv novean jivont zatolom.’

⁶⁴Mhonntôch tisro dis porian somadhi bori korun rakhunk lai; na zalear, tache xis ghoddiek ieun taka choriam vhortit ani lokak sangtit: ‘To mel’leantlo jivont zala.’ Hi nimanni fottovnni adim zaun gelam tachê poros odik paxtt zateli.”

⁶⁵Pilatan tankam sanglem: “He polle rakhonndar asat; tôr vochat ani tumkam tankta tê bhaxen rakhônn korat.”

⁶⁶Thõisorle te bhair sorle ani, fatrik xik’ko marun ani rakhonndarancho paro dovrun, somadhi ghôtt korun gele.