Read Goan Konkani Mt 3 Bible Online

Mt 3 - Goan Konkani bible

Mt 3

¹Team disamnim Juanv Batist oso porgottit ani sangit eilo:

²‘Devachem Raj ieunchem zalem dekhun jivit-mon bodlat.’

³“Oronnneant arddoto ekleacho tallo: ‘Somiacho rosto toiar korat tacheo vatto nitt korat’ ”, oxem Izaias provadea udexim Devan sanglem tem hachech vixim

⁴Ho Juanv unttachê lhonvechem angavlem nhestalo ani penkttak chamddeacho potto bandtalo ani toll ani ran’vott mhonv khaun jietalo.

⁵Tedna Jeruzaleacho ani akhea Judeiacho ani Jordana-bhonvtonnchê sogllê talukecho lôk taka mellunk vetalo

⁶ani aplim patkam ucharun Jordanant tachê koddlo batism ghetalo.

⁷Zaite Farizev ani Saduki batism gheunk ietat tem polleun, tannem tankam mhonn’lem: “Furxeanchi zat tumi! Ieuncho asa to krôdh vattaiat mhonn konnem tumkam xiddkaileat?

⁸Tumchem jivit-mon bodllonnechim purtim follam dakhoiat,

⁹ani hanv tumkam sangtam, heam fatranchim Abrahamak bhurgim upzounk Devak tank asa dekhun “Amcho bapui koso amkam Abraham asa”oxem tumi tumkanch mhonno nakat.

¹⁰Atam legun zhaddanchea mullak kuradd ghal’li asa. Mhonntôch jem-jem zhadd borem foll dinam, tem-tem Dev katortolo ani ujeant uddoitolo.

¹¹Jivit-mon bodlopa khatir hanv tumkam udkan batism ditam khorem, punn mhojê pattlean ieta To mhojê-von bollvont, ani Tacheô vhannô hatant dhorunk mhaka favo na. To zalear Povitr Atmean ani ujean tumkam batism ditolo.

¹²Aplo moddkull Tachea hatant asa ani To Aplem kholl nitoll kortolo, Aplo gonv koddeant bhôrtolo ani pol palovnam toslea ujeant lastolo.”

¹³Tedna Juanvan Apnnak batism diunchê khatir Jezu Galileia thaun Jordanak Juanvaxim ailo.

¹⁴Punn “Mhaka Tujê koddlo batism gheunchi goroz asa, ani Tum mhojê sorxim ietai?!”, oxem mhonnun, Juanv Taka addaitalo.

¹⁵Punn Jezun taka oso zobab dilo: “Tem atam asum-di; oxem korun, jem Devachê sogllê taronnik ievzonnê pormannem korchem asa, tem sogllem ami palltelenv.” Tedna Juanv kobul zalo.

¹⁶Jezu batism gheun udkantlo bhair sorun ienam fuddem, ovchituch sôrg ugòddlo ani Devacho Atmo Apnnacher parvo koso denvun ieta to Tannem dekhlo.

¹⁷Ani okosmat sorgar thaun êk tallo oso gazlo: “Ho Mhozo Put, sogllê opurbaiecho; Tacher asa Mhojem dhadosponn.”