Read Goan Konkani Mt 4 Bible Online

Mt 4 - Goan Konkani bible

Mt 4

¹Tedna, Devcharan Jezuk naddche khatir, Povitr Atmean Taka oronneant vhelo.

²Challis dis ani challis rati Jezun upas kelo, ani tea uprant Taka bhuk lagli.

³Atam lagim sorun, Naddpean oxem mhonn’lem: “Zor Tum Devacho Put, tôr heam fatranche undde zaunk adnea kôr.”

⁴Punn Tannem oso portipall kelo: “Povitr Pustokar boroil’lem asa tem hem: ‘Unddeach vorvim nhoi, punn Devachea tonddantlem bhair sorta tea-tea utra vorvim monis jieta.’ ”

⁵Magir Devcharan Taka Povitr Xarant vhelo ani, Devmondirachea kollsar Taka ubo korun,

⁶oxem mhonn’lem: “Zôr tum Devacho Put, tôr hanga thaun sokla uddki mar, kiteak oxem boroil’lem asa: ‘Tujê vixim To Apleam dutank hovalo ditolo ani tuzo pãi fatracher adllonam zaunk, te apleam hatamnim tuka uklun dhôrtele.’ ”

⁷Jezun taka oso zobab dilo: “Oxem-i boroil’lem asa: ‘Sorvespora tujea Devachi tunvem porikxa korum noiê.’ ”

⁸Tea uprant Devcharan Taka eka bhov unch dongrar vhelo ani sonvsarantleô soglleô razvottkeô ani tancho dobazo Taka dakhoilim.

⁹Tannem mhonn’lem: “Sorpottun tum mhaka nomoskar korxi zalear, hanv hem sogllem tuka ditolom.”

¹⁰Tedna Jezun taka oso portipall kelo: “Pois sor, Soitana, kiteak oxem boroil’lem asa: ‘Sorvespora tujea Devak tum bhôztoloi ani Tachi ekleachich seva kortoloi.’ ”

¹¹Xekim Devchar Tachê sorxilo koddsorlo ani devdut ieun Tachi seva korunk lagle.

¹²Juanvak koidi kelo mhonn aikolea uprant Jezu Galileiak gelo.

¹³“Zabu-lonachea ani Neftalichea ganva! Doriachê vatter Jordanachê pelê toddi asto Raxttranche Galileia! Kallokant ravtelea lokan êk vhôdd uzvadd dekhlo: mornnachi savlli poddlelea ganvant ravteleank êk uzvadd udelo.”, oxem Izaias provadean sanglelim him utram pallon ieunche khatir, Nazaret soddun, Zabulonachê ani Neftalichê ximer, doria-deger asto Kapernaumant Tannem tthikann kelem.

¹⁷Tedna thaun Jezu oxem mhonnun updês diunk laglo: “Jivit-mon bôdlat kiteak Sorginchem Raj ieunchem zalem.”

¹⁸Galileiachea Doriachê deger choltana Tannem dogam bhavam, Simanv mhonnlelea Pedruk ani tachea bhava, Andrek doriant pager martale te dekhle; te kharvi asle.

¹⁹Tannem tankam mhonn’lem: “Mhojê pattlean ieiat ani tumkam Hanv mon’xank dhôrtat tosle kharvi kortolom.”

²⁰Ani rokddech, zallam sanddun, te Tachê pattlean gele.

²¹Ani thõi thaun fuddem vochun, anink dusream her dog bhavam Jakoba, Zebedevachea putak ani tachea bhava, Juanvak hoddear, Zebedeva aplea bapaichea sangata apleô rampnni xinvtale te Tannem dekhle, ani tankam apoile.

²²Rokddech, hoddem ani aplea bapaik sanddun, te Tachê pattlean gele.

²³Jezu akhea Galileiant bhonvun-firun tancheam devsthanamnim xikovnn ditalo, Rajeachem Xubhvhortoman porgôtt’talo, ani loka modem sogllea jin’sacho pidda-rôg boro kortalo.

²⁴Tedna Tachem nanv akhê Siriek gazlem, ani somest vaittakarank, sobar jin’sanchê pidden ani koxttam-dogdamnim vollvollteleank, devchar bosleleank, morluk marteleank ani aren poddleleank Tachê sorxem haddtalim ani Tannem tankam borim kelim.

²⁵Galileia thaun, Dha Nogranchea Pranta thaun, Jeruzalea thaun, Judeia thaun ani Jordana-poltoddchea Pranta thaun ieun, lokacheô vhodd urponji Tachê pattlean vetaleô.