Read Goan Konkani Mt 5 Bible Online

Mt 5 - Goan Konkani bible

Mt 5

¹Lokacheô urponji polleun Jezu dongrar choddlo. Thõi To boslo ani Tache xis Tachê sorxem aile.

²Tedna Aplem tondd ugddun, oxem To tankam xikounk laglo:

³Otmean apunn gorib mhonn zannant tim subhagi, Sorginchem Raj tanchem.

⁴Rudon kortat tim subhagi: Dev tankam buzvônn ditolo.

⁵Bholim tim subhagi: prithum’ daiz tanchem.

⁶Promannikponnak tanetat ani bhuketat tim subhagi: Dev tankam dhadoxi kortolo.

⁷Doiall tim subhagi: Dev tanchi doia kortolo.

⁸Kallzan nitoll tim subhagi: tim Devak polletelim.

⁹Xanti kortat tim subhagi: Dev tankam Aplim bhurgim mhonntolo.

¹⁰Promanikponna khatir dhumallo sõstat tim subhagi: Sorginchem Raj tanchem.

¹¹Mhojê khatir tumkam opman’tit, tumkam dhumallo ditit ani sogllea jin’sachem vaitt tumcher add uloitit tedna tumi subhagi.

¹²Khuxal ani sontosbhorit zaiat, kiteak sorgar bhov vhoddli mozuri tumchi. Tumchê adim provadeank tosoch tãnnim dhumallo dila.

¹³Tumi prithumechem mitt. Punn mittachi kharsann bigòddlea zalear, tem kiteak upartelem? Tem fokot bhair uddounchem ani pãiam tolla mostunchem, anink kiteakuch upkarona.

¹⁴Tumi sonvsaracho uzvadd. Dongrachea mathear bandlelem xar lipon urona.

¹⁵Pailê pondak dhampun dovrunk konnuch ponntti laina; ghorant asto soglleank ticho uzvadd poddunk, ti eka peddar dovortat.

¹⁶Têch porim tumcheô boreô kornneô polleun sorgar asto tumchea Bapak mon’xamnim vakhannchê khatir, tumcho uzvadd tanchê mukhar porzollum-di.

¹⁷Somurt vô Provadi, hankam kaddun uddounk Hanv ailam mhonn tumi somzonakat; tankam kaddun uddounk nhoi, punn sopurnnaiek pavounk Hanv ailam.

¹⁸Khorench tumkam sangtam: sôrg ani sonvsar soro porian ghoddonk zai titlem-i ghòddlea xivai, Somurtintlem ek soglleam-vôn lhan okxor vô okxorank lail’li êk supurli thikli legun na zaunchi na.

¹⁹Mhonntôch, zôr konn heam supurleam adneam bhitorli êk porian môddtit ani toxem korunk herank xikoitit, tankam Dev Sorginchea Rajeant soglleam-vôn lhan mhonn lêkhtolo; punn teô samballtit ani herank xikoitit, tankam Dev Sorginchea Rajeant vhodd mhonn man’tolo.

²⁰Dekhun Hanv tumkam sangtam: Devak man’ta tem korunk xastream ani Farizevam poros tumi odik raji nant zalear, Sorginchea Rajeant tumi bhitôr sorchinch nant.

²¹‘Jivexim marum noiê’, purvozank oxem sanglelem mhonn tumi aikolam; ani jivexim martit tancher neaisobhechê khastichem formonn poddtelem.

²²Tôr Hanv tumkam sangtam: konn-ui aplea peleacher rag dhôrta zalear, tacher khastichem formonn poddtelem; konn-ui aplea peleak okman kortit zalear, tacher Mha-Dhormsobheche khastichem formonn poddtelem; ani konn-ui taka noxtto mhonntit zalear, ujeachea iemkonddachi khast taka favo zateli.

²³Mhonntôch, tujem dan vedi-xim gheun ietai zalear, ani tujea pelea add kitem-i asa mhonn tuka thõi ugddas zait zalear,

²⁴thõisoruch vedi mukhar tujem dan toxench sôdd ani poilim vochun tujea pelea lagim somadhan kôr; magir portun ie ani tujem dan bhettoi.

²⁵Tujea vadea lagim upraslolo tonn’to tachê borabôr vatter astananch borê bhaxen sompoi; na zalear to tuka nitidarachea hatant diit bi, ani nitidar tuka choukidarachea tabeant ghalun bondkhonnint uddoit.

²⁶Hanv tuka khorench sangtam: tuzo nimanno pav-as’sarion [1] tunvem farik kori-sôr thõisorli tuka suttka mellchich na.

²⁷‘Pordvar korum noiê’, oxem sanglelem asa mhonn tumi aikolam.

²⁸Tôr Hanv tumkam sangtam: zôr konn-ui êkê ostriecher kamcharim dolle ghalit, tannem aplea kallzant tichê kodde pordvar keloch mhonn opradi.

²⁹Patok adarunk tuzo uzvo dollo tuka oddun vhorta zalear to umttun kadd ani bhair uddoi, kiteak tuji akhi kudd emkonddant uddoun gheunchê poros, tujea ekach sandeacho nas zal’lo tuka odik borem.

³⁰Ani tuzo uzvo hat patok korunk tuka oddun vhorta zalear, to katôr ani bhair uddoi, kiteak tuji akhi kudd emkonddant gel’lê bodlek, tuzo êkuch sando bigòddlo zalear tuka odik borem.

³¹Oxem-i sanglelem asa: ‘Konn-ui aplê potinnik soddun ditolo zalear, poilem tannem tika ghottsfottichem potr boroun diunchem.’

³²Punn Hanv tumkam sangtam: Somurticher add logn-sombondant jieteleanchi mat gozal kuxin dovrun, zo aplê potinnik soddun dita, to tika pordvarinn zai-xi korta; ani konn ghottsfottichem potr diun sôddlolê bailê kodde logn zait zalear, to pordvar adarta.

³³Anink-ui purvileank sanglelem tumi aikolam: ‘Soput môddum noiê, punn Sorvesporak tunvem dil’leam soputank pallo di.’

³⁴Tôr Hanv tumkam sangtam: soput diunchoch nhoi: zaum sorgachean, kiteak Devachem xinvason tem;

³⁵zaum prithumechean, kiteak Tacheam pãianchi monnoi ti; nhoi mhonn Jeruzaleachean, kiteak Vortea Razachem xar tem.

³⁶Tujea matheachean-ui soput dium noiê, kiteak tacho êk-ui kens dhovo vô kallo tujean korunk zaina.

³⁷Tumchem ulovop itlench zaum-di: hôi zalear hôi, nhoi zalear nhoi; hachê-von ogllem tem vaittovea koddlem ieta.

³⁸‘Dolleak dollo, dantak dant’ : oxem mhonnlelem tumi aikolam.

³⁹Punn Hanv tumkam sangtam: vaitt mon’xak tum addainaka; konnei tuka uzvea polear marit zalear, dusro-i polo taka dakhoi.

⁴⁰Konn tujem angavlem vhorunk neaisobhent vivad korit zalear, taka tuzo jubo-i vhorum-di.

⁴¹Ani konn-ui tuka êk kôs cholunk boll korit zalear, don kos tachê sangatim chol.

⁴²Tujê kodde magit taka di; ani tujê lagim uxnnem magun gheunk sôdta taka patt vollinaka.

⁴³Tujea peleacho môg kortoloi ani tujea dusmanacho dvês dhôrtoloi oxem sanglelem tumi aikolam.

⁴⁴Punn Hanv tumkam sangtam: Sorgincho tumcho Bap Aplo suria vaitt toxench boream mon’xancher ude-so korta, ani Aplo paus promannik toxench khotteam mon’xancher ghalta dekhun tumi Tachim bhurgim zauncheak, tumcheam dusmanancho môg korat ani tumkam piddapidd diteleam pasot magat;

⁴⁵

⁴⁶Tumcho môg korteleancho tumi môg korxeat zalear, kosli tumkam mozuri mellot? Dônddvosuldar-ui toxench korinant?

⁴⁷Ani tumcheam bhavbhoinninkuch tumi solam’ korxeat zalear, vhodd-xem kitem kelem tumi? Onbhavarti legun oxench kortat ki na?

⁴⁸Mhonntôch, zoso tumcho sorgincho Bap sopurnn, toxinch tumi-i sopurnn zaiat.