Read Goan Konkani Mt 7 Bible Online

Mt 7 - Goan Konkani bible

Mt 7

¹Dev tumchi nit korina zauncheak, tumi dusreanchi nit kori nakat.

²kiteak tumi nit korxeat têch toren To tumchi nit kortolo; ani tumi zôkxeat teach mapan To tumkam porot zôktolo.

³Tujea peleachea dolleant asa tem kisor tum kiteak polletai, ani tujea dolleant asa ti patti tuka dixtti poddona?

⁴Tujea dolleant êk patti astana, tujea peleak, tujea dolleantlem kisor mhaka kaddum-di’, oxem tujean koxem mhonnunk zata?

⁵Arê ddhongea, tujea dolleantli patti poili kadd, ani magir tujea peleachea dolleantlem kisor kaddunk tuka nivoll dixtti poddtelem.

⁶Povitr tem kaddun sunneank ghalinakat; ani tumchim motiam dukranchea fuddeant uddoinakat, kiteak tim ghoddiek pãiam tolla maddoitit ani porot tumchea angar ieun tumche kuddkean’-kuddke kortit.

⁷Magat ani tumkam melltelem; sôdat ani tumkam gavtelem; darar marat ani tem tumkam ugòddtelem

⁸kiteak magtat tankam mellta, sôdtat tankam gavta; ani darar martat tankam tem ugòddtolem.

⁹Aplea putan unddo magit zalear taka fatôr kaddun dita toslo konn monis tumchê modem asa zait?

¹⁰Ani maslli magit zalear, to taka sorôp kaddun ditolo?

¹¹Tumi vaittovim zaun-ui, tumcheam bhurgeank boreô vostu diunk tumi zannont zalear, kitlo odik tumcho sorgincho Bap Apnna lagim magtat tankam boreô vostu diuncho na?

¹²Mhonntôch, dusreamnim tumchê thãi korchem mhonn tumkam zai, toxench tumi-i dusream thãi korat: Somurt ani Provadi xikoitat tem hench.

¹³Oxir darvontteantlean bhitôr sorat, kiteak ghorttannak pavoita to darvontto rund ani to marôg viskôll, ani tantlean veta to lôk puskôll.

¹⁴Punn jivitak pavoita to darvontto kitlo mhonn oxir ani to marôg kitlo mhonn kotthin! Ani bhov thoddeank to mellta.

¹⁵Fottkiream provadeam vixim chotraien ravat; menddreanchem rupnnem gheun tumchê-xim ietat, punn bhitorlean krur landdge te.

¹⁶Tanchim follam polleun tumi tankam ollkhun kaddtelet. Kanttiancheô konnem dakô kaddleat zait? Ani sorantteanchim konnem anjiram kaddlim-xim asat?

¹⁷Têch bhaxen, borem zhadd borim follam dita ani vaitt zhadd vaitt follam dita.

¹⁸Borea zhaddachean vaitt follam dium nozo, nhoi mhonn vaitt zhaddachean borim follam dium nozo.

¹⁹Borem foll dinam toslem zhadd katortat ani ujeant uddoitat.

²⁰Dekhun tanchim follam polleun tumi tankam ollkhun kaddtelet.

²¹Mhaka ‘Somia, Somia!’ mhonn’tat tim sogllinch Sorgarajeant bhitôr sorchim nant punn fokot sorgar asto Mhojea Bapachi khuxi kortat tinch Sorgarajeant bhitôr sortelim.

²²To Dis ietôch sobar zanna Mhaka mhonntelim: ‘Somia, Somia, Tuzo sondêx ami porgôttlo, nhoi? Ani Tujea Nanvan ami devchar kaddle, nhoi? Ani Tujea Nanvan sobar vismitam ami kelim, nhoi?

²³Ani tednam Hanv tanchea tonddar martolom: ‘Khotteponn korteleamnô, Mhojê sorxilim koddsorat, kiteak Hanvem tumkam kednanch ollkhunk nant.’

²⁴Dekhun, him Mhojim utram aikotat ani tanchê pormannem choltat tim aplem ghor khoddpar bandlelea eka xannea mon’xa porim hanv taka dortam.

²⁵Paus poddlo, udkache lott aile, vadoll suttlem ani tea ghorar marlem, tori tem mòddlem na, kiteak tem khoddpar bandlelem.

²⁶Punn him Mhojim utram aikun, tanchê pormannem cholonant tim aplem ghor renver bandlelea eka pisatt mon’xa sarkim.

²⁷Paus poddlo, udkache lott aile, vadoll suttlem ani tea ghorar marlem, ani tem mòddlem, ani tachem sarkem ghorttann zalem!

²⁸Jezun Aplem ulovop sompoilem ani Tachi xikovnn aikun lôk zobôr ojap zatalo,

²⁹kiteak tancheam xastream bhaxen nhoi, punn odhikaran To tankam xikovnn ditalo.