Read Goan Konkani Mt 8 Bible Online

Mt 8 - Goan Konkani bible

Mt 8

¹Dongra velo denvlea uprant, lokacheô urponji Tachê pattlean geleô.

²Ovchituch eka koddkaran lagim sorun Taka nomoskar kelo, ani mhonn’lem: “Saiba, Tuka zai zalear, Tujean mhaka nitôll korunk zata.”

³Jezun Aplo hat vistarun taka lailo ani mhonn’lem: “Hôi, Mhaka zai: nitôll za.” Ani teach vellar to koddantlo nitôll zalo.

⁴Tedna Jezun taka sanglem: “Polle, hem konnakuch sangi naka, punn voch ani tujem ang iadnikak dakhoi ani tankam ek govai koxi Moizesan formailelem dan bhettoi.

⁵Jezu Kapernaumant bhitôr sorlea uprant êk xotpoti upkar magunk Tachê sorxem ailo;

⁶Tannem mhonn’lem:” Saiba, mhozo chakôr ghorant aren poddlolo asa ani ekdomuch vollvollta.”

⁷Jezun taka mhonn’lem: “Hanv ietam ani taka boro kortam.”

⁸Portipallun xotpotin mhonn’lem: “Saiba, tunvem mhojea ghora ieunk mhaka favonam; ek utor mat uloi ani mhozo chakôr boro zatolo.

⁹Tôr hanv-ui dusreachea hata khal asam ani mhojê-i khal xipai asat; ani tantlea ekleak hanv sangtam: ‘Voch!’, ani to veta; dusreak: ‘Ie!’, ani to ieta; mhojea chakrak: ‘Omkem kôr!’, ani to korta.”

¹⁰Hem aikun Jezu ekdom’ ojap zalo ani Apnna pattlean ieteleank Tannem mhonn’lem: “Hanv tumkam khorench sangtam, iedo vhoddlo bhavart mhaka Israelant pasun mellunk na.

¹¹Hanv tumkam anink ek sangtam: Udenti ani Ostomtê thaun zaitim zonnam ietelim ani Abrahama’, Izaka ani Jakoba sangata Sorginchea Rajeant jevnnak bostelim,

¹²punn razacheam putam-dhuvank Dev bhailea kallokant uddoitolo; thõi tim rudon korun ani dant korkoraun astelim.”

¹³Ani Jezun xotpotik mhonn’lem: “Tum voch, apleak zatelem mhonn tunvem bhavart dhôrloi toxem tuka zaum-di.” Ani teach vellar chakôr boro zalo.

¹⁴Ani Pedruger vochun, tachê sasuk zoran antrunnar poddloli Jezun dekhli;

¹⁵Tannem tichea hatak dhorina fuddem ticho zôr poddlo ani utthun ti Tacho poramôs korunk lagli.

¹⁶Sanz zatôch devchar bosleleam zaiteam zannank Tachê sorxem haddlim; Izaias provadean oxem sanglelem, Tannem amche velo pidda-rôg ubarlo ani amcheô boll’llikô apnnacher ghetleô”, tem pallon ieuncheak Tannem eka utran devchar kaddle ani soglleam vaittakarank borim kelim.

¹⁸Apnna bhonvtonnim lokachi khêtt polleun, Jezun doriachê pelê toddi vochunk lailem.

¹⁹Eka dhormxastrean lagim sorun Taka mhonn’lem: “Guruji, tum vexi thõi hanv Tujê pattlean ietolom.”

²⁰Ani Jezun taka sanglem: “Koleank dholi asat ani varea veleam suknneank nhidunk zage asat, punn Mon’xachea Putak Apli tokli tenkounk khõisoruch svat na.”

²¹Tacheam xisantlea anink eklean Taka mhonn’lem: “Poilim mhaka vochun mhojea bapaik matiek lavum-di.”

²²Jezun taka sanglem: “Tum Mhojê pattlean ie, ani meleant tannnim apleam mel’leank matiek lavum-di.”

²³Tedna Jezu eka hoddear choddlo; Tache xis-ui Tachê pattlean gele.

²⁴Ani ovchituch doriant itlem khor ek tufan upraslem, ki lharam hoddea voir pavtalim. Punn To nhidlolo aslo.

²⁵Lagim sorun Tacheam xisamnim Taka zago kelo ani mhonn’lem: “Amkam vattai, Saiba, ami mortanv!”

²⁶Ani Tannem mhonn’lem: “Tumi itle bhezudd kiteak? Itlo holko tumcho bhavart?” Magir utthun Tannem vareak ani doriak bexttaile ani ekdom’ thonddai zali.

²⁷Te ojap zale ani mhonnunk lagle: “Ho varo ani ho doria pasun aikotat tem, kosle torecho monis ho!’

²⁸Gadara prantant, doriachê pelê toddi To ailea uprant, somadhintle bhair sorto, devchar boslele, dog monis Taka mell’le; itle marekar te asle, ki konnacheanunch tê vatten vochunk zainaslem.

²⁹Ani ovchituch te bob marunk lagle: “Jezu, Devachea Puta, Tuka amchê kodde koslem kam’ asa? Vêll pavchê adinch amkam vollvollaunk ailai kitem?”

³⁰Te aslele thõi thaun matxe pelean dukrancho êk vhoddlo hindd chortalo,

³¹Mhonn’toch devchar Jezu lagim oxem prarthun magunk lagle: “Hangasorle amkam bhair ghaltai zalear, hinddantleam dukram bhitor vochun rigunk amkam rojea di.”

³²Ani Tannem tankam mhonn’lem: “Vochat!” Ani te bhair sorun dukram bhitôr vochun rigle; ani ovchit sogllo hindd kollsa velean nettan doriant dhanvun gelo ani udkant buddon melo.

³³Rakhnne pollun gele ani nogrant vochun, devchar bosleleank kitem ghòddlelem tem soit sogllem tãnnim kollit kelem.

³⁴Ovchit nograntlo sogllo lôk Jezuk mellunk bhair sorun ailo, ani, Taka pollenam fuddem, aplea ganva bhair voch mhonn Tachê lagim magunk laglo.