Read Goan Konkani Mt 9 Bible Online

Mt 9 - Goan Konkani bible

Mt 9

¹Hea pasot hoddear bosun Tannem poltôdd marli ani To khud’Aplea nogrant ailo.

²Ani tednanch kai zonnamnim antrunnar poddlelea eka arkarak Jezu-xim haddlo; tancho bhavart polleun, Jezun arkarak mhonn’lem: “Dhir dhôr, puta, tujim patkam tuka bhògxileant.”

³Hem aikun thoddeam xastreamnim apnnam bhitôr mhonn’lem: “Ho monis devninda korta!”

⁴Tanchim chintnam ollkhun, Jezun mhonn’lem: “Tumchea monant vaitt kiteak chint’tat tumi?

⁵Tôr heam donantlem khõichem mhonnunk odik sompem: ‘Tujim patkam tuka bhògxileant!’, oxem mhonnunk, vô ‘utth ani chollunk lag!’, oxem mhonnunk?

⁶Punn Mon’xachea Putak sonvsarant patkam bhogsunchi podvi asa mhonn tumkam kollon ieunchê khatir — Tannem arkarak mhonn’lem: — “Utth, tujem antrunn ukôl ani ghora voch.”

⁷Ani to utthlo ani aplea ghora gelo.

⁸Hem polleun lôk bhielo ani mon’xank osli podvi dilea dekhun Devak tãnnim vakhann’lo.

⁹Ani thõicho cholot vetana, manddvir boslelea, Matêv nanvachea , eka mon’xak Jezun dekhlo, ani taka mhonn’lem: “Mhojê pattlean ie.” Ani to utthun Tachê pattlean gelo.

¹⁰To ghorant jevnnak boslolo astana, sobar dônddvosuldar ani vaitt chaliche monis aile ani Jezuchea ani Tacheam xisam sangata jevnnak bosle.

¹¹Hem polleun Farizevamnim Tacheam xisank mhonn’lem: “Dônddvosuldaram ani vaittoveam sangatim tumcho Guru jevnnak bosta tem kitem?”

¹²Hem aikun Jezun zobab dilo: “Borim asat tankam nhoi, punn vaittakarank ki voizachi goroz.

¹³Vochat ani heam utrancho ôrth konn to xikat: ‘Iôdn naka Mhaka, doia zai.’ Khorench sangtam, tumi apnnank promannik mhonn dhôrtat tankam nhoi, punn konn apnnank patki mhonn lêkhtat tankam apounk Hanv ailam.”

¹⁴Juanvache xis Jezu sorxem aile ani tãnnim vicharlem: “Ami ani Farizev upas kortanv, punn tuje xis upas korinant tem koxem?”

¹⁵Ani Jezun tankam sanglem: “Apnnam borabôr novro aso-sôr, novreache pavnne dukhant asunk zata zait? Punn novreak tanchê sorxilo kaddun vhorcho vêll pavtolo ani tedna te upas kortele.

¹⁶Pornnea vostrak konnuch anvllonk naslelea novea lugttacho kopo marinam, kiteak to vostra thaun oddon bhair sorta ani fallo odik vhoddlo zata.

¹⁷Nhoi mhonn novo soro pornneam cham-bddeam-potiamnim bhorinant; bhôrlo zalear, chambddeam-potio futt’tat, soro vhanvun veta ani chambddeam-potiancho-i ibadd zata. Na, novo soro noveam chambddeam-potiamnim bhôrtat ani don-ui samballon urtat.”

¹⁸Oxem To tanchê kodde uloita thõich astana, ovchit êk odhikari ailo ani Tacheam pãiam poddun tannem mhonn’lem: “Saiba, mhoji dhuv atanch melea; punn Tum ie ani ticher Tuzo hat dovor ani ti porot jivi zateli.”

¹⁹Jezu utthlo ani Apleam xisank gheun tachê pattlean gelo.

²⁰Okosmat bara vorsam rogtpat zal’li êk bail Tachê pattlean aili ani Tachea avoronnachê degek tinnem hat lailo;

²¹kiteak ti apleach monant mhonntali: “Tachea avoronnak tori hanv hat lain zalear, hanv borim zatelim.”

²²Pattim vollon ani ticher nodor marun Jezun mhonn’lem: “Dhir dhôr, dhuvê, tujea bhavartan tuka bori keli.” Ani têch ghoddiê thaun ti bail bori zali.

²³Tea odhikariachea ghora pavlea uprant, vennu vazoitale ani lôk goddbôdd kortalo tem polleun,

²⁴Jezun mhonn’lem:” Bhair sorat; cheddum morunk na, tem nhidlam.” Ani tim Taka kenddtalim.

²⁵Punn lokak bhair ghaltôch, bhitôr vochun Tannem cheddvachea hatak dhôrlo, ani tem utthun ubem ravlem.

²⁶Hi khobor tea akhea prantant gazli.

²⁷Thõisorlo Jezu fuddem vetalo tedna,”Davidachea Puta, amchi kaklut kôr!”,oxi bob marit dog kurdd’de Tachê pattlean aile.

²⁸Ani To ghora pavtôch, te kurdd’de Tachê sorxim aile ani Jezun tankam mhonn’lem: “Hem Mhojean tumkam korunk zata mhonn tumkam bhavart asa?” Tãnnim mhonn’lem: “Hôi, Saiba.”

²⁹Tedna tancheam dolleank Tannem hat lailo ani mhonn’lem: “Tumchea bhavarta pormannem tumkam zaum-di.”

³⁰Ani tanche dolle ugòddle. Ani Tannem tankam khoraien sanglem: “Khoborddar, hem konnakuch gomchem nhoi.”

³¹Punn vochun tea akhea prantant tãnnim Tachem nanv gazoilem.

³²Te vochona fuddem ovchit devchar boslelea eka moneak Tachê sorxem gheun ailim;

³³ani devchar kaddtôch mono uloilo, ani lokan ojap zaun mhonn’lem: “Israelant oslem kednanch konnench dekhunk na.

³⁴Punn Farizev mhonnunk lagle: “Ho monis devcharanchea pordhana udexim devchar kaddta.”

³⁵Tedna lokam modli soglli pidda-rog boro korit, Rajeachi bori khobor porgottit ani tancheam devosthanamnim xikovnn diit Jezu soglleam nogram-ganvamnim gelo.

³⁶Ani lokacheô urponji polleun, teo gonvlli nasleleam menddram porim teô dogdovtaleô ani niradari zal’leô asleô dekhun tanchê vixim To churchurtalo.

³⁷Tedna Tannem apleam xisank mhonn’lem: “Pik khorench khup, punn vavraddi thodde;

³⁸hea pasot pikechea Dhonia lagim aple lunvnnê-môllnnek vavraddi dhadd mhonn magat.”