Read Goan Konkani Mk 1 Bible Online

Mk 1 - Goan Konkani bible

Mk 1

¹Devachea Puta, Jezu Kristachea xubhvhortomanachi survat.

²Oxem Izaias provadeachea pustokar boroil’lem asa: “Polle, tujê fuddem Hanv Mhojea dutak dhaddtam; to tuji vatt toiar kortolo.

³‘Sorvesporacho marôg toiar korat, Tacheô vattô nitt korat.’, oxem oronneant arddoto tallo to.”

⁴Batism diit ani patkanchea bhogsonnea khatir jivit bodôlnnecho ek batism porgôttit Juanv Batist oronneant ieilo.

⁵Akhea Judeiachea prantantlo ani Jeruzaleacho sogllo lôk tachê-xim vetalo, ani aplim patkam ucharun, Jordan nodint tachea hatantlo batism ghetalo.

⁶Juanv unttachê lhonvechem angavlem nhestalo ani penkttak chamddeacho êk potto bandtalo ani toll ani ran’vott mhonv khaun jietalo.

⁷“Mhojê pattlean mhojê-vôn bollvont Konn-Eklo ieta; sorpott poddun Tacheam vhannanchi vadi soddunk mhaka favona. Hanvem tumkam udkan batism dila khorem, punn To ki tumkam Povitr Atmean batism ditolo.”, oxem tannem porgottlem.

⁹Ani team disamnim oxem zalem: Galileiachea Nazareta thaun Jezu ailo ani Juanvan Taka Jordanant batism dilo.

¹⁰ani udkantlo voir sorona fuddem, sôrg ugto zal’lo ani Povitr Atmo parveachea rupan denvun Apnnacher tharlolo Jezun dekhlo.

¹¹Ani sorgar thaun oxi zap zali: “Tum Mhozo Put, sogllê opurbaiecho; Tujer asa Mhojem dhadosponn.”

¹²Magir rokddoch Povitr Atmean Taka bhair kaddun, oronneant vhelo.

¹³Challis dis To oronneant ravlo ani Soitan Tachi porikxa kortalo; zonavoram borabôr thõi To ravlo ani devdut Tachi seva kortale.

¹⁴Juanvak dhorun koidi kelea uprant, “Nemlolo kall bhòrlo ani Devachem Raj ieunchem zalem. Jivit-mon bôdlat ani xubhvhortoman mandun gheiat.”, oxi Devachea Rajeachi bori khobor porgottit Jezu Galileiak ieilo,

¹⁶Ekdam To Galileiachea doriachê degechean cholot vetalo. Tea doriant Simanv ani tacho bhav Andre pageram martale, kiteak te kharvi asle: tankam Tannem dekhle.

¹⁷Ani Jezun tankam mhonn’lem: “Mhojê pattlean ieiat ani tumkam Hanv mon’xank dhôrtat tosle kharvi kortolom.”

¹⁸Ani rokddech te, zallam thõich sanddun, Tachê pattlean gele.

¹⁹Ani thõi thaun matso fuddem vochun, Zebedevacho put Jakob ani tacho bhav Juanv hoddear rampnni sarkeô kortale te Tannem dekhle,

²⁰ani rokddech tankam apoile; ani Zebedevak, aplea bapaik, manaiam borabôr hoddear sanddun, te Tachê pattlean gele.

²¹Te Kapernaumak gele ani rokddoch Son’vara disa devsthanant bhitôr sorun To tankam xikounk laglo.

²²Ani dhormxastream porim nhoi, punn odhikar asto eklea porim To tankam xikoitalo dekhun, Tachê xikovnnê vixim lôk ojap zatalo.

²³Teach vellar mhello atmo boslolo êk monis tanchea devsthanant aslo, ani tannem bob marun mhonn’lem:

²⁴“Nazaretchea Jezu, amchê kodde tuka koslem kam’ asa? Amcho bhosm korunk ailai kitem? Tum konn to hanv zannom: Devacho Povitr To Eklo.”

²⁵Punn Jezun taka dhomkaun mhonn’lem: “Ogo rav ani hea mon’xa velo bhair sor!”

²⁶Ani mhello atmo taka foddfoddaun ani motti bob marun tachê velo bhair sorlo.

²⁷Sogllo lôk ojap zalo ani ekamekak vichartalo: “Hem anink kitem? Odhikar asleli, hi novi xikovnn! Mhelleam atmeank legun to hukum’ ghalta ani te tachem aikotat.”

²⁸Ani rokddench Galileiachea akhea prantant sogllê kodden Tachem nanv gazlem.

²⁹Devsthanantlo bhair sorun, Jakoba ani Juanva sangatim To samko Simanv ani Andrechea ghora gelo.

³⁰Simanvachi sasu zoran antrunnar poddleli asli ani tãnnim Taka rokddich tichi khobor dili.

³¹To lagim sorlo ani tichea hatak dhorun Tannem tika utthoili, ani teach vellar ticho zôr poddlo ani ti tancho poramôs korunk lagli.

³²Sanz zatôch, dis dharir poddlea uprant, soglleam vaittakarank ani devchar bosleleank Tachê sorxem haddlim.

³³Tachea darar nogor-bhôr lôk zomun khêtt zali,

³⁴ani jin’sam bhasancheam khup boll’llikarank Tannem borim kelim; zaite devchar-ui kaddle; Apunn konn to te zanno asle dekhun, Tannem tankam ulounk diunk na.

³⁵Dusrê sokallim, ozun kallôk astana, utthun To bhair sorlo ani eka eksurea zagear vochun thõi magnnem kelem.

³⁶Simanv ani tache sangati Taka sodunk gele;

³⁷ani To melltôch, tãnnim Taka mhonn’lem: “Sogllo lôk Tuka sôdta.”

³⁸Tannem tankam sanglem: “Dusrê koddenui, Hanvem xikovnn diunche khatir, lagxileam ganvamnim ani nogramnim vochum-ia; kiteak heach pasot Hanv ailam.”

³⁹Ani tancheam devsthanamnim updês diit ani dev-charank bhair ghalit To akhea Galileant bhonvlo.

⁴⁰Tache kodde upkar magit, ek koddkar Tachê sorxem ailo ani dimbier ravun tannem Taka mhonn’lem: “Tuka khuxi asot zalear, Tujean mhaka nitôll korunk zata.”

⁴¹Tache churchure dhorun, Jezun Aplo hat vistarlo ani to taka lavun mhonn’lem: “Hôi, Mhaka khuxi asa; nitôll za.”

⁴²Ani oxem mhonnona fuddem tachem kodd nanch zalem ani to nitôll zalo.

⁴³“Polle, konnakuch hem sanginaka; punn voch ani tujem ang iadnikak dakhoi; ani porjek tuji pekovnni ruzu korchê khatir, tuje nitôllsannik lagun Moizesan formail’lem dan bhettoi.”, oxem sangun, taka khoraien xiddkaitoch, Jezun taka veginch daddlo.

⁴⁵To gelo, punn hi khobor oxê bhaxen porgottunk ani soglleank sangunk laglo, ki Jezuchean ugtim khõicheach nogrant vochunk zaina zalem ani bhair, eksuream svatancher, Taka ravchem poddlem: tori astana sogllê koddecho lôk Tachê-xim ietalo.