Read Goan Konkani Mk 10 Bible Online

Mk 10 - Goan Konkani bible

Mk 10

¹Thõi thaun vochun Jezu udeiant Jordanachê pelê toddi ailo, ani novean lokacheô urponji Tachê bhonvtim ektthovleô. Ani Aplê sonvoiê pormannem To tankam dusrim xikounk laglo.

²Taka kosak lavunk, lagim sorun, kãi Farizevamnim Tachê kodde oxem vicharlem: “Ghovan aplê bailek soddun dium-ieta?”

³Tannem tankam portun vicharlem: “Moizesan tumkam koslo hukum’ ghala?”

⁴Tãnnim sanglem: “Ghottsfottichem potr boroun diun, tika soddun diunk Moizesan rojea dilea.”

⁵Tedna Jezun tankam oso zobab dilo: “Tumi apleach vadeache dekhun, tumkam hi adnea tannem boroun dili.

⁶Punn rochnnechea orombak thaun ‘Devan tankam dadlo ani bail kelim.

⁷Hea pasot monis aplea bapaik ani avoik sôddtolo [ani aplê potinnik ektthovtolo,][3]

⁸ani tim dogam-i êk zatelim.’ Dekhun tim hea fuddem dogam nhoi, punn êkuch.

⁹Mhonntôch Devan ektthãi kelam tem mon’xan doxim korum noiê.”

¹⁰Ghorant novean bhitôr sortôch, xisamnim hê vixim, dusrim Taka vichar kelo.

¹¹Ani Tannem tankam sanglem: “Aplê bailek soddun diun, dusrê kodde logn zait to poilê bailecher add pordvar korta;

¹²ani êk bail aplea potik soddun dusrea kodde logn zait zalear, ti-i pordvar korta.”

¹³Tannem dhakttuleam bhurgeank hat lavchê khatir, lôk tankam Tachê sorxem haddtalo. Xisamnim tankam bobatt keli.

¹⁴Hem polleun, Jezu tiddkelo ani Tannem tankam mhonn’lem: “Supurleam bhurgeank Mhojê sorxem ieunk diat; Sorginchem Raj tosleanchench dekhun tankam addainakat.

¹⁵Hanv tumkam khorench sangtam: lhan bhurgea porim Devachem Raj manun ghenant tim tantunt bhitôr sorchim nant.”

¹⁶Uprant Tannem tankam vengent gheun ani tancher Aple hat dovrun tankam axirvad dilo.

¹⁷To vattek lagchea vellar êk monis dhanvun ailo. Tachê mukhar dimbi moddun tannem Jezu kodde vicharlem: “Borea Guruji, Sasnnik Jivit mhojem daiz korun gheunchê khatir hanvem kitem korunk zai?”

¹⁸Jezun taka mhonn’lem: “Mhaka boro kiteak mhonntai? Ekleach Devak kaddun konnuch boro nhoi.

¹⁹Tum adnea zannoi: ‘Jivexim marum noiê; pordvar korum noiê; chorum noiê; lottik govai dium noiê; peleak fosoum noiê; tujea bapaik ani avoik man di.’ ”

²⁰Tea mon’xan Taka oso zobab dilo: “Guruji, mhojea bhurgeponnar thaun hem sogllem hanv pallun ailam.”

²¹Tedna tacher nodor martana Jezuk tachi opurbai disli, ani Tannem mhonn’lem: “Ek unnem tuka; voch, tujê kodde asa titlem-i vik ani goribank di, ani tuka sorgar tthevo melltolo; magir ie ani Mhozo pattlav kôr.”

²²Punn him utram aikun tachea tonddar kallôk poddlo ani tachê lagim khup girestkai asli dekhun khontibhorit zaun to koddsorlo.

²³Jezun Apnna bhonvtonnim nodor marun Apleam xisank mhonn’lem: “Girestkai asleleank Devachea Rajeant bhitôr sorunk kitlem kotthin!”

²⁴Him utram aikun xis thottakle. Punn Jezun novean uloun mhonn’lem: “Mhojeam bhurgeamnô, Devachea Rajeant bhitôr sorunk kitlem mhonn kotthin!

²⁵Eka girest mon’xak Devachea Rajeant bhitôr sorchê poros, eka unttak suiechea birddeantlean vochunk odik sompem.”

²⁶Te odik thottakle ani ekamekak mhonnunk lagle: “Toxem zalear, konnak mhonn taronn mellonk zata?”

²⁷Jezun tancher dolle lavun tankam sanglem: “Mon’xam kodde tem ghoddona; punn Deva kodde toxem nhoi, kiteak Deva lagim sogllem ghòddta.”

²⁸Pedrun tondd ghalun oxem Taka mhonn’lem: “Polle, ami sogllem sanddlam ani Tuzo pattlav kela.”

²⁹Jezun zobab dilo: “Hanv tumkam khorench sangtam: konn-ui Mhojê pasot ani Bore Khobre pasot ghor-dar, vô bhav, vô bhoinni, vô avoi, vô bapui, vô bhurgim-ballam, vô xetam-bhattam sanddtit zalear,

³⁰tim atam, heach kallant, ekak xembhôr ghetelim — ghoram-daram, bhav, bhoinni, avoiô, bhurgim-ballam ani xetam-bhattam — punn dhumallo-i bhôgtelim, ani ieta tea kallant sasnnik jivit ghetelim.

³¹Poilim asat tim sobar zannam nimannim zatelim ani nimannim asat tim poilim zatelim.”

³²Te Jeruzaleak choddun vetale; Jezu xisam fuddem choltalo; xis ghaborlele ani pattlean vetalim tim bhiel’lim. Bara zannank novean lagim gheun, Apnnak ghòddchem aslem tê vixim oxem To tankam sangunk laglo:

³³“Polleiat, ami Jeruzaleak choddun vetanv; ani Mon’xacho Put mukhel iadnikank ani dhormxastriank poradhin zauncho asa; te Tacher mornnachem formonn martele ani Taka videxeanchê adhin kortele;

³⁴ani te Tacheô kenddnneô kortele, Tacher thimpi uddoitele, Taka jerbond ditele ani jivexim martele; ani tin disam uprant Dev Taka punorjivont kortolo.”

³⁵Zebedevache put Jakob ani Juanv Tachê sorxem aile ani tãnnim Taka mhonn’lem: “Guruji, Tunvem amkam êk upkar kel’lo amkam zai.”

³⁶Tannem tankam mhonn’lem: “Hanvem tumchê khatir kitem kel’lem tumkam zai?”

³⁷Tãnnim mhonn’lem: “Tujê mhoiment ekleak Tujea uzvea hatak ani dusreak Tujea davea hatak amkam bosunk di.”

³⁸Jezun tankam mhonn’lem: “Tumi kitem magtat tem tumich nokllot. Hanvem pieunchem asa tea patrantlem tumchean pieunk zait? vô Hanvem gheuncho asa to batism tumchean gheunk zait?”

³⁹Tãnnim Taka zobab dilo: “Amchean zata.” Jezun tankam sanglem: “Hanvem pieunchem asa tea patrantlem tumi pietelet ani Hanvem gheuncho asa to batism tumi ghetelet khore;

⁴⁰punn Mhojea uzvea vô davea hatak bosunk diunk Mhojea hatant na; tem Devan toiar korun dovorlam tankam.”

⁴¹Bakiche dha zann hem aikun, Jakobacher ani Juanvacher chiddle.

⁴²Dekhun tankam Apnna sorxem apoun, Jezun mhonn’lem: “Videxeam modem tanche odhikari mhonnlele apli podvi tancher zobordosten choloitat mhonn ani toxench tanche vhoddil aplê sot’tiecho bhar tancher ghaltat mhonn tumi zannont.

⁴³Tumchê modem toxem zaunchem nhoi. Tumchê bhitôr konn vhôdd zaunk sodit to tumcho sevôk zauncho,

⁴⁴ani tumchê modem poilo zaunk sodit to soglleancho gulam’ zauncho.

⁴⁵Kiteak Mon’xacho Put Apunn-ui herank Aplê chakrek lavunk ieunk na, bogor heranchi chakri korunk ani Aplo jiv somestanchê soddvonnê pasun diunk aila.”

⁴⁶Te Jerikek pavle; ani Jezu Apleam xisank gheun ani lokachea vhôdd zomea borabôr Jerikek thaun bhair sortalo tedna, Timevacho put,Bartimêv mhonnlolo êk kurddo rosteachê deger bhikek bosun aslo.

⁴⁷Nazaretkar Jezu tevxilean veta mhonn aikotôch, to oxi bob marunk laglo: “Jezu, Davidachea Puta, mhoji kaklut kôr!”

⁴⁸Sobar zannamnim taka bobatt keli ani ogo rav mhonn sanglem, punn to odik vhoddlean bob marit ravlo: “Davidachea Puta, mhoji kaklut kôr!”

⁴⁹Jezu thamblo; Tannem tankam mhonn’lem: “Taka hanga apoiat.” Tãnnim tea kurddeak apoilo ani taka sanglem: “Dhir dhôr; utth; To tuka apoita.”

⁵⁰Aplo zhubo sanddun ani uddun-uddun to Jezu sorxem ailo.

⁵¹Tedna Jezun mhonn’lem: “Tuje khatir tuka Hanvem kitem kel’lem zai?” Kurddean Taka oso zobab dilo: “Rab’boni (mhonngê ‘Guruji’), mhaka novean nodor ie-xi kôr.”

⁵²Jezun taka mhonn’lem: “Voch, tujea bhavartan tuka boro kela.” Ani rokddich taka nodor aili ani Jezu vetalo tê vatten to Tachê pattlean gelo.