Read Goan Konkani Mk 11 Bible Online

Mk 11 - Goan Konkani bible

Mk 11

¹Te Jeruzalea lagxim ietam-ietam, Olivet Dongra kodde Betfage ani Betania pavtôch, Tannem xisam bhitorleam dogank dhaddle

²ani tankam sanglem: “Tumchê samkar asa tea gramamt vochat ani, tumi thõi bhitôr sorona fuddem, konnuch ozun tacher bosunk naslelem gaddvachem ek xingrum bandlelem tumkam melltelem; taka sôddat ani hanga haddat.

³‘Hem kiteak kortat tumi?’ oxem tumkam konn vicharit zalear, ‘Somiak tachi goroz asa ani To tem rokddoch hanga portun dhaddtolo’ mhonn sangat.”

⁴Te gele ani bhair bidint, eka dara mukhar, ek gaddvachem xingrum bandlelem tãnnim dekhlem ani taka sôddtana,

⁵thõi ubim asleleam kãi zannamnim tankam mhonn’lem: “Tea xingrak soddun tumi kitem kortat?”

⁶Jezun sanglolo zobab tãnnim tankam dilo. Ani team mon’xamnim tankam vhorunk dilem.

⁷Ani xingrak tãnnim Jezu sorxem haddlem. Tacher tãnnim aplim avoronnam ghalim, ani To tacher boslo.

⁸Sobar lokan aplim avoronnam vatter patllailim ani dusrim kãi zannamnim molleamntleo katrun kaddleleo khandiô rostear ximpddaileo.

⁹Ani fuddlean ani pattlean vetalim tim oxi bob martalim: “zôi! zôi! Sorvesporachea nanvan ieta Toch subhagi, Sorvesporak vakhann’ni!

¹⁰Amchea purvoza, Davidachem ieto raj subhagi, Bhov Vortea Devak zôi! zôi!”[4]

¹¹Jezu Jeruzaleant bhitôr sorlo ani Devmondirant gelo. Tannem sogllem chotraien polleun kaddlem; oxench, uxir zal’lo dekhun, To bara zannank gheun Betaniê gelo.

¹²Dusrea disa Betaniê thaun ietana Taka bhuk lagli.

¹³Pois thaun Tannem ek palel’lem anjirachem zhadd dekhlem ani kitem-i foll mellot kai mhonn To polleunk gelo, punn panam bogor kãich Taka mell’lem na; tôr to anjirancho kall nhoi aslo.

¹⁴Ani Tannem anjirachea zhaddak mhonn’lem: “Hea fuddem kednanch tujem foll konnuch khaunk pavona zaum.” Ani To oxem uloitana Tacheam xisamnim tem aikolem.

¹⁵Jeruzaleak pavtôch To Devmondirant gelo ani thõi viktale-ghetale tankam bhair ghalunk laglo; vattav-kaddpeanchim mezam ani parve viktoleanchim asonam Tannem omtun uddoilim;

¹⁶ani Devmondirantlean kitench haddunk-vhorunk To dina zalo.

¹⁷Ani Tannem tankam xikovnn diun oxem mhonn’lem: “Soglleam porzam khatir, Mhojea Ghor magnneachem Ghor mhonntelim, oxem Povitr Pustokar boroilelem asa nhoi? Punn tumi tem choranchi dhôl kelea.”

¹⁸Hem mukhel iadnikanchea ani dhormxastreanchea kanar poddlem ani koxê bhaxen Taka nattak korcho kai mhonn te sôdtale. To sogllo lôk Tachê xikovnnek lobdol’lo mhonnon te Taka bhietale.

¹⁹Ani sanz zatôch Jezu ani Tache xis xarantle bhair gele.

²⁰Dusrê sokallim, tevxilean vetana, tem anjirachem zhadd pallam thaun suklelem tãnnim dekhlem.

²¹Pedrun ugddas korun Jezuk mhonn’lem: “Polle, Rab’bi (mhonngê Guruji), Tunvem xiraplelem anjirachem zhadd sukun gelem.”

²²Jezun zap dili: “Devacher bhavart dovrat.

²³konn aplea kallzant dubhav dhorinastanam, apunn mhonntat tem zatelem mhonn, bhavart dhorun, hea dongrak mhonntit: ‘Hangasorlo utth ani doriant voch’, tem tanchê sorim ghòddtelem mhonn Hanv tumkam khorench sangtam.

²⁴Hea pasot, tumi prarthun magxeat titlem-i tumkam mell’lem mhonn bhavart dhôrat, ani tem tumchench zatelem mhonn Hanv tumkam sangtam.

²⁵Ani tumi magnnem korunk ubim ravtat tedna, konnacher add tumkam asot titlem-i bhôgsat ani tumcho Sorgincho Bap tumcheô-i chuki bhôgxitolo.[5]

²⁷Te portun Jeruzaleak aile ani Jezu Devmondirant bhonvtastanam mukhel iadnik, dhormxastri ani zannte Tachê sorxem aile.

²⁸Tãnnim Taka mhonn’lem: “Oxem tunvem korpak koslo odhikar asa tuka? Vô oxem korpak tuka sot’tea konnem dilea?”

²⁹Jezun tankam mhonn’lem: “Hanv tumchê kodde ek vichartam; Mhaka zobab diat, ani tedna koslea odhikaran Hanv oxem kortam tem tumkam sangtolom.

³⁰Juanvacho batism khõi thaun ailo? Sorgar thaun ki mon’xam thaun? Sangat, polleum-ia.”

³¹Ani te apnnam bhitôr oxem chintunk lagle: “ ‘Sorgar thaun’, oxem ami mhonn’lem zalear, to vichartolo: ‘Tôr tumi kiteak tacher bhavart tthevlo na?’

³²Punn ‘mon’xam thaun’, oxem ami mhonntelenv?” — Juanv khoro provadi mhonn sogllo lôk man’talo dekhun te lokak bhiele.

³³Hea pasot, tãnnim mhonn’lem: “Ami nokllonv.” Ani Jezun tankam mhonn’lem: “Koslea odhikaran Hanv heô vostu kortam, tem Hanv-ui tumkam sanginam.”