Read Goan Konkani Mk 12 Bible Online

Mk 12 - Goan Konkani bible

Mk 12

¹Ani To tanche kodde voparimnim ulounk laglo: “Eka mon’xan dakancho ek mollo lailo, tachê bhonvtim ek addo ghalo, khonnun êk kollombi toiar keli, êk gopur bandlo ani, to mollo kullvaddeank kumlleak diun, apunn poixilea ganvak gelo.

²Ani kall pavtôch, molleachea pikecho aplo vantto kullvaddeam lagcho gheunchê khatir, tannem eka chakrak tanchê-xim dhaddlo.

³Tãnnim taka dhorun mar dilo ani rikamo portun dhaddlo.

⁴Dusrê pavtt anink eka chakrak tanchê-xim dhaddlo; tachi tãnnim tokli daddaun, taka beman kelo.

⁵Novean tannem dusrea ekleak dhaddlo, ani tãnnim taka jivexim marlo; ani dhaddleleam sobar zannank oxench kelem; tantleam thoddeank tãnnim boddoile, her dusreank tannim jivexim marle.

⁶Taka ozun ekloch urlolo to tacho chôdd mogacho put. ‘Mhojea putak tori te man ditele’, oxem chintun tannem xekim putak tanchê-xim dhaddlo.

⁷Punn kullvaddeamnim ekamekak mhonn’lem: ‘Ho tacho daiji; ieiat, taka jivexim marum-ia ani daiz amchem zatelem.’

⁸Ani tãnnim taka dhôrlo, tacho jiv kaddlo ani taka mollea bhair kaddun uddoilo.

⁹Atam molleacho dhoni kitem kortolo? To ietolo, kullvaddiancho nas kortolo ani mollo dusreank ditolo.

¹⁰‘Zo fatôr bandpiamnim soddun dil’lo toch zalo konnxea-sondhicho fatôr. Hem Sorvesporanuch ghoddun haddlam!’ Tem polleun ami thottak zaleanv.” oxem Povitr Pustokar boroil’lem asa tem tumi vachinaslam?

¹²Tannem hi vopar apnnank lavun sangli mhonn te bore somzole tedna, te Taka dhorunk sôdtale, punn lokak bhiele; ani Taka sanddun gele.

¹³Magir, Jezuk utrak sampddaunk, Farizevantleam ani Herodichea pokxantleam kãi zannank Tachê-xim dhaddle.

¹⁴Tãnnim lagim sorun Taka oxem mhonn’lem: “Guruji, tum sotan choltai ani tuka konnachich bhidda na mhonn ami zannonv; kiteak mon’xanchem tondd polleun tum uloinãi ani Devachi vatt sotan xikoitai. Tôr Somrazak dôndd farik korunk zai ki na?

¹⁵Ami to farik korcho ki na?” Punn tanchem ddhongeponn ollkhun Tannem tankam mhonn’lem: “Tumi kiteak Mhaka ho fas manddtat? Êk dinar Mhaka haddun diat, polleum-ia.”

¹⁶Tãnnim Taka êk haddun dilo. Ani Tannem tankam mhonn’lem: “Hem rup konnachem? ani hem nanv konnachem?” Tãnnim mhonn’lem: “Somrazachem.”

¹⁷Portipallun Jezun tankam sanglem: “Borem tôr, Somrazachem tem Somrazak diat, ani Devachem tem Devak diat!” Ani Tacho zobab aikun te ojap zale.

¹⁸Uprant Saduki, punorjivontponn na mhonntat te, Jezu-xim aile ani Tachê kodde tãnnim vicharlem:

¹⁹“Guruji, Moizesan amkam oxem boroun dovorlam: ‘Bhurgem-ball nastana konn-ekleacho bhav aplê bailek pattlean dovrun morot zalear, hachea bhavan tachê bailê lagim logn zaunchem ani aplea bhavak sonsôt utpon korchi.’

²⁰Tôr sat bhav asle. Poilo êkê bailê lagim logn zalo ani sonsôt nastanam melo.

²¹Ani dusro tichê lagim logn zalo ani melo; taka-i sonsôt na zali. Ani tosoch tisro.

²²Tê jin’xim sat-ui zannamnim bhurgem-ball dovrunk na. Soglleam uprant bail-ui meli.

²³Tôr sat-ui zannanchi ti potinn zal’li dekhun, punorjivontponnant, mel’lim mon’xam novean jivont zatelim tedna, tanchê bhitorlea konnachi potinn zateli ti?”

²⁴Ani Jezun portipallun tankam mhonn’lem: “Povitr Pustokam, nhoi mhonn Devachi podvi, tumi nokllot dekhun, tumi oxe chuktat nhoi?

²⁵Punorjivontponnachea somoiar dadle logn zainant ani bailank logn korun dinant, punn tim sorgar asto devdutam sarkim zatat.

²⁶Ani mel’leanchea punorjivontponna vixim, ‘Abrahamacho Dev To Hanv, Izakacho Dev To Hanv, Jakobacho Dev To Hanv’, oxem Devan Moizesak sanglem tem, jilkutta-khobrent, tachea pustokar, tumi vachinaslam?

²⁷Mel’leancho nhoi To, bogor jivim asloleancho Dev To! Tumi bhov chuktat.”

²⁸Ani dhormxastreantlea eklean, tanche vad-vivad choltat te aikun ani Jezun kai borê bhaxen zobab dilo tem polleun, Tachê kodde vicharlem: “Soglleam poros ekdom motvachi adnea ti khõichi?”

²⁹Jezun taka zap dili: “Poili adnea hi: Aik, Israela! Amcho Dev To Sorvespor, Ekloch To Sorvespor,

³⁰ani sogllea tujea kallzan, sogllea tujea jivan, sogllea tujea monan, ani sogllê tujê sokten Sorvespora Tujea Devacho tuvem môg korcho.

³¹Dusri ti hi: Tuzo môg kortai tosoch tujea peleacho tuvem môg korcho. Hanchê poros motvachi anink her dusri adnea na.”

³²Ani dhorm-xastrean Taka mhonn’lem: “Borem asa, Guruji! Tunvem sanglãi tem khorem: To Ekloch, ani Tachê bhair anink her dusro na!

³³Khorench, sogllea kallzan, sogllea monan, sogllea jivan, sogllê xokten Tacho môg korop, ani amcho kortanv tosoch mchea peleacho korop soglleam somorponnam ani bolidanam poros ekdom’ odik vortem.”

³⁴Tannem xanneponnan portipall kelo mhonn polleun, Jezun taka mhonn’lem: “Tum Devachea Rajea thaun pois nãi.” Ani tea fuddem kosloch proxn Taka ghalunk konnakuch kalliz zainaslem.

³⁵Ani “‘tujeam dusmanank Hanv Tujeam pãiam tolla ghalin porian, Mhojea uzvea hata bos, Sorvesporan Mhojea Somiak mhonn’lem, oxem Povitr Atmeachea preronnan uloun Davidanuch mhonn’lem zalear’, Krist Davidacho Put, dhormxastri mhonntat tem koxem tor?” Hem Devmondirant xikoitana Jezun vicharlem.

³⁷Daviduch taka Somi mhonnta; mhonntoch To tacho put koso zaunk zata?” Ani lokacho vhôdd zomo khuxê-monan Taka kan ditalo.

³⁸Ani Aplê xikovnnent Jezu tankam mhonntalo: “Dhormxastream vixim chotur ravat; lamb-lamb angavlim ghalun bhonvunk, tinttear apnnank manan kel’le lokache salam’ gheunk,

³⁹devsthanamnim voileam-poileam zageancher bosunk, ani jevnnank poileô svatô dhorunk tankam zoboruch borem lagta;

⁴⁰lamb magnneanchem song gheun vidvanchim ghoram-daram te khaun uddoitat. Tankam soglleam-von odik khôr zhôddti asteli.”

⁴¹Devmondirant dananchê pettê mukhar bosun, lôk koso pettent duddu ghalta tem Jezu polleun aslo. Ani sobar girest mon’xam khup duddu ghaltalim;

⁴²tedna êk gorib vidva aili ani tinnem don lepton[6] tantum ghale, mhonngê êk pav as’sarion[7]

⁴³Apleam xisank apoun haddun Tannem mhonn’lem: “Pettent duddu ghaleat team soglleam poros hê gorib vidven odik ghalam;

⁴⁴tôr soglleamnim apnnank ogllem aslem tantlem ghalem; punn hinnem aplea goribponnantlem kaddun aslem titlem-i ghalem, aplea jivak zai aslem tem porian.”